పుష్ప 2: అక్కడ ముందు రోజే.. స్పెషల్ ప్రీమియర్ షో!

అల్లు అర్జున్ హీరోగా సుకుమార్ దర్శకత్వంలో తెరకెక్కిన భారీ యాక్షన్ డ్రామా పుష్ప: ది రూల్ పై ప్రపంచవ్యాప్తంగా అభిమానుల్లో భారీ అంచనాలు నెలకొన్నాయి. డిసెంబర్ 5న ఈ చిత్రం థియేటర్లలో విడుదలకు సిద్ధమవుతుండగా, విడుదలకు ముందు ప్రీ రిలీజ్ హైప్ పెంచేందుకు మేకర్స్ ఒక ప్రత్యేక ప్రణాళికను సిద్ధం చేశారు. తాజా సమాచారం ప్రకారం, పుష్ప 2 చిత్రం విడుదలకు ముందు రోజు హైదరాబాద్ లోని ప్రముఖ థియేటర్‌లో ప్రీమియర్ షో వేయాలని మేకర్స్ యోచిస్తున్నట్లు తెలుస్తోంది.

సాధారణంగా ఓవర్సీస్ లో ముందుగానే ప్రీమియర్స్ పడుతూ ఉంటాయి. ముఖ్యంగా యూఎస్ లో పుష్ప 2 షోలు గట్టిగానే సౌండ్ చేయబోతున్నాయి. ఇక ప్రీమియర్స్ తోనే అక్కడ బన్నీ అక్కడ రికార్డు క్రియేట్ చేసే అవకాశం ఉంది. ఇప్పటికే అడ్వాన్స్ బుకింగ్స్ ద్వారా 1 మిలియన్ దాలర్స్ దాటాయి. ఇప్పుడే లెక్క ఆ రేంజ్ లో ఉందంటే రానున్న రోజుల్లో ఎలా ఉంటుందో అర్థం చేసుకోవచ్చు.

ఇక హైదరాబాద్‌లో కూడా ప్రత్యేకంగా ఒక షోను విడుదలకు ఒక రోజు ముందే వేసేందుకు సిద్ధమయ్యారు. ప్రముఖ థియేటర్లలో ఒకటైన విమల్ థియేటర్‌ను ప్రీమియర్ షోను వేయనున్నట్లు తెలుస్తోంది. ఎక్కువస్థాయిలో ప్రేక్షకులను ఆకర్షించగల పెద్ద స్క్రీన్ అనుభవాన్ని అందించడంతో పాటు, ఈ థియేటర్‌లోని ఫ్యాన్స్ రిస్పాన్స్ మేకర్స్‌కు మంచి ఫీడ్‌బ్యాక్ ఇస్తుందని భావిస్తున్నారు. అల్లు అర్జున్‌కు హైదరాబాద్‌లో భారీ ఫ్యాన్ బేస్ ఉండడంతో, ఈ ప్రీమియర్ షో సినిమాపై మరింత హైప్‌ను సృష్టించనుందని విశ్లేషకులు అభిప్రాయపడుతున్నారు.

ప్రీమియర్ షోలో పాల్గొనడానికి చిత్రబృందంతో పాటు కొందరు ప్రముఖ సెలబ్రిటీలు కూడా హాజరవుతారని సమాచారం. ఈ షో అభిమానులకు పండగ వాతావరణాన్ని కల్పించనుంది. ఈ ప్రీమియర్ షో ద్వారా సినిమాలోని ముఖ్యమైన సన్నివేశాలు మరియు మాస్ ఎలిమెంట్స్ పై ప్రేక్షకుల మొదటి స్పందనను తెలుసుకోవాలని మేకర్స్ ప్లాన్ చేసినట్లు సమాచారం. ఇప్పటికే విడుదలైన ట్రైలర్‌కు విపరీతమైన స్పందన రావడంతో, ప్రీమియర్ షో ద్వారా సినిమా విడుదలకు ముందు మరింత బజ్ క్రియేట్ చేసే అవకాశం ఉంది.

ప్రత్యేకంగా, పుష్ప 2 మాస్ ఆడియెన్స్‌కు అనువుగా ఉండడంతో, విపరీతమైన ఆకర్షణ సృష్టించేందుకు ఈ ప్రీమియర్ షో కీలక పాత్ర పోషిస్తుందని భావిస్తున్నారు. ఇక ఈ సినిమాకు దేవిశ్రీ ప్రసాద్ సంగీతం అందించగా, రష్మిక మందన్న, ఫహద్ ఫాసిల్ వంటి ప్రముఖ తారాగణం కీలక పాత్రలు పోషించారు. భారీ బడ్జెట్‌తో మైత్రి మూవీ మేకర్స్ నిర్మించిన పుష్ప 2 సినిమా నేషనల్ లెవెల్ బ్లాక్‌బస్టర్ గా నిలుస్తుందని అంటున్నారు. మరి ఫస్ట్ టాక్ ఎలాంటి వైబ్ క్రియేట్ చేస్తుందో చూడాలి.