'స్పిరిట్' మూవీలో డాన్ లీ.. ఇన్‌స్టా స్టోరీతో క్లారిటీ!

రెబల్ స్టార్ ప్రభాస్, సెన్సేషనల్ డైరెక్టర్ సందీప్ రెడ్డి వంగా కాంబినేషన్ లో ''స్పిరిట్'' అనే సినిమా తెరకెక్కనున్న సంగతి తెలిసిందే. భారీ స్థాయిలో ప్లాన్ చేసుకున్న ఈ చిత్రంలో పాపులర్ స్టార్స్ నటించనున్నట్లు తెలుస్తోంది. ఇందులో భాగంగా సౌత్ కొరియన్ యాక్టర్ డాన్ లీ నటిస్తారని చాలా రోజులుగా వార్తలు ప్రచారంలో ఉన్నాయి. అయితే ఇప్పుడు డాన్ లీ ఇన్స్టాగ్రామ్ స్టోరీ చూస్తుంటే, ఇదంతా నిజమేనేమో అనిపిస్తోంది.

డాన్ లీ తాజాగా తన ఇన్‌స్టాగ్రామ్ స్టోరీలో 'సలార్' సినిమా పోస్టర్ ను షేర్ చేశారు. ఇందులో ప్రభాస్ పిడికిలి బిగించి ఉండగా.. దానికి దక్షిణ కొరియా నటుడు థంబ్స్ అప్ ఎమోజీని యాడ్ చేసాడు. దేనికైనా ఆమోదాన్ని తెలపడానికి ఈ ఎమోజీని ఉపయోగిస్తుంటారు. ఇప్పుడు ప్రభాస్ ఫోటో షేర్ చేయడంతో, 'స్పిరిట్' మూవీలో నటించడానికి డాన్ లీ గ్రీన్ సిగ్నల్ ఇచ్చాడేమో అనే సందేహాలు వ్యక్తం అవుతున్నాయి.

'స్పిరిట్' చిత్రాన్ని తెలుగు, తమిళం, మలయాళం, హిందీ, కన్నడ భాషలతో పాటుగా.. మాండరిన్, జపనీస్, కొరియన్ వంటి ఫారిన్ లాంగ్వేజెస్ లలో రిలీజ్ చేస్తామని అనౌన్స్ మెంట్ తోనే మేకర్స్ క్లారిటీ ఇచ్చారు. దీన్ని బట్టి ఈ సినిమాలో పలువురు ఇంటర్నేషనల్ యాక్టర్స్ కూడా భాగం అవుతారని భావించవచ్చు. ప్రభాస్ - డాన్ లీ క్రేజీ కాంబినేషన్ కుదిరే అవకాశం ఉందని సౌత్ కొరియన్ నటుడి ఇన్స్టా స్టోరీతో స్పష్టం అవుతోంది.

డాన్ లీ అసలు పేరు లీ డాంగ్-సియోక్. అతన్ని మా డాంగ్-సియోక్ అని కూడా పిలుస్తారు. 53 ఏళ్ల ఈ స్టార్ దక్షిణ కొరియా నటుడు.. 15 ఏళ్ల కెరీర్‌లో సుమారు 50కి పైగా చిత్రాలలో నటించారు. 'ట్రైన్ టు బుసాన్', 'డిరైల్డ్', 'ది బ్రదర్స్', 'ది అవుట్‌లాస్', 'అన్‌స్టాపబుల్', 'ఛాంపియన్', 'ది గ్యాంగ్‌స్టర్', 'ది కాప్', 'ది డెవిల్', 'ది బ్యాడ్ గైస్: రీన్ ఆఫ్ ఖోస్' 'ది రౌండప్' వంటి చిత్రాలు డాన్ లీకి మంచి గుర్తింపు తెచ్చిపెట్టాయి. 'ఎటర్నల్స్'లో నటించటం ద్వారా మార్వెల్ సూపర్ హీరో సినిమాల్లో ప్రధాన పాత్ర పోషించిన మొదటి కొరియన్ యాక్టర్ గా నిలిచారు.

పవర్ ఫుల్ యాక్షన్ రోల్స్ కు ప్రసిద్ధి చెందిన లీ డాంగ్-సియోక్.. ఇప్పుడు "స్పిరిట్" మూవీలో ప్రభాస్ ను ఢీ కొట్టే విలన్ పాత్రలో కనిపిస్తారని టాక్ నడుస్తోంది. ఇది నిజమే అనే విధంగా డాన్ లీ సోషల్ మీడియాలో పోస్టులు పెడుతున్నారు. ఏం విశేషం లేకుండా తెలుగు హీరో ఫోటో షేర్ చెయ్యరు కాబట్టి, డాన్ లీ ఇండియన్ స్క్రీన్ ఎంట్రీ కన్ఫర్మ్ చేసుకోవచ్చని ఫ్యాన్స్ అంటున్నారు. ఒకవేళ నిజంగానే డైనోసార్ Vs డాన్ లీ పోటీ పడితే మాత్రం, పాన్-ఆసియన్ బాక్సాఫీస్ షేక్ అవ్వడం ఖాయమని సినీ అభిమానులు భావిస్తున్నారు. త్వరలోనే దీనికి సంబంధించిన అధికారిక ప్రకటన వస్తుందేమో చూడాలి. కాకపోతే ఆయన పోస్ట్ చేసింది 'సలార్' పోస్టర్ కావడంతో, పార్ట్-2లో కనిపిస్తారేమో అనే కొందరు ఫ్యాన్స్ కామెంట్స్ చేస్తున్నారు. మరి త్వరలోనే దీనిపై అధికారిక ప్రకటన వస్తుందేమో చూడాలి.