నాని - రాజు - వేణు... కొత్త అప్డేట్‌

నేచురల్ స్టార్‌ నాని ఫలితాలతో సంబంధం లేకుండా బ్యాక్ టు బ్యాక్ సినిమాలు చేసుకుంటూ వెళ్తున్నాడు. మినిమం గ్యారెంటీ హీరోగా గుర్తింపు దక్కించుకున్న నాని తాజాగా హాయ్ నాన్న సినిమాతో కమర్షియల్‌ హిట్ ని సొంతం చేసుకున్నాడు. బాక్సాఫీస్ వద్ద నాని మరోసారి తన సత్తా చాటాడు.

ఒక వైపు హాయ్‌ నాన్న బాక్సాఫీస్ సందడి కొనసాగుతూనే ఉండగా మరో వైపు నాని తన తదుపరి సినిమాను వివేక్‌ ఆత్రేయ దర్శకత్వంలో చేస్తున్నాడు. ఇప్పటికే వీరిద్దరి కాంబోలో అంటే సుందరానికి.. అనే సినిమా వచ్చింది. ఆ సినిమా కమర్షియల్ గా ఆశించిన స్థాయిలో ఆడలేదు. ఇప్పుడు వీరి కాంబోలో సరిపోద శనివారం సినిమా రూపొందుతోంది.

ఒక వైపు సరిపోద శనివారం సినిమా షూటింగ్‌ లో పాల్గొంటూనే మరో సినిమాకు నాని ఓకే చెప్పాడు. ఆ సినిమాకు సంబంధించిన స్క్రిప్ట్‌ వర్క్‌ జరుగుతోంది. బలగం సినిమాతో దర్శకుడిగా మంచి పేరును దక్కించుకున్న వేణు యెల్దండ త్వరలో నానితో సినిమా కోసం స్క్రిప్ట్‌ రెడీ చేస్తున్నాడు.

దిల్ రాజు నిర్మించబోతున్న నాని, వేణు సినిమా స్క్రిప్ట్‌ వర్క్ మెల్లగా జరుగుతోంది. ఇప్పటికే ఈ సినిమా యొక్క మొదటి దశ కథా చర్చలు ప్రారంభం అయ్యాయి. వేణు చెప్పిన స్క్రిప్ట్‌ లో నాని మార్పులు చెప్పడం, త్వరలో ఆ మార్పులతో వేణు మళ్లీ నానిని కలవడం జరుగబోతుందట.

నాని మరియు వేణు కాంబో సినిమా కు సంబంధించిన స్క్రిప్ట్ వర్క్‌ జరుగుతుందని, సినిమా యొక్క షూటింగ్‌ ను 2024 సమ్మర్ లో ప్రారంభించి, ఇదే ఏడాదిలో విడుదల చేసే విధంగా ప్లాన్‌ చేస్తున్నట్లుగా దిల్‌ రాజు కాంపౌండ్‌ నుంచి సమాచారం అందుతోంది.