బాక్సాఫీస్ కలెక్షన్స్.. ఒక్క మాటతో గాలి తీసేసిన రానా

సినిమా విడుదలైన తర్వాత కలెక్షన్స్ గురించి చర్చ జరగడం సాధారణమే. ముఖ్యంగా స్టార్ హీరోల సినిమాలకు సంబంధించిన బాక్సాఫీస్ కలెక్షన్స్ పోస్టర్స్ రూపంలో విడుదలవుతాయి. వందల కోట్ల కలెక్షన్స్ వచ్చాయని గొప్పలు చెబుతూ, అభిమానులకు ఊరటనిచ్చే ఈ పోస్టర్స్ పై గతంలోనూ సందేహాలు వ్యక్తమయ్యాయి. కొందరు సినీ ప్రముఖులు సైతం వాటిపై ఒపెన్ గానే క్లారిటీ ఇచ్చారు. దేవర టైమ్ లో నిర్మాత నగవంశీ ఫ్యాన్స్ హ్యాపీ అవ్వడం కోసం అలా వేస్తామని ఊహించని ట్వస్ట్ ఇచ్చారు.

అలాగే మరికొందరు నటులు కూడా ఆ విషయంలో ఇన్ డైరెక్ట్ గా సెటైర్ వేశారు. ఇక రీసెంట్ గా బాక్సాఫీస్ లెక్కలపై రానా దగ్గుబాటి చేసిన వ్యాఖ్యలు మరింత హాట్ టాపిక్ అయ్యాయి. తాజాగా అమెజాన్ ప్రైమ్ కు సంబంధించిన షోలో రానా మాట్లాడుతూ, పోస్టర్స్ పై వేసే బాక్సాఫీస్ నంబర్లు నిజమైనవి కావని గాలి తీసేశాడు. అవి మార్కెటింగ్ కోసం మాత్రమే. గ్రాస్ కలెక్షన్స్ అనేవి ఫైనల్ నంబర్స్‌కు సంబంధం ఉండదు.. అని సంచలన వ్యాఖ్యలు చేశారు.

ఈ వ్యాఖ్యలు సినీ పరిశ్రమలో కొత్త చర్చలకు దారితీశాయి. ఫ్యాన్స్ అయితే తమ హీరోల సినిమాలకు వచ్చిన కలెక్షన్స్ నిజమా కాదా అన్న అనుమానాలతో సోషల్ మీడియాలో వ్యాఖ్యలు చేస్తున్నారు. ప్రస్తుతం కొందరు నిర్మాతలు తమ సినిమాలకు ప్రచారం కోసం కలెక్షన్స్ పై అబద్ధపు పోస్టర్స్ వేస్తారన్న విమర్శలు కొన్ని కాలంగా ఉన్నాయి.

రానా వ్యాఖ్యలతో ఈ అంశం మరింతగా హైలైట్ అవుతోంది. ‘‘నంబర్లు సీరియస్‌గా తీసుకోకండి, అవి టైం పాస్ కోసం మాత్రమే’’ అని చెప్పడం రానా స్ట్రెయిట్ ఫార్వర్డ్ స్వభావాన్ని తెలియజేస్తుంది. ఇదిలా ఉండగా, రానా కొత్త టాక్ షో ‘ది రానా దగ్గుబాటి షో’ తో ప్రేక్షకులను అలరించబోతున్నాడు. నవంబర్ 23 నుంచి అమెజాన్ ప్రైమ్ లో స్ట్రీమింగ్ కానున్న ఈ షోలో రాజమౌళి, రామ్ గోపాల్ వర్మ, నాగ చైతన్య, శ్రీలీల, సిద్ధూ జొన్నలగడ్డ, రిషబ్ శెట్టి వంటి ప్రముఖులు పాల్గొన్నారు.

ట్రైలర్ రిలీజ్ చేసినప్పటి నుంచి ఈ షోపై మంచి అంచనాలు ఏర్పడ్డాయి. ఓ వైపు సినిమాలతో బిజీగా ఉంటూనే టాక్ షో లాంటి వైవిధ్యమైన ప్రాజెక్ట్ లో రానా పాల్గొనడం అతని మల్టీటాలెంటెడ్ స్వభావాన్ని హైలైట్ చేస్తోంది. బాహుబలి వంటి ప్రాజెక్ట్స్ తో దేశవ్యాప్తంగా పాపులారిటీ సంపాదించిన రానా, ఈ టాక్ షోతో మరోసారి తన ప్రత్యేకతను చాటుకునేందుకు సిద్ధమయ్యాడు. ఇక రానా చేసిన వ్యాఖ్యలు బాక్సాఫీస్ కలెక్షన్స్ అనే అంశాన్ని కొత్త దిశగా చర్చకు తెచ్చాయి. మరి అతని కామెంట్స్ పై సినీ ప్రముఖులు ఎవరైనా స్పందిస్తారేమో చూడాలి.