ర‌ణ్‌వీర్ ఆల్‌రౌండ‌ర్ నైపుణ్యానికి ష‌రాన్ స్టోన్ బౌల్డ్

బాలీవుడ్ స్టార్ హీరో ర‌ణ్ వీర్ సింగ్ ఎన‌ర్జీ, ప్ర‌తిభ గురించి చెప్పాల్సిన ప‌నిలేదు. హిందీ ప‌రిశ్ర‌మ‌లో అత‌డికి అసాధార‌ణ‌మైన పెర్ఫామ‌ర్ గా గుర్తింపు ఉంది. ఫ్యాష‌న్ ప్ర‌పంచంలో స్టైల్ ఐకాన్ గా అత‌డి ప్ర‌యోగాలు అన్నీ ఇన్నీ కావు. నేటిత‌రానికి అత‌డు గొప్ప స్ఫూర్తి. అంతేకాదు.. ఇప్పుడు అత‌డు పాపుల‌ర్ హాలీవుడ్ స్టార్ మ‌న‌సు దోచాడు. ఇటీవల జెడ్డాలో జరిగిన రెడ్ సీ ఇంటర్నేషనల్ ఫెస్టివల్‌లో ర‌ణ్వీర్ సింగ్‌ను సత్కరించారు. అందమైన ప్రతిభావంతురాలైన హాలీవుడ్ స్టార్ షరాన్ స్టోన్ చేతుల మీదుగా ర‌ణ‌వీర్ అవార్డును అందుకున్నాడు. బాలీవుడ్ నటుడు ర‌ణ‌వీర్ ని వేదికపైకి పిలిచి అతనికి అవార్డును అందించడానికి ముందు షరాన్ ఇలా వ్యాఖ్యానించారు. నేను ఇంతకు ముందు రణ్‌వీర్ సింగ్‌ని క‌లిసాను. అత‌డితో ముచ్చ‌టించాను. అందుకే చాలా ఎగ్జ‌యిట్ మెంట్ తో కూడుకున్న‌ ఆనందాన్ని పొందాను. ఎంత గొప్ప వ్యక్తి! అతడు నిజంగా ఆల్ రౌండర్.. సృజనాత్మక మేధావి. నిజమైన గొప్పతనం అత‌డిలో క‌నిపించింది. మరో ప్రతిష్టాత్మక అవార్డును అందుకోవడానికి వేదికపైకి ఆయనను స్వాగతిస్తున్నందుకు ఆనందంగా ఉంది'' అని అన్నారు.

అవార్డు అందుకున్న తర్వాత రణ్‌వీర్ తన అభిమానుల ప్రేమకు ధన్యవాదాలు తెలిపాడు. అతడు వ్యాఖ్యానిస్తూ..''నా అందమైన అభిమానులకు చాలా కృతజ్ఞతలు చెప్పాలనుకుంటున్నాను. వారు నాలో ఉత్సాహం నింపే శక్తి. వారు నా పరిమితులను అధిగమించడానికి, గొప్పతనం కోసం ప్రయత్నించడానికి, అమూల్యమైన సత్యాన్ని కనుగొనడానికి నన్ను ప్రేరేపించారు'' అని అన్నారు.

ఈ ఏడాది రెడ్ సీ ఇంటర్నేషనల్ ఫెస్టివల్‌- జ్యూరీ లైనప్‌ను గతంలోనే ప్రకటించారు. ఇందులో ర‌ణ‌వీర్ కి ఆహ్వానం అందింది. ష‌రాన్ స్టోన్ చేతుల‌మీదుగా అత‌డు ఈ పుర‌స్కార గౌర‌వాన్ని అందుకోవ‌డం అరుదైన విష‌యం. ష‌రాన్ 90ల‌లో మేటి క‌థానాయిక‌గా హాలీవుడ్ ని ఏలారు. త‌ను న‌టించిన బేసిక్ ఇన్ స్టింక్ట్స్ ఇప్ప‌టికీ నేటిత‌రం స్టార్ల‌ను ప్రేరేపిస్తూనే ఉంది. తాజా పుర‌స్కార గ్ర‌హీత‌ల్లో స్వీడిష్-అమెరికన్ నటుడు జోయెల్ కిన్నమన్ (ఆత్మహత్య స్క్వాడ్) ఉన్నారు. ఫ్రీదా పింటో (స్లమ్‌డాగ్ మిలియనీర్), ఈజిప్షియన్ నటి అమీనా ఖలీల్, స్పెయిన్ కి చెందిన పాజ్ వేగా త‌దిత‌రులు ఈవెంట్లో పుర‌స్కారాలు, స‌త్కారాలు అందుకున్నారు.

రణవీర్ సింగ్ చివరిగా కరణ్ జోహార్ ద‌ర్శ‌క‌త్వం వ‌హించిన 'రాకీ ఔర్ రాణి కి ప్రేమ్ కహానీ'లో అలియా భట్‌తో కలిసి కనిపించాడు. అతడు తదుపరి రోహిత్ శెట్టి 'సింగం ఎగైన్‌'లో కనిపించనున్నాడు. ఈ చిత్రంలో అజయ్ దేవగన్, అక్షయ్ కుమార్, టైగర్ ష్రాఫ్, కరీనా కపూర్‌లతో పాటు రణవీర్ భార్య-నటి దీపికా పదుకొనే కూడా ఉన్నారు. ఈ చిత్రానికి సంబంధించిన ఫస్ట్‌లుక్ పోస్టర్‌లను ఇటీవల ఒక్కొక్కటిగా షేర్ చేశారు మేకర్స్. వాటికి అద్భుత స్పంద‌న వ‌చ్చింది.