క్రిస్మస్ క్లాష్.. విజేత ఎవరో మరి?

ఫెస్టివల్స్ వస్తున్నాయంటే చాలు.. వివిధ సినిమాలు థియేటర్లలో సందడి చేసేందుకు సిద్ధమైపోతున్నాయి. స్టార్ హీరోల నుంచి మీడియం, రేంజ్ హీరోల వరకు అంతా అప్పుడే తమ చిత్రాలతో ప్రేక్షకుల ముందుకు వచ్చేందుకు మొగ్గు చూపిస్తున్నారు. బాక్సాఫీస్ వద్ద పోటీ ఉన్నా.. అప్పుడే తాము నటించిన మూవీస్ ను రిలీజ్ చేయాలని చూస్తున్నారు.

సినిమా రిజల్ట్ ఎలా ఉన్నా.. మూవీ మంచి వసూళ్ల సాధించడం పక్కా.. ఈ ఈక్వేషన్ ను ఫాలో అయిపోతున్నారు హీరోలంతా. ఇప్పుడు క్రిస్మస్ పండుగ వచ్చేస్తున్న నేపథ్యంలో పలు సినిమాలు రిలీజ్ అయ్యేందుకు రెడీ అవుతున్నాయి. ఇప్పటికే కొన్ని ఫిక్స్ అవ్వగా.. ఇంకొన్ని ప్రాజెక్టుల అనౌన్స్మెంట్స్ త్వరలోనే రానున్నాయి. ఆ పూర్తి వివరాలు మీకోసం..

హీరో నితిన్.. రాబిన్ హుడ్ మూవీతో క్రిస్మస్ కానుకగా ప్రేక్షకుల ముందుకు రానున్న విషయం తెలిసిందే. డిసెంబర్ 20వ తేదీన మూవీ రిలీజ్ చేస్తామని మరోసారి మేకర్స్ ప్రకటించారు. ఎప్పటి నుంచో సరైన హిట్ కోసం వెయిట్ చేస్తున్న నితిన్.. రాబిన్ హుడ్ పై గట్టి నమ్మకం పెట్టుకున్నారు. వెంకీ కుడుముల దర్శకత్వం వహిస్తుండగా శ్రీలీల హీరోయిన్ గా నటిస్తున్నారు.

ఆ తర్వాత అల్లరి నరేష్.. ఇటీవల క్రిస్మస్ రేసులో దిగారు. బచ్చల మల్లితో 20వ తేదీన సందడి చేయనున్నారు. విలేజ్ డ్రామాగా సుబ్బు దర్శకత్వం వహిస్తున్న ఆ సినిమాపై ఇప్పటికే ఆడియన్స్ లో భారీ అంచనాలు నెలకొన్నాయి. నరేష్ లుక్స్.. ఊరమాస్ అన్నట్లుగా కనిపిస్తుండడంతో ఫుల్ హోప్స్ ఉన్నాయి. అదే రోజున నటుడు ప్రియదర్శి కూడా రానున్నారు.

మోహనకృష్ణ ఇంద్రగంటి దర్శకత్వం వహిస్తున్న సారంగపాణి జాతకం మూవీతో తన లుక్ ను టెస్ట్ చేసుకోనున్నారు. బెల్లంకొండ శ్రీనివాస్‌, నారా రోహిత్‌, మంచు మనోజ్‌ తొలిసారిగా కలిసి నటిస్తున్న భైరవం చిత్రం.. కూడా క్రిస్మస్ స్పెషల్ గా రిలీజ్ కానున్నట్లు తెలుస్తోంది. ఇప్పటికే మేకర్స్ రిలీజ్ చేసిన హీరోల లుక్స్ క్రేజీ రెస్పాన్స్ అందుకున్నాయి.

మరోవైపు, కోలీవుడ్ స్టార్ హీరో విజయ్ సేతుపతి విడుతలై-2 మూవీ క్రిస్మస్ రేసులో ఉంది. డిసెంబర్ 20వ తేదీన ప్రేక్షకుల ముందుకు రానుంది. తమిళంతోపాటు తెలుగులో కూడా గ్రాండ్ గా విడుదల కానుంది. దీంతో క్రిస్మస్ రేసులో మొత్తం ఐదు సినిమాలు ఉన్నట్లన్న మాట. మరి వాటిలో ఏది బాక్సాఫీస్ వద్ద విజేతగా నిలుస్తుందో వేచి చూడాలి .