జ‌గ‌న్ పాత్ర‌లో గోవిందం?

వైయ‌స్సార్ జీవిత‌క‌థ‌తో `యాత్ర` తెర‌కెక్కుతున్న సంగ‌తి తెలిసిందే. మ‌హి.వి.రాఘ‌వ్ ఈ చిత్రానికి ద‌ర్శ‌క‌త్వం వ‌హిస్తున్నారు. మ‌ల‌యాళ మెగాస్టార్ మ‌మ్ముట్టి వైయ‌స్సార్ పాత్ర‌లో న‌టిస్తున్నారు. పోస్ట‌ర్లు - సాంగ్‌ టీజ‌ర్‌ కి చ‌క్క‌ని స్పంద‌న వ‌చ్చింది. ఇక ఈ సినిమాలో జ‌గ‌న్ పాత్ర‌లో ఎవ‌రు న‌టిస్తారు? అన్న ప్ర‌శ్న‌ల‌కు ర‌క‌ర‌కాల ఊహాగానాలు సాగుతున్నాయి. కోలీవుడ్ నుంచి ఓ ప్ర‌ముఖ హీరో ఆ పాత్ర‌కు ఎంపిక‌య్యార‌ని ఇదివ‌ర‌కూ వార్త‌లొచ్చాయి. సూర్య‌ - కార్తీ పేర్లు ప‌లు ద‌ఫాలుగా వినిపించాయి. కానీ జ‌గ‌న్‌ పాత్ర‌ధారి ఎవ‌రో చిత్ర‌యూనిట్ నుంచి అధికారికంగా ఎలాంటి క్లారిటీ రాలేదు.

తాజా స‌మాచారం ప్ర‌కారం.. వైయ‌స్సార్‌ సీపీ అధినాయ‌కుడు జ‌గ‌న్ పాత్ర కోసం విజ‌య్ దేవ‌ర‌కొండ‌తో సంప్ర‌దింపులు సాగిస్తున్నార‌ని తెలుస్తోంది. దేవ‌ర‌కొండ‌ ఆ పాత్ర‌లో న‌టిస్తే సినిమాకి బిజినెస్ ప‌రంగా అది లాభిస్తుంది. అందుకే అత‌డికి భారీ పారితోషికం ఆఫ‌ర్ చేశార‌ని మాట్లాడుకుంటున్నారు. ఈ పాత్ర‌లో న‌టిస్తే అది నైజాం మెగాస్టార్‌ గా దూసుకొస్తున్న దేవ‌ర‌కొండకు ప్ల‌స్ అవుతుంది. ఇటు తెలంగాణ‌తో పాటు - అటు ఏపీ - రాయ‌ల‌సీమ‌లోనూ విజ‌య్ దేవ‌ర‌కొండ ఇమేజ్ పెరిగే ఛాన్స్ ఉంటుంద‌న్న విశ్లేష‌ణ సాగుతోంది. ఇప్ప‌టికి ఇంకా అధికారికంగా ఈ విష‌యాన్ని యూనిట్ ధృవీక‌రించ‌లేదు.

గీత గోవిందం చిత్రంతో దేవ‌ర‌కొండ ఇమేజ్ స్కైని ట‌చ్ చేసింది. అత‌డు కెరీర్ ప‌రంగా క్ష‌ణం తీరిక లేనంత బిజీ అయిపోతున్నాడు. ఇప్ప‌టికిప్పుడు వ‌రుస‌గా రెండు సినిమాల‌తో బిజీగా ఉన్నాడు. అక్టోబ‌ర్‌ లో రిలీజ్‌ కి రానున్న `నోటా` చిత్రీక‌ర‌ణ‌తో బిజీగా ఉన్నాడు. ఈ సినిమాని స్టూడియోగ్రీన్ ఎంట‌ర్‌ టైన్‌ మెంట్స్ ప‌తాకంపై ఆనంద్ శంక‌ర్ ద‌ర్శ‌క‌త్వంలో తెర‌కెక్కిస్తున్నారు. త‌దుప‌రి మైత్రి మూవీస్ నిర్మిస్తున్న `డియ‌ర్ కామ్రేడ్‌` చిత్రీక‌ర‌ణ‌తోనూ బిజీ అయిపోతాడు. ఆ క్ర‌మంలోనే తాజా ఆఫ‌ర్ దేవ‌ర‌కొండ‌ను ఆక‌ర్షిస్తోంద‌ని ఫిలింన‌గ‌ర్‌ లో మాట్లాడుకోవ‌డం విశేషం.