బోయపాటి భలే పట్టుకొచ్చాడే...

అబ్బా ఇది ఏమి వాన.. ‘ఘరానా మొగుడు’లోని ఈ పాట గుర్తుకు రాగానే వాణీ విశ్వనాథ్ హాట్ హాట్ అందాలు కళ్లముందు మెదులుతాయి. ఆ ఒక్క పాటతో ఆమె ఎంతగా తెలుగు కుర్రాళ్లపై ప్రభావం చూపిందో ప్రత్యేకంగా చెప్పాల్సిన పని లేదు. దానికి ముందు.. తర్వాత తెలుగులో చాలా సినిమాలే చేసింది వాణి. ఐతే ఆమె ఉన్నట్లుండి కనుమరుగైపోయింది. చాలామంది హీరోయిన్ల లాగా అవకాశాలు తగ్గాక కూడా సినీ పరిశ్రమను పట్టుకుని వేలాడలేదు. పెళ్లి చేసుకుని వ్యక్తిగత జీవితంలో స్థిరపడింది. ఇప్పుడు వాణి ఎలా ఉందో కూడా జనాలకు తెలియదు. అలాంటి హీరోయిన్ని మళ్లీ టాలీవుడ్లోకి తీసుకొస్తున్నాడు స్టార్ డైరెక్టర్ బోయపాటి శ్రీను.

బెల్లంకొండ శ్రీనివాస్ హీరోగా బోయపాటి తెరకెక్కుస్తున్న కొత్త సినిమాలో వాణి విశ్వనాథ్ ఓ కీలక పాత్ర చేస్తోందట. ఈ సినిమాలో జగపతి బాబు.. శరత్ కుమార్.. సుమన్ లాంటి సీనియర్ నటులు ముఖ్య పాత్రలు చేస్తున్నారు. బోయపాటి తన ప్రతి సినిమాలోనూ సీనియర్లకు మూడు నాలుగు కీలక పాత్రలు సెట్ చేసి పెడుతుంటాడు. ఇప్పుడు వాణీని ఏరి కోరి ఈ పాత్రకు ఎంచుకున్నాడంటే అందులో ఏదో ప్రత్యేకత ఉండే ఉంటుందని భావిస్తున్నారు. అందరూ మరిచిపోయిన వాణిని బోయపాటి గుర్తుంచుకుని ఆమెకు ఓ ముఖ్య పాత్ర ఇవ్వడం విశేషం. బెల్లంకొండ శ్రీనివాస్ సరసన రకుల్ ప్రీత్.. ప్రగ్యా జైశ్వాల్ నటిస్తున్న ఈ చిత్రం ఇప్పటికే యాభై శాతం షూటింగ్ పూర్తి చేసుకున్నట్లు సమాచారం.

Like Us on Facebook : https://www.facebook.com/Tupakidotcom/