విజయశాంతి ఈజ్ బ్యాక్.. యాక్షన్ స్టార్ట్

'భరత్ అనే నేను'.. 'మహర్షి' సినిమాలతో వరసగా రెండు విజయాలను తన ఖాతాలో వేసుకున్న సూపర్ స్టార్ మహేష్ బాబు నటిస్తున్న తాజా చిత్రం 'సరిలేరు నీకెవ్వరు'.  అనిల్ రావిపూడి దర్శకత్వంలో తెరకెక్కుతున్న ఈ సినిమా షూటింగ్ ప్రస్తుతం జోరుగా సాగుతోంది.  ఈ సినిమాలో లేడీ సూపర్ స్టార్ గా పేరు తెచ్చుకున్న విజయ శాంతి ఒక కీలక పాత్ర పోషిస్తున్న సంగతి తెలిసిందే.  

ఈరోజే విజయశాంతి సరిలేరు నీకెవ్వరు షూటింగ్ లో జాయిన్ అయ్యారు.  ఈ సందర్భంగా దర్శకుడు అనిల్ రావిపూడి విజయశాంతి ఫోటో ఒకటి పోస్ట్ చేసి "13 ఏళ్ళ తర్వాత విజయశాంతి గారు మేకప్ వేసుకున్నారు.  ఈ 13 ఏళ్ళలో ఆవిడలో ఏం మార్పు రాలేదు.  అదే క్రమశిక్షణ.. అదే పద్ధతి.. అదే డైనమిజం.. వెల్కమ్ ఆన్ బోర్డ్ విజయశాంతి గారు" అంటూ ట్వీట్ చేశారు.  ఈ ఫోటోలో మేకప్ వేసుకున్న విజయశాంతి గారి ఫోటో మసగ్గా ఉంది.  విజయశాంతి  ఫస్ట్ లుక్ ను గ్రాండ్ గా రిలీజ్ చేసే ఉద్దేశంతో ఇలా బ్లర్ గా ఉండే శాంపిల్ ను అభిమానుల కోసం పంచుకున్నట్టుగా ఉంది.

మహేష్ బాలనటుడుగా ఉన్నప్పుడు విజయశాంతి తో కలిసి నటించడం జరిగింది.  అయితే అప్పుడు కృష్ణగారు సూపర్ స్టార్.  సీన్ కట్ చేస్తే ఇప్పుడు కృష్ణగారి అబ్బాయి మహేష్ సూపర్ స్టార్.  మహేష్ - విజయశాంతి కాంబినేషన్ సీన్స్ పై ప్రేక్షకుల్లో భారీ ఆసక్తి ఉంటుందనడంలో ఏమాత్రం సందేహం లేదు. మరి అనిల్ రావిపూడి వారి కాంబినేషన్ ను ఎలా ప్రెజెంట్ చేశాడో తెలియాలంటే సంక్రాంతి వరకూ వేచి చూడక తప్పదు.