లక్కంటే ఒప్పుకోనన్న గోవింద్!

మామూలుగా ఓ మాదిరి సక్సెస్ వస్తేనే హీరోలను పట్టడం కష్టం. అలాంటిది ఊహించిన దాని కన్నా పది రెట్లు ఎక్కువ విజయాన్ని సొంతం చేసుకుంటే అంత కంటే ఏ నటుడికైనా కావాల్సింది ఏముంటుంది. ఐదు సినిమాలకే స్టార్ అంటూ మెగాస్టార్ చేతే పొగిడించుకున్న హీరో విజయ్ దేవరకొండ ఇప్పుడు గాల్లో తేలిపోతున్నాడు. సినిమాలతో పాటుగా బోల్డ్ గా ఓపెన్ గా అనిపించే తన యాటిట్యూడ్ ద్వారానే ఎక్కువ అభిమానులను సంపాదించుకున్న విజయ్ దేవరకొండ తన వెనుక లక్కుందంటే మాత్రం ఒప్పుకోవడం లేదు. గీత గోవిందంతో పాటు రానున్న టాక్సీ వాలా కూడా గీతా ఆర్ట్స్ బ్యానర్ లోనే రూపొందటం పట్ల ఇప్పటికే విజయ్ ని అదృష్టవంతుడు అని మోసేస్తున్నారు. కానీ విజయ్ మాత్రం లక్ అనే మాటను ఒప్పుకోవడం లేదు.

పెళ్లి చూపులు సక్సెస్ వెనుక టీమ్ చేసిన కృషి చాలా ఉందని హీరోయిన్ రీతూ వర్మ మొదలుకుని దర్శకుడు తరుణ్ భాస్కర్ వరకు  అందరి కృషి కష్టం ఫలించడం వల్లే అంత పెద్ద సక్సెస్ లో తాను ఒక భాగమయ్యానని అందుకే గీతా ఆర్ట్స్ లాంటి పెద్ద సంస్థ తనకు ఆఫర్ ఇచ్చిందని చెప్పాడు. ఇక్కడ అదృష్టం వెంటపడటం లాంటివి ఏమి ఉండవని కష్టాన్ని నమ్ముకుంటే ఫలితం తప్పకుండా దొరుకుతుందని కుండబద్దలు కొట్టేసాడు. విజయ్ దేవరకొండ అన్న దాంట్లో లాజిక్ లేకపోలేదు. పెళ్లి చూపులు తర్వాత అర్జున్ రెడ్డి షూటింగ్ టైం లో గీతా ఆర్ట్స్ ఒప్పందం చేసుకుంది. అంటే కుర్రాడు ప్రూవ్ చేసుకున్నాడు కాబట్టి ఫ్యూచర్ ఉందని గుర్తించే రెండు సినిమాలు ఓకే చేయించుకుంది. అంతే తప్ప పెళ్లి చూపులు గీతా ఆర్ట్స్ తీయలేదు. సో విజయ్ దేవరకొండ చెప్పినట్టు ఇవన్నీ గుర్తించి ఇచ్చిన అవకాశాలే తప్ప  గాలివాటం కాదు. ప్రస్తుతం టాక్సీ వాలా రిలీజ్ కోసం ఎదురు చూస్తుండగా డియర్ కామ్రేడ్-నోటా షూటింగ్స్ జరుగుతున్నాయి. మరో మూడు నాలుగేళ్ల దాకా విజయ్ దేవరకొండ డైరీ ఖాళీగా ఉండటం కష్టమే.