రెండు నెలల ముందే బెర్తులు బుక్ చేసేశారు

ఈ రోజుల్లో సినిమా చేయడం కంటే దాన్ని సరిగ్గా రిలీజ్ చేయడం కష్టమైపోతోంది. మంచి రిలీజ్ డేట్ ఎంచుకుని పోటీ లేకుండా విడుదల చేసుకోవడం సవాలుగా మారుతోంది. పెద్ద పెద్ద సినిమాలకు కూడా ఈ విషయంలో ఇబ్బందులు తప్పట్లేదు. ఫలితాల మాటెలా ఉన్నా.. సినిమాల సంఖ్య పెరిగిపోతుండటంతో రిలీజ్ డేట్ కోసం కొట్లాటలు తప్పట్లేదు. దీంతో ఇంతకుముందులాగా సినిమా పూర్తి చేసుకుని ఎప్పుడనుకుంటే అప్పుడు రిలీజ్ డేట్ ఫిక్స్ చేసుకునే పరిస్థితి లేదు. ముందే రిలీజ్ డేట్ ప్రకటించి.. దాన్ని అందుకునే ప్రయత్నం చేయాలి. అసలు సినిమాను రిలీజ్ చేస్తామో లేదో.. ముందైతే బెర్తు బుక్ చేసేద్దాం అని చూసే నిర్మాతలకూ కొదవలేదు.

ఈ ఏడాది క్రిస్మస్ వీకెండ్ కు.. వచ్చే ఏడాది సంక్రాంతికి చాలా ముందుగానే బెర్తులు బుక్ అయిన సంగతి తెలిసిందే. ఐతే ఫిబ్రవరిలో అన్ సీజన్ కు కూడా ఇలాగే అడ్వాన్స్ బుకింగ్ అయిపోవడం విశేషం. ఫిబ్రవరి 2కు నాని నిర్మాణంలో తెరకెక్కుతున్న ‘అ’ సినిమాను షెడ్యూల్ చేసి పెట్టేశారు. ప్రశాంత్ వర్మ అనే కొత్త దర్శకుడితో నాని ఈ చిత్రాన్ని నిర్మిస్తున్న సంగతి తెలిసిందే. మరోవైపు వరుణ్ తేజ్ కొత్త సినిమా ‘తొలిప్రేమ’ను ఫిబ్రవరి 9కి ఫిక్స్ చేశారు. అదే తేదీకి బెల్లంకొండ శ్రీనివాస్ సినిమా ‘సాక్ష్యం’ కూడా షెడ్యూల్ అయి ఉంది. ఇక ఈ రెండు వారాలకు ముందు రిపబ్లిక్ డే వీకెండ్లో రెండు సినిమాలు రాబోతున్నాయి. అనుష్క సినిమా ‘భాగమతి’తో పాటు.. మంచు విష్ణు మూవీ ‘ఆచారి అమెరికా యాత్ర’ను జనవరి 26నే రిలీజ్ చేయబోతున్నారు.