మత వివాదంతో న‌ట‌వార‌సుడికి ఆదిలోనే హంస‌పాదు
భార‌త‌దేశంలోని అతి పెద్ద స్టార్ కుమారుడు ఇప్పుడు ఊహించ‌ని చిక్కుల్లో ప‌డ్డాడు.
భార‌త‌దేశంలోని అతి పెద్ద స్టార్ కుమారుడు ఇప్పుడు ఊహించ‌ని చిక్కుల్లో ప‌డ్డాడు. అతడు హీరోగా నటించిన మొద‌టి సినిమా రిలీజ్ చిక్కుల్లో ప‌డింది. న‌ట‌వార‌సుడి సినిమాలో కంటెంట్ అభ్యంత‌ర‌క‌రంగా ఉంద‌ని హైకోర్టు నిషేధం విధించింది. అత‌డికి ఆదిలోనే హంస‌పాదు ఎదురైంది. ఈ ఎపిసోడ్ లో అతి పెద్ద స్టార్ మ‌రెవ‌రో కాదు..బాలీవుడ్ మిస్ట‌ర్ ప‌ర్ఫెక్ట్ అమీర్ ఖాన్. అత‌డి కుమారుడు (మొద‌టి భార్య పుత్రుడు) జునైద్ ఖాన్ నటించిన మ‌హారాజాపై కోర్టు నిషేధం విధించింది. పూర్తి వివ‌రాల్లోకి వెలితే..
మిస్ట‌ర్ ప‌ర్ఫెక్ట్ అమీర్ ఖాన్ ఇటీవ‌ల తాను న‌టించే సినిమాల కంటే తన కుమారుడు జునైద్ ఖాన్ ప్రధాన పాత్రలో నటించిన `మ‌హారాజా` విజ‌యం గురించి బ‌హుశా ఎక్కువ‌గా ఆలోచిస్తున్నాడు. కానీ మహారాజ్ విడుద‌ల‌పై గుజరాత్ హైకోర్టు నిషేధం విధించింది. పుష్టిమార్గ్ అనే మతపరమైన సంస్థ సినిమా కంటెంట్‌పై అభ్యంతరాలు వ్యక్తం చేస్తూ దావా వేసింది. పుష్టిమార్గ్‌లోని ఎనిమిది మంది సభ్యుల కమిటీ వాదించిన 1862 నాటి ప్రసిద్ధ మహారాజ్ లిబెల్ కేసు ఆధారంగా ఈ చిత్రం రూపొందింది. సినిమా హింసను ప్రేరేపిస్తుంద‌ని శాంతిభద్రతలకు విఘాతం కలిగిస్తుందని వారు వాదించారు. ఈ సినిమాలో హిందూ దేవుళ్లపై తీవ్ర వ్యాఖ్యలు చేశారన్నారు. దీంతో మహరాజ్ విడుదలను గుజరాత్ హైకోర్టు ప్రస్తుతానికి నిలిపివేసింది.
అయితే నెట్ ఫ్లిక్స్ లో ఈ సినిమా అందుబాటులో ఉండ‌నుంది. గుజరాత్ లో వీక్ష‌ణ బ్యాన్ వ‌ల్ల చిన్నపాటి ఆర్థిక నష్టాన్ని కలిగిస్తుందని నెట్ ఫ్లిక్స్ భావిస్తోంది. గుజరాత్ హైకోర్టు నెట్‌ఫ్లిక్స్, ఇతర పార్టీలకు నోటీసులు జారీ చేసింది. తదుపరి విచారణ జూన్ 18వ తేదీన జరగనుంది.
ప్ర‌స్తుతం బాన్ మహారాజ్ హ్యాష్‌ట్యాగ్‌లు, బ్యాన్ నెట్ ఫ్లిక్స్ ట్యాగ్ లు సోషల్ మీడియాల్లో వైర‌ల్ గా మారాయి. పుష్టిమార్గ్ అనే మత శాఖకు చెందిన సభ్యులు లేవనెత్తిన అభ్యంతరాల ఆధారంగా ఈ ఉత్తర్వు జారీ అయింది. నిజానికి ఈ చిత్రాన్ని శుక్రవారం (జూన్ 14) విడుదల చేయాలనుకున్నారు. మహారాజ్ పై నిషేధం విధించాలని కొంద‌రు నెటిజ‌నులు బాయికాట్ నెట్‌ఫ్లిక్స్ , బాన్ మహారాజ్ ఫిల్మ్ వంటి అనేక హ్యాష్‌ట్యాగ్‌లు గురువారం (జూన్ 14) సోషల్ మీడియాలో ట్రెండింగ్‌లో ఉన్నాయి.
సనాతన్ ధర్మం (సనాతన్ ధర్మం కా అప్మాన్ సెహెన్ నహిం కరేంగే) పట్ల అగౌరవాన్ని సహించను. మహారాజ్ ఫిల్మ్‌ని నిషేధించండి. #BoycottNetflix అని ప్రాచీ మైక్రోబ్లాగింగ్ సైట్‌లో రాశారు. నెట్‌ఫ్లిక్స్ గత నెలలో విడుదల చేసిన పత్రికా ప్రకటన ప్రకారం.. మహారాజ్ అనేది జర్నలిస్ట్ కం సంఘ సంస్కర్త కర్సందాస్ ముల్జీ బ‌యోపిక్ అని కూడా తెలుస్తోంది. అతడు మహిళల హక్కులు, సామాజిక సంస్కరణలకు మార్గదర్శక న్యాయవాది. ముంబయిలోని ఎల్ఫిన్‌స్టోన్ కళాశాలలో విద్యార్థి.. పండితుడు-నాయకుడు దాదాభాయ్ నౌరోజీ శిష్యుడు, ముల్జీ వితంతు పునర్వివాహంపై వాదించారు. అణగారిన వారికి అండగా నిలిచారు. సమాజంలో సంస్కరణల విత్తనాలను నాటారు.
హిందూ సాధువులను సినిమా పేరుతో అవమానించడం ఎప్పటి వరకు కొనసాగుతుందని మరో X వినియోగదారు అడిగారు. బ్రిటీష్ పాలనలో జరిగిన ఒక సంఘటన ఉటంకిస్తూ సాధువులు, వల్లభ సంప్రదాయం గురించి తప్పుడు ఇమేజ్‌ని సృష్టిస్తున్న హిందూమత వ్య‌తిరేక సినిమా ద్వారా అమీర్ తన కుమారుడిని లాంచ్ చేస్తున్నాడని మరొకరు ఆరోపించారు.
ఇటువంటి కంటెంట్ సనాతన ధర్మం నుండి హిందూ యువతను దూరం చేయగలదు అని ఒకరు రాసారు. హిందూయేత‌ర వర్గాలపై సినిమాలు చేయడానికి వారు ధైర్యం చేయగలరా? వారికి పరిణామాలు తెలుసు. హిందువులు ఇంకా ఘాఢ నిద్రలో ఉన్నారు అని ఒక నెటిజ‌న్ రాశారు. X వినియోగదారులలో ఒకరు హిందూ మతం, ఇస్లాం మీద సినిమాల విషయంలో ద్వంద్వ ప్రమాణాలను ఎత్తి చూపారు.
మల్హోత్రా పి. సిద్ధార్థ్ ఈ చిత్రానికి ద‌ర్శ‌క‌త్వం వ‌హించారు. ఇందులో జునైద్ ఖాన్, జైదీప్ అహ్లావత్, షాలిని పాండే ప్రధాన పాత్రల్లో నటించారు. YRF ఎంటర్‌టైన్‌మెంట్ ప‌తాకంపై ఆదిత్య చోప్రా నిర్మించారు. అసాధారణ రీతిలో, ఎలాంటి ప్రమోషన్లు లేకుండానే ఈ సినిమా నెట్‌ఫ్లిక్స్‌లో ఇది విడుదలవుతోంది. జైదీప్ -జునైద్ ఉన్న పోస్టర్ మినహా ఈ చిత్రానికి సంబంధించిన టీజర్ లేదా ట్రైలర్‌లను మేకర్స్ విడుదల చేయక‌పోవ‌డం సందేహాల్ని లేవ‌నెత్తింది.