ఓర్మాక్స్ స‌ర్వే: పాపులారిటీలో ప్ర‌భాసే రారాజు

పాపుల‌ర్ ఓర్మాక్స్ స‌ర్వే 2023 రిపోర్ట్ వ‌చ్చేసింది. ఈసారి భార‌త‌దేశం నుంచి టాప్ 5లో ప్ర‌భాస్, టాప్ 10లో ఎన్టీఆర్-బ‌న్ని-మ‌హేష్ ఉన్నారు. కింగ్ ఆఫ్ రొమాన్స్ షారూఖ్ నంబ‌ర్ 1 స్థానాన్ని చేరుకున్నా కానీ ప్ర‌భాస్ త‌న అసాధార‌ణ స్టార్ డ‌మ్ ని నిల‌బెట్టుకుని టాప్ 5లో (నంబ‌ర్ 3) స్థానాన్ని నిల‌బెట్టుకున్నాడు. ఇక నంబ‌ర్ 2 స్థానాన్ని భారీ మాస్ ఫాలోయింగ్ ఉన్న ద‌ళ‌ప‌తి విజ‌య్ ద‌క్కించుకున్నాడు. ఇక టాప్ 10లో అల్లు అర్జున్, ఎన్టీఆర్, మ‌హేష్ పేర్లు నిలిచాయి.

తాజా స‌ర్వే కొన్ని ఆస‌క్తిక‌ర విష‌యాల‌ను ప్ర‌పంచానికి ఆవిష్క‌రించింది. ప్రపంచవ్యాప్తంగా అత్యంత ప్రజాదరణ పొందిన నటులలో షారూఖ్ ఖాన్ వెంటే త‌మిళం నుంచి విజ‌య్, తెలుగు నుంచి ప్ర‌భాస్ నిలిచార‌ని ప్ర‌క‌టించ‌డం చాలా స‌మీక‌ర‌ణాల‌ను రివీల్ చేస్తోంది. ఇత‌ర స్టార్ల సంగ‌తేమో కానీ, డార్లింగ్ ప్ర‌భాస్ ప్ర‌పంచ సినీయ‌వ‌నిక‌పై అంత‌కంత‌కు భారీ అభిమానుల సంఖ్యను పెంచుకుంటున్నాడ‌న‌డానికి ఈ స‌ర్వే ఒక‌ నిద‌ర్శ‌నం.

దశాబ్దాలుగా భారతీయ చలనచిత్ర పరిశ్రమను శాసించిన కింగ్ ఖాన్ కి ధీటుగా, త‌న‌కంటే చాలా చిన్న‌వాడైన ప్ర‌భాస్ పేరు వినిపిస్తోందంటే అత‌డి ఛ‌రిష్మా ఏ రేంజులో దూసుకెళుతోందో ఊహించాలి. అత్యంత ప్రజాదరణ పొందిన పురుష తారల జాబితాలో అగ్రస్థానంలో నిలిచిన కింగ్ ఖాన్ తాను ఎందుకు బెస్టో నిరూపించుకోగా, అత‌డితో పాటే టాలీవుడ్ నుంచి రారాజు ప్ర‌భాస్ ఉన్నాడ‌ని నిరూపించాడు.

ప‌ఠాన్- జ‌వాన్ చిత్రాల ఘ‌న‌విజ‌యంతో కింగ్ ఖాన్ గ్రాఫ్ అమాంతం పెరిగింది. లేదంటే ఇప్ప‌టికీ ప్ర‌భాస్ నంబ‌ర్ వ‌న్ స్థానంలో నిలిచేవాడేమో! ఇప్పుడు కొత్త ర్యాంకింగ్‌లో భారతదేశపు అత్యంత ప్రజాదరణ పొందిన స్టార్‌గా షారూఖ్ తన హోదాను ద‌క్కించుకోగా, జాబితాలో కండ‌ల హీరో స‌ల్మాన్ ఖాన్, ఖిలాడీ అక్ష‌య్ కుమార్ ని సైతం వెన‌క్కి నెట్టి ప్రభాస్ ముందుకు దూసుకొచ్చాడు.

Ormax మీడియా అనేది భారతదేశం త‌ర‌పున‌ ప్రత్యేక మీడియా కన్సల్టింగ్ సంస్థ, సెప్టెంబర్ 2023 నాటికి షారూఖ్ ఖాన్ అగ్రస్థానంలో నిలిచాడ‌ని, తరువాత విజయ్ ఆ తర్వాత ప్రభాస్ నిలిచార‌ని వెల్ల‌డించింది. ఈ జాబితాలో సల్మాన్ ఖాన్ ఐదో స్థానంలో ఉండగా, అక్షయ్ కుమార్ నాలుగో స్థానంలో ఉన్నారు. ఇదే జాబితాలో అజిత్ కుమార్, జూనియర్ ఎన్టీఆర్, అల్లు అర్జున్, సూర్య, మహేష్ బాబు కూడా టాప్ 10లో నిలిచారు.

ఇక షారుఖ్ ఖాన్ తదుపరి రాజ్‌కుమార్ హిరాణీ `డుంకీ`తో క్రిస్మ‌స్ రేసులోకి దూసుకొస్తుంటే , అత‌డితో నువ్వా నేనా? అంటూ ఢీకొట్టేందుకు ప్ర‌భాస్ స‌లార్ చిత్రంతో దూసుకొస్తున్నాడు. స‌లార్ 22 డిసెంబర్ 2023న విడుదల కానుంది.