ఆల్ టైమ్ రికార్డుల్లో దూసుకెళ్తున్న పుష్ప రాజ్.. టాప్ 5 లిస్ట్ ఇదే

పుష్ప 2 సక్సెస్ తో సౌత్ సినిమాల స్థాయి మరో లెవెల్ కు వెళ్లింది. టాక్ బాగుంటే స్టార్ హీరోల సినిమాలకు కలెక్షన్లు ఏ రేంజ్ లో ఉంటాయో బన్నీ ఋజువు చేశాడు. సుకుమార్ దర్శకత్వం వహించిన "పుష్ప 2: ది రూల్" సినిమా దేశ వ్యాప్తంగా ఓ సెన్సేషన్‌గా నిలిచింది. ఈ సినిమా కేవలం పాన్ ఇండియా స్థాయిలోనే కాకుండా అంతర్జాతీయ స్థాయిలో కూడా అద్భుత విజయాన్ని సాధించింది.

ఇప్పటి వరకు విడుదలైన అన్ని సినిమాలకు భిన్నంగా ఉన్న కథనంతో, అల్లు అర్జున్ పవర్‌ఫుల్ పెర్ఫార్మెన్స్‌తో పుష్ప 2 కలెక్షన్లలో ఊహించని రీతిలో దూసుకెళ్తోంది. విడుదలైన 22 రోజుల్లోనే ఈ చిత్రం ప్రపంచవ్యాప్తంగా రూ. 1700 కోట్ల గ్రాస్ వసూళ్లను సాధించి ఆల్ టైమ్ రికార్డుల్లో తన స్థానాన్ని సురక్షితం చేసుకుంది. పుష్ప 2 రికార్డు స్థాయి కలెక్షన్లు టాలీవుడ్‌కు గర్వకారణంగా నిలిచాయి.

ఇక నార్త్ ఇండియాలో కూడా పుష్ప 2 సృష్టించిన సునామీకి తోడు హిందీ బెల్ట్‌లో మొదటి వారమే రూ. 400 కోట్ల పైగా వసూళ్లు సాధించడం ఒక చరిత్ర. ఇప్పటికే లెక్క అక్కడ 700 కోట్లు దాటింది. ఇక నైజాం, సీడెడ్, ఆంధ్రా ప్రాంతాల్లోనూ ఈ చిత్రం భారీ వసూళ్లను నమోదు చేసి, స్థానిక మార్కెట్‌లో నయా ట్రెండ్ సెట్ చేసింది. ప్రస్తుతం ఆల్ టైమ్ అత్యధిక వసూళ్ల జాబితాలో పుష్ప 2 మూడో స్థానంలో నిలిచింది.

ఈ జాబితాలో మొదటి స్థానంలో అమీర్ ఖాన్ నటించిన "దంగల్" ఉంది, ఇది వరల్డ్ వైడ్ గా రూ. 2000 కోట్లకుపైగా వసూళ్లను సాధించింది. తరువాతి స్థానంలో "బాహుబలి 2: ది కన్‌క్లూజన్" ఉంది, ఇది రూ. 1810 కోట్ల వసూళ్లను అందుకుంది. కానీ పుష్ప 2 సునామీ కొనసాగుతుండడంతో బాహుబలి 2 రికార్డును కూడా త్వరలోనే పుష్ప 2 బ్రేక్ చేయగలదని ట్రేడ్ విశ్లేషకులు అంచనా వేస్తున్నారు.

అంతర్జాతీయంగా కూడా పుష్ప 2 పెద్దదైన మార్కెట్‌ను అందుకుంది. యుఎస్, ఆస్ట్రేలియా, యుకె వంటి దేశాల్లో ఈ చిత్రం భారీ వసూళ్లను సాధిస్తోంది. హిందీతో పాటు, తమిళ, మలయాళ, కన్నడ భాషల్లోనూ ఈ సినిమా సెన్సేషన్ క్రియేట్ చేయడం విశేషం. డీవీడీ, ఓటిటి హక్కుల పరంగా కూడా పుష్ప 2 రికార్డు స్థాయిలో డీల్స్ సొంతం చేసుకోవడం చూస్తుంటే, ఈ చిత్రం అద్భుతమైన కమర్షియల్ సక్సెస్ అని చెప్పాలి.

పుష్ప 2 మాత్రమే కాదు, టాప్ 5 జాబితాలో ఇతర భారతీయ సినిమాలు కూడా తమదైన ముద్ర వేశాయి. దంగల్, బాహుబలి 2, పుష్ప 2, ఆర్ఆర్ఆర్, కేజీఎఫ్ చాప్టర్ 2 చిత్రాలు భారతీయ సినిమా స్థాయిని ప్రపంచానికి చాటిచెప్పాయి. అయితే, ఈ జాబితాలో పుష్ప 2 ఎంతో త్వరగా ఈ స్థాయికి చేరుకోవడం ఒక చరిత్రాత్మక ఘట్టం. మరి రాబోయే రోజుల్లో పుష్ప 2 సృష్టించే రికార్డులు ఇంకెంత దూరం వెళ్తాయో చూడాలి.

ఆల్ టైమ్ అత్యధిక వసూళ్లు సాధించిన భారతీయ సినిమాలు:

దంగల్ - 2000+ Cr

బాహుబలి2 - 1810+ Cr

పుష్ప2- 1700Cr+** (22 రోజులు)

RRR - 1270Cr

KGF ఛాప్టర్ 2 - 1200Cr