ఎవడే సుబ్రమణ్యం మూవీలో కీలక పాత్రలో కనిపించి.. పెళ్లి చూపులు చిత్రంతో హీరోగా ఆకట్టుకున్న విజయ్ దేవరకొండ.. అర్జున్ రెడ్డి మూవీతో దాదాపుగా స్టార్ ఇమేజ్ సొంతం చేసుకున్నాడు. కుర్రకారులో విపరీతమైన క్రేజ్ సంపాదించుకున్నాడు.
అనేక మందికి పదులకొద్దీ సినిమాలు చేసి కష్టపడి సంపాదించుకున్నంత ఇమేజ్.. విజయ్ దేవరకొండకు తక్కువ సమయంలోనే వచ్చేసింది. ఇండస్ట్రీలో ఇలా వచ్చిన క్రేజ్ ను.. తమ కోసమే కాకుండా.. ఫ్యామిలీ మెంబర్స్ కోసం కూడా వాడుకోవడం కనిపిస్తూనే ఉంటుంది. విజయ్ దేవరకొండకు కు ఆనంద్ దేవరకొండ అనే ఓ తమ్ముడు ఉన్నాడు. ప్రస్తుతం ఇతడు జిమ్ లో వర్కవుట్స్ చేస్తూ విపరీతంగా కష్టపడిపోతున్నాడట. అంతే కాదు.. పలు రకాల ఫిలిం క్రాఫ్ట్స్ లో కూడా ఫుల్ స్పీడ్ లో ట్రైనింగ్ అయిపోతున్నాడట.
ఇదంతా సినిమా రంగంలో అరంగేట్రం చేయడం కోసమే అనే విషయం ప్రత్యేకంగా చెప్పాల్సిన పని లేదు. విజయ్ దేవరకొండకు బాగా సన్నిహితమైన ఓ బడా నిర్మాణ సంస్థ.. ఇప్పటికే ఆనంద్ అరంగేట్రానికి సంబంధించిన కమిట్మెంట్ కూడా ఇచ్చిందట. అందుకే ఇతగాడు తన ఫిజిక్ ను పర్ఫెక్ట్ షేప్ లోకి తెచ్చేందుకు తెగ కష్టపడిపోతున్నాడని తెలుస్తోంది. తమిళ్ లో సూర్య-కార్తి టైపులో.. తెలుగులో ఈ దేవరకొండ బ్రదర్స్ చెలరేగిపోతారేమో చూడాలి.