డబుల్‌ ఇస్మార్ట్‌ అక్కడ బ్లాక్‌బస్టర్‌

రామ్‌ హీరోగా పూరి జగన్నాధ్‌ దర్శకత్వంలో రూపొంది గత ఏడాది ఆగస్టు 15న ప్రేక్షకుల ముందుకు వచ్చిన డబుల్ ఇస్మార్ట్‌ సినిమా డిజాస్టర్‌గా నిలిచింది. అంతకు ముందు వచ్చిన ఇస్మార్ట్‌ శంకర్‌ సినిమా సూపర్‌ హిట్‌ కావడంతో డబుల్‌ ఇస్మార్ట్‌ సినిమాపై అంచనాలు భారీగా పెరిగాయి. భారీ అంచనాల నడుమ రూపొంది ప్రేక్షకుల ముందుకు వచ్చిన డబుల్‌ ఇస్మార్ట్‌ తీవ్రంగా నిరాశ పరచింది. ఈ సినిమాలోనూ బాలీవుడ్‌ స్టార్‌ సంజయ్‌ దత్‌ నటించినప్పటికీ ప్రేక్షకుల నుంచి ఆధరణ సొంతం చేసుకోలేక పోయింది. ఇస్మార్ట్‌ శంకర్‌ని నచ్చిన ప్రేక్షకులు ఈ డబుల్‌ ఇస్మార్ట్‌ని తిరస్కరించి పూరికి షాక్‌ ఇచ్చారు.

తెలుగులో తీవ్రంగా నిరాశ పరచిన 'డబుల్ ఇస్మార్ట్‌' సినిమాను హిందీలో ఆర్‌కేడీ స్టూడియోస్‌ యూట్యూబ్‌ ఛానెల్‌ ద్వారా గత నెలలో ప్రేక్షకుల ముందుకు తీసుకు వచ్చారు. యూట్యూబ్‌ ద్వారా వచ్చిన 45 రోజుల్లోనే హిందీ డబుల్‌ ఇస్మార్ట్‌ మూవీకి ఏకంగా 100 మిలియన్‌ల వ్యూస్ దక్కాయి. తెలుగు సినిమాలకు నార్త్‌లో మంచి డిమాండ్‌ ఉంది. గతంలో చాలా తెలుగు సినిమాలు హిందీలో యూట్యూబ్‌ ద్వారా స్ట్రీమింగ్‌ అయ్యి మంచి విజయాన్ని సొంతం చేసుకున్నాయి. వందల మిలియన్‌ల వ్యూస్‌ను సొంతం చేసుకున్న తెలుగు సినిమాలు చాలానే ఉన్నాయి. కానీ డబుల్‌ ఇస్మార్ట్‌ చాలా స్పెషల్‌గా నిలిచింది.

యూట్యూబ్‌లో స్ట్రీమింగ్‌ అయిన కేవలం 45 రోజుల్లోనే ఏకంగా 100 మిలియన్‌ల వ్యూస్‌ను సొంతం చేసుకోవడం మాత్రమే కాకుండా 1 మిలియన్‌ లైక్స్‌ను సైతం దక్కించుకుంది. సినిమా గురించి దాదాపు 27 వేల మంది కామెంట్స్ రూపంలో తమ అభిప్రాయంను షేర్‌ చేశారు. ఒక తెలుగు సినిమా హిందీ డబ్బింగ్‌ వర్షన్‌కు తక్కువ సమయంలో ఈ స్థాయిలో స్పందన దక్కడం అనేది అరుదుగా చూస్తూ ఉంటాం. పూరి జగన్నాధ్‌ దర్శకత్వంలో రూపొందడంతో పాటు సంజయ్ దత్‌ ఈ సినిమాలో కీలక పాత్రలో నటించడం వల్ల హిందీ ప్రేక్షకులు ఈ సినిమాపై ఆసక్తి కనబర్చారు.

రామ్‌ ప్రస్తుతం మహేష్‌ బాబు పి దర్శకత్వంలో ఒక సినిమాను చేస్తున్నాడు. గత ఏడాదిలో షూటింగ్‌ ప్రారంభం అయిన ఈ సినిమాను ఈ ఏడాది ద్వితీయార్థంలో ప్రేక్షకుల ముందుకు తీసుకు వస్తామని మేకర్స్ చెబుతున్నారు. భాగ్యశ్రీ బోర్స్‌ హీరోయిన్‌గా నటిస్తున్న ఈ సినిమాలో రామ్‌ పక్కింటి కుర్రాడు అన్నట్లు సింపుల్‌ లుక్‌లో కనిపించబోతున్నాడని వార్తలు వస్తున్నాయి. త్వరలోనే సినిమా టైటిల్‌ను ప్రకటించే అవకాశాలు ఉన్నాయి. డబుల్‌ ఇస్మార్ట్‌ సినిమాతో హిందీలో ఆకట్టుకున్న రామ్‌ తన కొత్త సినిమాతోనూ అక్కడ మెప్పిస్తాడేమో చూడాలి.