ఉపేంద్ర మళ్లీ వచ్చేస్తున్నాడు బాబోయ్

దశాబ్దంన్నర కిందట వచ్చిన ‘ఎ’ సినిమా సౌత్ ఇండియాలో పెద్ద సంచలనం. కన్నడనాట మాత్రమే కాదు.. తెలుగు రాష్ట్రంలోనూ ఉపేంద్రకు తిరుగులేని పాపులారిటీ వచ్చింది ఈ సినిమాతో. ఒకే ఒక్క సినిమాతో ఓ పరభాషా నటుడు ఇక్కడ స్టార్ ఇమేజ్ సంపాదించేయడం అప్పట్లో మన జనాలకు మింగుడు పడలేదు. సినిమాలందు ఉపేంద్ర సినిమాలు వేరయా అంటూ అప్పట్నుంచి ఉపేంద్ర కనిపించిన ప్రతి సినిమానూ ఎగబడి చూశారు మన ప్రేక్షకులు. ఆ తర్వాత "ఉపేంద్ర", "రా" సినిమాలు కూడా మన జనాల ఇగోను బాగా సంతృప్తి పరిచాయి. మిగతా దర్శకులు చర్చించలేని చాలా విషయాల్ని తన సినిమాల్లో చూపించాడు ఉపేంద్ర.

ఐతే గత దశాబ్ద కాలంలో ఉపేంద్ర తన సొంత డైరెక్షన్లో చేసిన సినిమా సూపర్ మాత్రమే. ఆ సినిమా కూడా జనాల్ని ఆకట్టుకుంది. దాని తర్వాత మళ్లీ ఇప్పుడు తన బ్లాక్ బస్టర్ మూవీ ‘ఉపేంద్ర’కు సీక్వెల్ చేస్తుండటం ఆసక్తి రేపుతోంది. ఉప్పి-2 పేరుతో తెరకెక్కుతున్న ఈ సినిమాకు ఉపేంద్ర అన్నీ తానై వ్యవహరిస్తున్నాడు. ఇందులో అతడి గెటప్పులు చూస్తుంటే కన్నడ జనాలకు మతి పోతోంది. అఘోరా వేషంలో, విచిత్రమైన హెయిర్ స్టయిల్స్ తో తన ముద్ర చూపిస్తున్నాడు ఉప్పి. దీంతో అందరూ ఉపేంద్ర ఈజ్ బ్యాక్ అంటున్నారు. ఈ సినిమా ఆగస్టు 14న ప్రేక్షకుల ముందుకు రానుంది. తెలుగులో ‘గాలిపటం’ సినిమా చేసిన క్రిస్టినా అకీవా హీరోయిన్. ఈ సినిమాను ప్రముఖ నిర్మాత నల్లమలుపు శ్రీనివాస్ తెలుగులోనూ విడుదల చేస్తుండటం విశేషం.