దుల్కార్ తో వైజ‌యంతి మూవీ ఊసే లేదు!

మలయాళ హీరో దుల్కర్‌ సల్మాన్ `మహానటి`లో జెమినీ గణేషన్ పాత్ర‌లో నటించిన సంగ‌తి తెలిసిందే. తనదైన సెటిల్డ్ నటనతో తెలుగు ఆడియెన్ కి క‌నెక్ట‌య్యాడు. `ఓకే బంగారం` నుంచి ఇటీవల విడుదలైన `కనులు కనులను దోచాయటే` చిత్రం వరకు ఆయన నటించిన మలయాళ సినిమాలు తెలుగులో డబ్‌ అయి ఆకట్టుకున్నాయి. దీంతో వైజ‌యంతి బ్యాన‌ర్ లోనే దుల్క‌ర్ తో మ‌హాన‌టి నిర్మాత‌లు వేరొక సినిమా ప్లాన్ చేశారు.

అందాల రాక్ష‌సి ఫేం హనురాఘవపూడి దర్శకత్వం వ‌హిస్తార‌ని కథా చర్చలు పూర్త‌యి స్క్రిప్ట్ కూడా ఓకే అయిపోయింద‌ని ప్ర‌చార‌మైంది. కచ్చితంగా ఇది తనకు టాలీవుడ్ లో హీరోగా మంచి ఎంట్రీ అవుతుందని దుల్కర్‌ భావించార‌ని వినిపించింది.

కానీ వైజ‌యంతి మూవీస్ - దుల్కర్ సల్మాన్ సినిమా ఏమైంది? అప్ప‌ట్లో మ‌హాన‌టి ఊపులో ప్ర‌క‌టించినా ఆ త‌రువాత ఈ సినిమా గురించి ఊసే లేదు. అయితే ప్ర‌భాస్ తో సినిమా ప్రారంభించ‌డంతో దుల్కర్ సినిమా సైడ్ అయిపోయింద‌నే టాక్ మ‌రోవైపు వినిపిస్తోంది. అయితే అది ఎంత‌వర‌కు నిజం అన్న‌ది తెలియాల్సి ఉంది. మ‌హాన‌టి నిర్మాత‌లు స్వ‌ప్న - ప్రియాంక దీనిపై వివ‌రాలు వెల్ల‌డిస్తారేమో చూడాలి.