₹900 కోట్లు వసూలు చేసినా ₹30—40 కోట్లు లాస్ అయ్యారా?

సెన్సేషనల్ డైరెక్టర్ సందీప్ రెడ్డి వంగా తెరకెక్కించిన హిందీ మూవీ ''యానిమల్''. బాలీవుడ్ హీరో రణబీర్ కపూర్ ప్రధాన పాత్రలో నటించిన ఈ సినిమా.. గతేడాది డిసెంబర్ మొదటి వారంలో ప్రేక్షకుల ముందుకు వచ్చింది. ఇది వరల్డ్ వైడ్ గా రూ. 900 కోట్లకి పైగా కలెక్షన్లు రాబట్టి, బాక్సాఫీస్ దగ్గర బిగ్గెస్ట్ బ్లాక్ బస్టర్ గా నిలిచింది. అయినప్పటికీ ఈ సినిమాకి తాము రూ. 30 - 40 కోట్లు కోల్పోయినట్లుగా చిత్ర నిర్మాత ప్రణయ్ రెడ్డి వంగా చెబుతున్నారు.

సందీప్ రెడ్డి సోదరుడు ప్రణయ్ రెడ్డి 'యానిమల్' సినిమా నిర్మాణంలో భాగస్వామిగా ఉన్న సంగతి తెలిసిందే. ఆయన తాజాగా ఓ ఇంటర్వ్యూలో మూవీ కలెక్షన్స్ గురించి మాట్లాడారు. డిస్ట్రిబ్యూటర్స్ చెప్పిన లెక్కల ప్రకారం అయితే ఫస్ట్ వీక్ లో ఆల్మోస్ట్ 30 - 40 కోట్లు లాస్ అయ్యామని.. ఎందుకంటే మాకు సరిపడా థియేటర్లు లేవని తెలిపారు. సినిమా నాన్ హాలీడేకి రిలీజ్ అవ్వడం, లాంగ్ వీకెండ్ కూడా ఏమీ లేకపోవడం మొదటి వారంలో వసూళ్ళు తగ్గడానికి కారణమని చెప్పారు.

'యానిమల్' A రేటెడ్ సినిమా కావడం, 3 గంటల 21 నిమిషాల రన్ టైం ఉండటం, అదే టైంలో రిలీజైన 'సామ్ బహదూర్' మూవీతో కొన్ని స్క్రీన్లు షేర్ చేసుకోవాల్సి రావడం.. ఇలాంటి విషయాలు కలెక్షన్లు తగ్గడానికి కారణమని ప్రణయ్ రెడ్డి విశ్లేషించారు. జనాలు సినిమా చూడటానికి ఆసక్తిగా ఉన్నా తగినన్ని థియేటర్లలో రిలీజ్ చేయలేకపోయామని, అందుకే బాక్సాఫీస్ వద్ద కొంత పోయిందని అన్నారు. సినిమా నిడివి కాస్త తగ్గించి ఉంటే బాగుండేదని నిర్మాత అభిప్రాయ పడ్డారు.

ఇలా అవుతుందని ముందే ఆలోచించామని, కానీ దానికి ఏం చేయలేమని, 3 గంటలకు పైగా కథ చెప్పాలనేది సందీప్ ఛాయిస్ అని, ప్రేక్షకులు సినిమా అంతా చూడాలని అతను భావించారని ప్రణయ్ రెడ్డి తెలిపారు. సినిమా లెన్త్ విషయంలో ఎవరూ పెద్దగా కంప్లెయింట్ చేయలేదని, కొందరు మాత్రం సెకండ్ హాఫ్ నిడివి విషయంలో కంప్లెయింట్ చేశారని నిర్మాత అన్నారు. అయితే ఇది క్యారక్టర్ డ్రివెన్ సినిమా కాబట్టి అలానే ఉంటుందన్నారు. బాబీ డియోల్ పాత్రను పూర్తిగా ఎలివేట్ చేయడానికి రణవీర్ క్యారక్టర్ ను డౌన్ చేయాల్సి వచ్చిందని చెప్పారు.

'యానిమల్' మోస్ట్ వయలెంట్ పవర్‌ ఫుల్‌ గ్యాంగ్‌ స్టర్‌ డ్రామా. ఇందులో రణబీర్ కపూర్ భార్యగా రష్మిక మందన్న నటించగా.. అనిల్ కపూర్, బాబీ డియోల్, త్రిప్తి డిమ్రీ, శక్తి కపూర్, పృథ్వీరాజ్, సౌరభ్ సచ్‌దేవా, ఉపేంద్ర లిమాయే, మాగంటి శ్రీనాథ్ కీలక పాత్రలు పోషించారు. హర్షవర్ధన్ రామేశ్వర్ బ్యాక్‌గ్రౌండ్ స్కోర్ కంపోజ్ చేసిన ఈ చిత్రాన్ని.. టి-సిరీస్ & భద్రకాళి పిక్చర్స్ బ్యానర్స్ పై భూషణ్ కుమార్, క్రిషన్ కుమార్, ప్రణయ్ రెడ్డి వంగా సంయుక్తంగా నిర్మించారు.

'యానిమల్' మూవీ ప్రపంచవ్యాప్తంగా ₹917 కోట్లు వసూలు చేసినట్లుగా అంచనా వేయబడింది. ఇది అత్యధిక వసూళ్లు సాధించిన ఐదవ హిందీ చిత్రంగా, హయ్యెస్ట్ కలెక్షన్స్ రాబట్టిన A- రేటెడ్ ఇండియన్ మూవీగా, రణబీర్ కపూర్ కెరీర్‌లో అత్యధిక వసూళ్లు అందుకున్న చిత్రంగా, 2023లో అత్యధిక కలెక్షన్లు చేసిన మూడవ భారతీయ చిత్రంగా నిలిచింది. ఇక ఈ మూవీకి సీక్వెల్ గా 'యానిమల్ పార్క్' ను రూపొందించనున్నట్లు మేకర్స్ క్లారిటీ ఇచ్చారు. సందీప్ 'స్పిరిట్' చిత్రాన్ని పూర్తి చేసిన ఆరు నెలలకు హిందీ సినిమా సీక్వెల్ పనులు ప్రారంభం అవుతాయని తెలిపారు.