తేజ.. రాజశేఖర్ తోనే అంటున్నాడే..

సెన్సేషనల్ డైరెక్టర్ తేజ దర్శకత్వంలో సీనియర్ నటుడు రాజశేఖర్ ప్రధాన పాత్రలో ‘అహం’ అనే సినిమా ఒకటి తెరమీదికి వచ్చిన సంగతి తెలిసిందే. ఐతే ఈ సినిమా షూటింగ్ సందర్భంగా రాజశేఖర్ ఇన్ డిసిప్లిన్ భరించలేక ఆయనకు తేజ టాటా చెప్పేశాడన్న వార్తలు వచ్చాయి ఈ మధ్య. ఐతే దీని గురించి ఎలాంటి అఫీషియల్ కన్ఫర్మేషన్ లేదు. తేజ సినిమాలు ఎప్పుడు మొదలవుతాయో.. ఎప్పుడు పూర్తవుతాయో.. వాటికి సంబంధించిన విశేషాలేంటో ఎప్పుడూ ఎవరికీ తెలియవు. దీంతో రాజశేఖర్ ను తేజ తప్పించిన విషయంలో వాస్తవం ఎంత అన్నది ఎవ్వరికీ క్లారిటీ లేదు.

ఐతే ఇప్పుడు జనాలందరికీ షాకిస్తూ తేజ ఒక ప్రకటన చేశాడు. ‘అహం’ అని పేరేమీ చెప్పకుండా తాను రాజశేఖర్ తో ఓ సినిమా చేయబోతున్నానని మాత్రం ప్రకటించాడు తేజ.  దీంతో పాటుగా  వైష్ణవి ఎంటర్ టైన్ మెంట్స్ బ్యానర్ మీద.. పడాల సత్యనారాయణ నిర్మాతగా ఓ స్టార్ హీరో- స్టార్ హీరోయిన్ తో కలిసి ఓ సినిమా చేయబోతున్నట్లు కూడా వెల్లడించాడు తేజ. ఈ సినిమా భారీ బడ్జెట్ తో ఉంటుందని అతను చెప్పాడు. ఈ చిత్రానికి సంబంధించి పూర్తి వివరాలు త్వరలో వెల్లడవుతాయన్నాడు. ఐతే ఆ స్టార్ హీరో హీరోయిన్లు ఎవరో కానీ.. ముందు తేజ-రాజశేఖర్ సినిమా మీదే అందరికీ ఆసక్తి నెలకొని ఉంది. వీళ్లిద్దరి మధ్య గొడవ జరిగిన మాట వాస్తవమా కాదా.. అది నిజమే అయినా మళ్లీ రాజశేఖర్ తో సినిమా చేయాలనుకున్నాడా.. అన్నది తేలాల్సి ఉంది.