హాలీవుడ్‌లో రీమేక్ అయిన భార‌తీయ సినిమాలు

హాలీవుడ్ చిత్రాల స్ఫూర్తితో ప్ర‌పంచ‌వ్యాప్తంగా ప్రాంతీయ భాషా చిత్రాలెన్నో తెర‌కెక్కాయి. ముఖ్యంగా భార‌త‌దేశంలో చాలా బ్లాక్ బ‌స్ట‌ర్ల‌కు హాలీవుడ్ సినిమాల స్ఫూర్తి ఉంది. ముఖ్యంగా హిందీ ప‌రిశ్ర‌మ‌లో ఇలాంటి ఎన్నో సినిమాలు వ‌చ్చాయి. హృతిక్ రోషన్ `బ్యాంగ్ బ్యాంగ్` టామ్ క్రూజ్-నటించిన `నైట్ అండ్ డే` రీమేక్. అమీర్ ఖాన్ `లాల్ సింగ్ చద్దా` ఫారెస్ట్ గంప్ కి అధికారిక రీమేక్. సల్మాన్ ఖాన్ `భరత్` కూడా కొరియన్ మూవీ `ఓడ్ టు మై ఫాదర్`కి రీమేక్. బాలీవుడ్ లో అన్నీ పొరుగు సినిమాల రీమేక్ లేనా? అని విమ‌ర్శ‌లు ఎదుర‌వుతున్న క్ర‌మంలో కొన్ని హిందీ సినిమాలు హాలీవుడ్‌లో రీమేక్ అయ్యాయ‌న్న‌ది కొంద‌రికే తెలిసిన నిజం. పంచవ్యాప్తంగా ప్రేక్షకుల హృదయాలను గెలుచుకున్న అలాంటి 5 బాలీవుడ్ సినిమాల జాబితాను ప‌రిశీలిస్తే..

వెడ్నెస్ డే (2008) - ఎ కామ‌న్ మ్యాన్ (2013)

ఆరంభం నుంచి చివరి సన్నివేశం వరకు ప్రేక్షకులను కట్టిపడేసే థ్రిల్లర్‌లలో `వెడ్నెస్ డే` ఒకటి. నసీరుద్దీన్ షా-నటించిన ఈ సినిమా గ్రిప్పింగ్ స్టోరీలైన్ సస్పెన్స్ బిల్డప్ స‌న్నివేశాల‌తో కుర్చీ అంచుపై ఉంచుతుంది. స‌మీక్ష‌కులు వీక్షకుల నుండి ప్రశంసలు పొందిన చిత్ర‌మిది. 2013లో ఈ చిత్రం హాలీవుడ్‌లో `ఎ కామన్ మ్యాన్` పేరుతో రీమేక్ అయింది. దీనికి చంద్రన్ ఋత్నం దర్శకత్వం వహించారు. ఇది మాడ్రిడ్ ఇంటర్నేషనల్ ఫిల్మ్ ఫెస్టివల్‌లో ఉత్తమ దర్శకుడు ..ఉత్తమ నటుడు సహా అనేక అవార్డులను కూడా గెలుచుకుంది.

విక్కీ డోనర్ (2012) - డెలివరీ మ్యాన్ (2013)

ఆయుష్మాన్ ఖురానా -యామీ గౌతమ్ ప్ర‌ధాన పాత్ర‌ల్లో న‌టించిన `విక్కీ డోనర్` విమ‌ర్శ‌కుల ప్ర‌శంస‌ల‌తో పాటు ప్రేక్షకుల ఆద‌ర‌ణ ద‌క్కించుకుంది. బోల్డ్ కంటెంట్ ప్రత్యేకమైన కథాంశం ఈ సినిమాలో ఉంది. ఇంగ్లీష్ వెర్ష‌న్ `డెలివరీ మ్యాన్‌`లో విన్స్ వాన్, క్రిస్ ప్రాట్, కోబీ స్మల్డర్స్ నటించారు. ఆంగ్ల‌ సినిమాకు మిశ్రమ సమీక్షలు వచ్చాయి.

జబ్ వి మెట్ (2007) - లీప్ ఇయర్ (2010)

ఇంతియాజ్ అలీ రూపొందించిన అత్యంత ప్రజాదరణ పొందిన సినిమాల్లో ఒకటి `జబ్ వి మెట్`. ఇందులో షాహిద్ కపూర్ -కరీనా కపూర్ ఖాన్ ప్రధాన పాత్రలు పోషించారు. ఒక అద్భుత‌మైన‌ ప్రేమకథా చిత్రంగా కల్ట్ కేట‌గిరీలో వ‌చ్చిన‌ సినిమా ఇది. 2010లో `లీప్ ఇయర్‌` టైటిల్ తో హాలీవుడ్‌లో రీమేకైంది. లీప్ ఇయర్‌కు ఆనంద్ టక్కర్ దర్శకత్వం వహించారు. అమీ ఆడమ్స్, మాథ్యూ గూడె మరియు ఆడమ్ స్కాట్ నటించారు.

డర్ (1993) - ఫియ‌ర్ (1996)

షారుఖ్ ఖాన్, సన్నీ డియోల్,యు జుహీ చావ్లా నటించిన `డర్` చిత్రం 1993లో విడుదలై బాక్సాఫీస్ వద్ద విజయం సాధించింది. ఈ చిత్రంలో షారుఖ్ ఖాన్ విల‌న్ పాత్రలో క‌నిపించారు. హాలీవుడ్ లోను రీమేకై విజ‌యం సాధించింది. 1996లో `ఫియర్` పేరుతో రూపొందిన ఈ చిత్రానికి జేమ్స్ ఫోలే దర్శకత్వం వహించారు. ఫియర్‌లో మార్క్ వాల్‌బర్గ్, రీస్ విథర్‌స్పూన్, విలియం పీటర్‌సన్ నటించారు.

రంగీలా (1995) - విన్ ఎ డేట్ విత్ టాడ్ హామిల్టన్ (2004)

రామ్ గోపాల్ వర్మ దర్శకత్వం వహించిన `రంగీలా` చిత్రంలో ఊర్మిళ మటోండ్కర్, అమీర్ ఖాన్, జాకీ ష్రాఫ్ ప్రధాన పాత్రలు పోషించారు. గ్రిప్పింగ్ స్టోరి యాక్ష‌న్ తో పాటు ఈ చిత్రం లోని పాటలు ప్రేక్షకులను ఉర్రూత‌లూగించాయి. విన్ ఎ డేట్ విత్ టాడ్ హామిల్టన్ పేరుతో హాలీవుడ్ లో తెర‌కెక్కింది. `రంగీలా`కు సీన్ టు సీన్ రీమేక్ గా రూపొందించారు. ఆంగ్ల రీమేక్‌కు విక్టర్ లెవిన్ దర్శకత్వం వహించారు. కేట్ బోస్‌వర్త్, టోఫర్ గ్రేస్, జోష్ డుహామెల్ నటించారు.