చిరు, మారుతి మూవీ... మళ్లీ ఏదో జరుగుతోంది

మెగాస్టార్‌ చిరంజీవి తో ఒక్క సినిమా చేసే అవకాశం వచ్చినా కూడా లైఫ్ టైమ్‌ అచీవ్మెంట్ అన్నట్లుగా యంగ్ దర్శకుల నుంచి సీనియర్ దర్శకుల వరకు చాలా మంది మాట్లాడుకుంటూ ఉంటారు. చాలా కొద్ది మందికి మాత్రమే చిరంజీవితో వర్క్ చేసే అవకాశం దక్కింది... ముందు ముందు కూడా కొద్ది మందికి మాత్రమే ఆ అవకాశం దక్కనుంది.

సీనియర్ దర్శకుల కంటే కూడా ఆ కొత్త దర్శకులు, యంగ్ దర్శకులతో సినిమాలను చేసేందుకు చిరంజీవి ఆసక్తి చూపిస్తున్నాడు. అందులో భాగంగానే బాబీ, వశిష్ఠ వంటి యంగ్ దర్శకులతో సినిమాలను చేశాడు... చేయబోతున్నాడు. ప్రస్తుతం చేస్తున్న వశిష్ఠ మూవీ తర్వాత చిరంజీవి కచ్చితంగా కళ్యాణ్ కృష్ణ దర్శకత్వంలో సినిమాను చేసే అవకాశం ఉందనే ప్రచారం జరిగింది.

వశిష్ఠ దర్శకత్వంలో చేస్తున్న సినిమా ఇంకా ప్రారంభం అవ్వకుండానే తదుపరి సినిమా ను మారుతి దర్శకత్వంలో చిరంజీవి చేయబోతున్నాడు అంటూ ప్రచారం మొదలైంది. మారుతి దర్శకత్వం లో చిరంజీవి సినిమా అంటూ చాలా కాలం గా ప్రచారం జరుగుతోంది. ఆ మధ్య స్వయంగా ఒక వేదిక మీద చిరంజీవి మాట్లాడుతూ మారుతి తో సినిమా చేస్తాను అన్నట్లుగా గట్టిగానే చెప్పాడు.

ఆ తర్వాత కొన్ని కారణాల వల్ల ప్రాజెక్ట్‌ గురించి అసలు చర్చే లేదు. ఎట్టకేలకు మళ్లీ చిరంజీవి, మారుతి కాంబో మూవీ గురించిన చర్చలు మొదలు అయ్యాయి. ఇటీవలే చిరంజీవికి సరిగ్గా సెట్‌ అయ్యే ఒక మంచి కమర్షియల్‌ కథ ను మారుతి రెడీ చేశాడని, చిరంజీవి కూడా స్టోరీ లైన్ పై చాలా ఆసక్తిగా ఉన్నట్లుగా చెప్పుకొచ్చాడట.

ప్రస్తుతం మారుతి దర్శకత్వం లో ప్రభాస్ హీరోగా ఒక సినిమా రూపొందుతోంది. ఆ సినిమా షూటింగ్‌ ఎంత వరకు వచ్చింది అనే విషయం లో క్లారిటీ ఇవ్వడం లేదు. వచ్చే ఏడాది లో ఏ సమయంలో అయినా విడుదల అయ్యే అవకాశం ఉంది. కనుక 2024 లో చిరు తో మారుతి సినిమాను మొదలు పెట్టి 2025 లో ప్రేక్షకుల ముందుకు తీసుకు వచ్చే విధంగా ప్లాన్‌ చేస్తున్నట్లుగా వార్తలు వస్తున్నాయి. మొత్తానికి ప్రస్తుతం జరుగుతున్న ఈ చర్చ మెగా ఫ్యాన్స్ లో ఆసక్తిని రేకెత్తిస్తోంది.