త్రివిక్రమ్, నానిలను టార్గెట్ చేసింది

మిల్కీ బ్యూటీ తమన్నా ఇండస్ట్రీలో అడుగుపెట్టి చాలా కాలమే అయింది. టీనేజ్ లోనే ఎంట్రీ ఇచ్చేపాటికి యంగేజ్ ప్రారంభంలోనే స్టార్ హీరోయిన్ అయిపోయింది తమ్మూ. సుదీర్ఘ కాలంగా నటిస్తుండడంతో.. దాదాపు టాప్ స్టార్స్ అందరినీ కవర్ చేసేసిన క్రెడిట్ దక్కించుకుంది. మరి ఇంత అనుభవం సంపాదించేశాక కూడా.. ఇంకా తీరని కోరికలు ఏమన్నా ఉన్నాయా అంటే.. ఉన్నాయంటోంది మిల్కీ.

కొందరు టెక్నీషియన్స్ - యాక్టర్స్ తో కలిసి నటించాలన్న కోరిక ఇంకా తీరలేదట. ఈ తరహా ఆఫర్స్ కోసం వెయిట్ చేస్తోందట. ముఖ్యంగా మాటల మాంత్రికుడు త్రివిక్రమ్ మూవీలో వర్క్ చేయాలని అనుకుంటున్నట్లు తమన్నా చెబుతోంది. ఆయన వర్కింగ్ స్టైల్ చాలా ఇష్టమని, త్వరలోనే ఆయనతో సినిమా చేసే అవకాశం వస్తుందని అనుకుంటున్నట్లు చెప్పుకొచ్చింది మిల్కీ. ఇక హీరోల్లోనూ ఒక హీరోతో చేసే ఛాన్స్ కోసం ఎదురుచూస్తోందట. అతను ఎవరో కాదు.. నేచురల్ స్టార్ నాని.

'నాని లాంటి నేచురల్ యాక్టర్ తో చేయడం నిజంగా సవాల్ లాంటిదే. అదే టైంలో ఎంతో స్ఫూర్తి కూడా లభిస్తుంది. గత కొన్నేళ్లుగా అతను చేసిన సినిమాలే, నాని వ్యక్తిత్వాన్ని చాటుతాయి' అంటున్న తమన్నా.. త్వరలో నానితో చేసే అవకాశం కూడా వస్తుందని నమ్మకంగా ఉంది. ప్రస్తుతం ఊపిరి రిజల్ట్ కోసం ఊపిరి బిగపట్టి మరీ ఎదురుచూస్తోంది ఈ భామ. ఈ మూవీ సక్సెస్ అయితే.. తెలుగులో హ్యా ట్రిక్ హిట్స్ అవుతాయి మిల్కీ బ్యూటీకి.