ఈమధ్య కాలంలో ఎలాంటి అంచనాలు లేకుండా ప్రేక్షకుల ముందుకొచ్చి సూపర్ హిట్ కొట్టిన చిత్రం అర్జున్ రెడ్డి. విజయ్ దేవరకొండ - షాలినీ పాండే హీరో హీరోయిన్లుగా నటించిన ఈ మూవీ అటు కమర్షియల్ సక్సెస్ కావడంతో పాటు ఇటు విమర్శకుల ప్రశంసలు సైతం దక్కించుకుంది. యూత్ కు అర్జున్ రెడ్డి సినిమా విపరీతంగా నచ్చింది. అందుకే హీరో విక్రమ్ తన కొడుకు ధ్రువను హీరోగా పరిచయం చేసేందుకు అర్జున్ రెడ్డి సినిమా రీమేక్ చేయడమే కరెక్టని డిసైడై పోయాడు.
అర్జున్ రెడ్డి సినిమాను తమిళంలో వర్మ పేరుతో రీమేక్ చేస్తున్నారు. ఇందులో హీరోయిన్ గా ఎవరిని తీసుకోవాలనేది ఇంకా డిసైడవలేదు. ప్రస్తుతం ఆడిషన్స్ చేస్తున్నారు. ఇంట్రస్ట్ ఉన్నవాళ్లు అప్లయ్ చేసుకోవచ్చంటూ ఓపెన్ ఇన్విటేషన్ ఇచ్చాడు హీరో విక్రమ్. వర్మ ప్రేయసి ఎలా ఉండాలనే దానిపై ఓ వీడియో ఇన్ స్టాగ్రామ్ లో పోస్ట్ చేశాడు. సముద్రపు ఒడ్డున ఓ సుందరి సరదాగా విహరిస్తున్నట్టుగా ఈ వీడియో ఉంటుంది. ఇందులో హీరోయిన్ కు కావాల్సిన క్వాలిటీలూ చెప్పారు. ఆమె అందంగా... ఫన్నీగా ఉండాలి. క్యూట్ గా.. సిల్లీ గా ఉండాలి. దేవతలా ఉండాలి... అలాగే రాక్షసిలానూ అనిపించాలి. అలా ఉండి ఇంట్రస్ట్ ఉన్నవాళ్లంతా వీలైనంత త్వరగా డిటైల్స్ పంపాలని మెయిల్ ఐడీ ఇచ్చారు.
విక్రమ్ పోస్ట్ చేసిన వీడియోలో ఓ బ్యాక్ గ్రౌండ్ వాయిస్ వస్తూ ఉంటుంది. ఆ వాయిస్ ఇచ్చింది హీరోయిన్ శ్రుతిహాసన్. అందుకు విక్రమ్ ఆమెకు థ్యాంక్స్ కూడా చెప్పాడు. వర్మ సినిమాకు శివపుత్రుడు.. వాడు-వీడు ఫేం డైరెక్టర్ బాల దర్శకత్వం చేయనున్నాడు. అయినా విక్రమ్ హీరోయిన్ కు కావాల్సిన క్వాలిటీలన్నీ బాగానే చెప్పాడు కానీ చాలా బోల్డ్ గా ఉండాలనే విషయం మాత్రం చెప్పలేదు. అర్జున్ రెడ్డి కథకు అది చాలా ఇంపార్టెంట్ కదా? ఈ పాయింట్ ఎందుకు వదిలేశాడు?