నేను ఆ హీరో కంటే గొప్ప‌వాడిన‌ని నిరూపించాల్సిన ప‌ని లేదు!

బాలీవుడ్‌లో ప్ర‌ముఖ హీరో శ‌క్తిమాన్‌గా న‌టించి దేశ‌వ్యాప్తంగా ప్ర‌జ‌ల హృదయాల‌ను గెలుచుకున్నారు. ద‌శాబ్ధాలు గ‌డిచినా ఇప్ప‌టికీ శ‌క్తి మాన్ అంటే ఆయ‌న‌నే అభిమానులు త‌ల‌చుకుంటారు. ఆ పాత్ర‌ను జ‌నం అంత‌గా వోన్ చేసుకున్నారు. శ‌క్తిమాన్ గా ఆయ‌న‌ను త‌ప్ప ఇంకెవ‌రినీ ఊహించుకోలేరు. అయితే కొన్ని ద‌శాబ్ధాల క్రితం సంచ‌ల‌నం సృష్టించిన‌ అదే పాత్ర‌ను ఇప్ప‌టి ట్రెండ్ కి అడాప్ట్ చేసుకుని పాన్ ఇండియా హిట్టు కొట్టాల‌ని క‌ల‌లు గ‌న్న నేటిత‌రం యువ‌హీరో ఆశ‌ల‌కు గండి కొట్టాడు స‌ద‌రు హీరో. శ‌క్తిమాన్ పాత్ర‌లో న‌టించాల‌నుంద‌ని, నేరుగా వెట‌ర‌న్ స్టార్ ని క‌లిసిన యువ‌హీరోకి తీవ్రమైన నిరాశ ఎదురైంది. `శ‌క్తిమాన్` హ‌క్కుల‌ను ఇచ్చేందుకు స‌సేమిరా అన్నారు. త‌న‌ను క‌లిసిన‌ యువ‌హీరో ఎన‌ర్జీని, న‌ట‌న‌ను అభిమానిస్తాన‌ని చెప్పిన శ‌క్తిమాన్.. అత‌డు శ‌క్తిమాన్ పాత్ర‌కు స‌రిపోడ‌ని సూచించాడు. అత‌డి ప‌రివ‌ర్త‌న శ‌క్తిమాన్ పాత్ర‌కు స‌రిగ్గా అత‌క‌ద‌ని సూటిగా అత‌డికే చెప్పాడు. ర‌ణ‌వీర్ 2- 5 గంట‌ల పాటు త‌న‌తో స్పెండ్ చేసి, బ‌తిమాలాడ‌ని కానీ రిజెక్ట్ చేసాన‌ని కూడా తెలిపాడు.

ఈ ఎపిసోడ్ లో వెట‌ర‌న్ స్టార్ మ‌రెవ‌రో కాదు.. ముఖేష్ ఖ‌న్నా. త‌న‌ను క‌లిసి శ‌క్తిమాన్ పాత్ర‌పై హ‌క్కులు కావాల‌ని అడిగిన‌ది ర‌ణ‌వీర్ సింగ్. కానీ ఇద్ద‌రి మ‌ధ్యా డీల్ కుద‌ర‌లేదు. పరిశ్ర‌మ‌లో అగ్ర హీరోగా ఏల్తున్న త‌న‌ను వెట‌ర‌న్ స్టార్ ముఖేష్‌ అలా తీసిపారేయ‌డం నిజంగానే యంగ్ హీరో ర‌ణ‌వీర్ ఈగోని హ‌ర్ట్ చేసిందని హిందీ మీడియా క‌థ‌నాలు రాసింది. చివ‌రికి ఈ డీల్ ఫెయిలైనా కానీ... శ‌క్తిమాన్ తిరిగి వ‌స్తాడ‌ని, అయితే శ‌క్తిమాన్ పాత్ర‌లో ఎవ‌రు న‌టిస్తార‌న్న‌ది నేను ఇంకా చెప్ప‌లేన‌ని కూడా ముఖేష్ జీ ఇటీవ‌ల ప్ర‌క‌ట‌న‌లు గుప్పిస్తున్నారు.

అయితే నిన్న‌టిరోజున శ‌క్తిమాన్ రిట‌ర్న్స్ గురించి ముఖేష్ ఖ‌న్నా చేసిన ఓ ప్ర‌క‌ట‌న నెటిజ‌నుల్లో చ‌ర్చ‌గా మారింది. దీనిపై ముఖేష్‌ని ట్రోల్ చేస్తూ నెటిజ‌నులు ర‌క‌ర‌కాల కామెంట్లు చేసారు. దీనికి వివ‌ర‌ణ ఇచ్చేందుకు ముఖేష్ జీ ఇప్పుడు ఒక సుదీర్ఘ నోట్ ని రాసి సోష‌ల్ మీడియాల్లో షేర్ చేసారు.

ఈ నోట్‌లో మ‌రోసారి ర‌ణ‌వీర్‌ని టార్గెట్ చేస్తూ మాట్లాడార‌ని ప్ర‌జ‌లు అభిప్రాయ‌ప‌డుతున్నారు. ఇంత‌కీ ఆ నోట్ లో ఏం రాసారు? అంటే.. నేను రణ్‌వీర్ సింగ్ కంటే గొప్పవాడినని నిరూపించుకోవడానికి లేదా చూపించడానికి మీడియా ముందుకు రాలేదు అని అన్నారు. ప్రెస్ కాన్ఫరెన్స్ ద్వారా నేను తదుపరి శక్తిమాన్‌ని నేనే అని ప్రపంచానికి ప్రకటించడానికి వచ్చానని అపోహను సృష్టించ‌వ‌ద్ద‌ని స్పష్టం చేయడానికి వచ్చాను అని అన్నారు. మొదట నేను నెక్ట్స్ శక్తిమాన్ అని ఎందుకు చెప్పాలి? నేను లేకుండా మరొక శక్తిమాన్ ఉండలేడు ... రెండవది.. నేను రణవీర్ సింగ్ కంటే లేదా ఎవరికన్నా గొప్పవాడినని నిరూపించడానికి లేదా చూపించడానికి రాలేదు`` అని అన్నారు.

నేటి తరానికి సందేశాన్ని అందించడానికి నేను పెద్ద శక్తిమాన్‌గా వచ్చాను. ఎందుకంటే పాత శక్తిమాన్‌ ఇప్పటికే రెడీమేడ్ గా ఉన్నాడు కాబట్టి పాత శక్తిమాన్ కొత్తగా చూపించ‌బోయే శ‌క్తిమాన్ కంటే మెరుగైన స్థితిలో ఉంటాడని నేను భావించాను. గత 27 సంవత్సరాలుగా ప్రేక్షకులు అభిమానిస్తున్నారు. నేను పెద్ద శక్తిమాన్‌గా దేశభక్తి క్విజ్ పాటతో ఇప్పుడు మీ ముందుకు వచ్చాను. ఎందుకంటే నేటి పిల్లలపై చీకటి, చెడు దుష్ప్ర‌భావం బ‌లంగా ఉందని ప్రతి ఒక్కరికీ తెలుసు.. అని వ్యాఖ్యానించారు.

త్వరలో కొత్త శక్తిమాన్‌ని ప్రకటిస్తామని ఆయన తెలిపారు. అయితే అతడు ఎవరో చెప్ప‌లేను.. ఎందుకంటే నాకు ఎవ‌రో కూడా తెలియదు.. వేట ఇంకా కొనసాగుతోంది... అని కూడా ముఖేష్ జీ తెలిపారు.