నటసింహంతో పుష్పరాజ్.. అన్ స్టాపబుల్ ఎపిసోడ్ లాక్!

టాలీవుడ్ సీనియర్ హీరో నందమూరి బాలకృష్ణ ఓవైపు NBK 109 ప్రాజెక్ట్ లో నటిస్తూనే.. మరోవైపు అన్ స్టాపబుల్ షోను హోస్ట్ చేస్తున్న విషయం తెలిసిందే. ప్రముఖ ఓటీటీ సంస్థ ఆహాలో స్ట్రీమింగ్ అవుతున్న అన్ స్టాపబుల్ షో విత్ ఎన్ బీకే సక్సెస్ ఫుల్ గా దూసుకుపోతుంది. ఇప్పటికే మూడు సీజన్స్ పూర్తి చేసుకున్న ఆ షో నాలుగో సీజన్ రీసెంట్ గా స్టార్ట్ అయింది. ఈసారి కూడా బాలయ్య తన హోస్టింగ్ తో ప్రేక్షకులను మెప్పిస్తున్నారు.

ఇప్పటికే నాలుగో సీజన్ కు ఆంధ్రప్రదేశ్ సీఎం చంద్రబాబు నాయుడు, మాలీవుడ్ స్టార్ హీరో దుల్కర్ సల్మాన్, కోలీవుడ్ స్టార్ హీరో సూర్య గెస్టులుగా విచ్చేసిన విషయం తెలిసిందే. తొలి మూడు ఎపిసోడ్స్ మంచి వ్యూస్ అందుకుని అలరిస్తున్నాయి. బాలయ్య హోస్టింగ్ ను ఓటీటీ లవర్స్ ఫుల్ గా ఎంజాయ్ చేస్తున్నారు. బాలయ్య పంచులు, గెస్టుల రిప్లైలు, ఫన్నీ గేమ్స్, ఇంట్రెస్టింగ్ విషయాల షేరింగ్.. ఆస్వాదిస్తూ ఫిదా అవుతున్నారు.

ఇప్పుడు నాలుగో సీజన్ నాలుగో ఎపిసోడ్ కు డేట్ లాకైనట్లు తెలుస్తోంది! ఐకాన్ స్టార్ అల్లు అర్జున్ గెస్ట్ గా నాలుగో ఎపిసోడ్ కు వచ్చారు. ఆ విషయాన్ని ఆహా నిర్వాహకులు అఫీషియల్ గా తెలిపారు. పుష్ప రాజ్ రోల్ లో ఉన్న బన్నీ షేడో ఇమేజ్ ను పోస్ట్ చేశారు. ఒక ఫైర్ సర్ప్రైజ్ మా నుండి మీకోసం అంటూ షేర్ చేశారు. అల్లు అర్జున్ పేరు గానీ ఫోటో గానీ రివీల్ చేయకపోయినా.. ఆయనే గెస్ట్ గా వస్తున్నట్లు షోడో ఇమేజ్ అండ్ హ్యాష్ ట్యాగ్స్ ద్వారా తెలిసింది.

ఇప్పటికే ఎపిసోడ్ షూటింగ్ కంప్లీట్ అయినట్లు తెలుస్తోంది. నవంబర్ 15వ తేదీన ఎపిసోడ్ ను నిర్వాహకులు స్ట్రీమింగ్ చేయనున్నారని సమాచారం. అందుకు గాను అన్ని ఏర్పాట్లు పూర్తి చేసినట్లు టాక్ వినిపిస్తోంది. త్వరలోనే అఫీషియల్ గా అనౌన్స్ చేయనున్నారని వార్తలు వస్తున్నాయి. పుష్ప-2తో ఫుల్ బిజీగా ఉన్నా కూడా అల్లు అర్జున్.. అన్ స్టాపబుల్ షోకు హాజరయ్యారు. మరో రెండు రోజుల్లో ప్రోమో రిలీజ్ కానుందని వినికిడి.

అయితే బన్నీ గెస్ట్ గా వచ్చిన అన్ స్టాపబుల్ ఫోర్త్ సీజన్ ఫోర్త్ ఎపిసోడ్ కోసం ఎంతో ఆసక్తిగా ఎదురు చూస్తున్నట్లు నెటిజన్లు చెబుతున్నారు. బన్నీ, బాలయ్య సందడి చూసేందుకు రెడీగా ఉన్నామని ఇద్దరి హీరోల ఫ్యాన్స్ కామెంట్లు పెడుతున్నారు. ఆహా ఓటీటీ షేక్ అవ్వడం ఖాయమని అంటున్నారు. మొత్తానికి పుష్ప సీక్వెల్ రిలీజ్ కు ముందు బన్నీ అన్ స్టాపబుల్ షోకు హాజరవ్వడంతో ఎపిసోడ్ కచ్చితంగా భారీ వ్యూస్ సంపాదించుకోవడం పక్కా!