ఈ సీనియ‌ర్ హీరోలిద్ద‌రూ పాన్ వ‌ర‌ల్డ్ మూవీ?

`పాన్ ఇండియా` రొటీన్ అయిపోయింది. ఇటీవ‌ల‌ పాన్ వ‌ర‌ల్డ్ పై ఫోక‌స్ మ‌ళ్లింది. మ‌హేష్, ప్ర‌భాస్ స‌హా సౌతిండియా అగ్ర హీరోలంతా ఇదే కేట‌గిరీలో ఒక్కొక్క‌రుగా షిఫ్ట‌వుతున్నారు. అన్ని భాష‌ల్లోను సినిమా ఆడితేనే బంప‌ర్ క‌లెక్ష‌న్లు సాధ్య‌మ‌ని అంతా భావిస్తున్నారు. కార‌ణం ఏదైనా మ‌ల్టీస్టార‌ర్ల‌కు దీనివ‌ల్ల‌ కొత్త ఊపొచ్చింది.

తాజా స‌మాచారం మేర‌కు.. మోహ‌న్ లాల్- మ‌మ్ముట్టి ఓ భారీ ఎంటర్‌టైనర్ కోసం చేతులు కలిపార‌ని తెలిసింది. ఆ ఇద్ద‌రు స్టార్లు అసాధారణమైన ప్రదర్శనలతో న‌ట‌వృత్తిని సుసంపన్నం చేసారు. వీరిద్దరూ కలిసి అనేక హిట్ చిత్రాల‌కు పనిచేశారు. ఇప్పుడు తిరిగి కలిసి న‌టించ‌నున్నారు. లాల్ -మమ్ముట్టికి చెందిన‌ నిర్మాణ సంస్థలు ఆశీర్వాద్ సినిమాస్ - మమ్ముట్టి కంపానీ సంయుక్తంగా ఈ చిత్రాన్ని నిర్మిస్తాయి. ఈ ప్రాజెక్ట్‌పై ఇంకా ఎక్కువ వివరాలు అందుబాటులో లేవు. లాల్, మ‌మ్ముట్టి పాత్ర‌లు ఎగ్జ‌యిట్ చేస్తాయ‌ని చెబుతున్నారు. సౌత్ సినిమా చరిత్రలో మోహన్‌లాల్- మమ్ముట్టి కలిసి పనిచేసిన వాటిలో ఎక్కువ విజ‌యాలు సాధించిన‌వే. వీటిలో అతిరాత్రం (1984), అనుబంధం (1985), వార్త (1986), ఆదిమకల్ ఉడమకల్ (1987), హరికృష్ణన్స్ (1998), ట్వంటీ:20 (2008) ఉన్నాయి.

క‌లిసి న‌టించ‌డ‌మే కాదు.. నిజానికి, మోహన్‌లాల్ - మమ్ముట్టి నిజంగా గొప్ప స్నేహితులు. ఇలాంటి పోటీ వాతావరణంలో 40 ఏళ్లుగా ఇద్దరు స్టార్లు బలమైన స్నేహాన్ని కొనసాగించడం నిజంగా ఆదర్శనీయం. 2023లో మమ్ముట్టి పుట్టినరోజు సందర్భంగా మోహన్‌లాల్ ప్రత్యేక వీడియో సందేశం అందించారు. మ‌మ్ముట్టిని లాల్ త‌న సోద‌రుడిగా చూస్తాన‌ని అన్నారు. మోహ‌న్ లాల్ మాట్లాడుతూ ``మేం 40 ఏళ్లుగా సోదరులం. స్నేహితులం. మాకు చాలా సినిమాల్లో స్క్రీన్ షేర్ చేసుకునే అవకాశం వచ్చింది. మేమిద్దరం కలిసి ఐదు సినిమాలు నిర్మించాం. సంతోషాలు, దుఃఖాలను ఎదుర్కొంటూ ఒకరి జీవితాల్లో ఒకరం భాగమయ్యాము. అతడు కేవలం ఒక్క ఫోన్ కాల్ దూరంలో ఉన్న సోదరుడు.. ఎల్లప్పుడూ నాకు అండగా నిలుస్తాడు. మా మధ్య ప్రగాఢమైన పరస్పర గౌరవం ఉంది.. అని తెలిపారు.

కెరీర్ మ్యాట‌ర్ కి వ‌స్తే.. మోహన్ లాల్ వ‌రుస చిత్రాల్లో న‌టిస్తున్నారు. ఇందులో బరోజ్, కన్నప్ప, L 2: ఎంపురాన్, రామ్, వృషభ ఉన్నాయి. మరోవైపు మమ్ముట్టి తదుపరి చిత్రం `బజూకా`లో కనిపించనున్నాడు.