పొట్టేల్ సాంగ్.. జయ జయ జయ శంకర..

వకీల్ సాబ్, మల్లేశం, మ్యాస్ట్రో వంటి సినిమాలతో మంచి గుర్తింపు సంపాదించుకుంది టాలీవుడ్ హీరోయిన్ అనన్య నాగళ్ల. ప్రస్తుతం ఆమె లీడ్ రోల్ లో పొట్టేల్ మూవీ చేస్తున్న విషయం తెలిసిందే. యువ చంద్ర కృ‍ష్ణ హీరోగా నటిస్తున్నారు. తెలంగాణ బ్యాక్ డ్రాప్ లో రూపొందుతున్న ఈ సినిమాను బంధం రేగడ్, సవారీ మూవీలతో మంచి పేరు తెచ్చుకున్న సాహిత్ మోత్ఖురి తెరకెక్కిస్తున్నారు.

అయితే సినిమాల ప్రమోషన్స్ లో మ్యూజిక్ కీలక పాత్ర పోషిస్తుందన్న విషయం తెలిసిందే. రిలీజ్ కు ముందు విడుదల అయ్యే పాటలు మూవీని బ్లాక్ బస్టర్లు చేసే అవకాశం ఉంది. దీంతో పొట్టేల్ మేకర్స్.. సాంగ్స్ పై ప్రత్యేక శ్రద్ధ తీసుకున్నారు. ఇప్పటికే ఈ సినిమాలోని రెండు పాటలు రిలీజ్ చేయగా.. సూపర్ రెస్పాన్స్ దక్కించుకున్నాయి. తాజాగా శివరాత్రి పండుగ సందర్భంగా మేకర్స్ మరో పాటను విడుదల చేశారు.

శంకర పవర్ ఫుల్ లిరికల్ సాంగ్ ను మేకర్స్ శుక్రవారం రిలీజ్ చేశారు. శంకర శివ శంకర.. నా బాధవినవేరా అంటూ సాగుతున్న ఈ పాట.. మంచి డివోషనల్ ఫీలింగ్ కలిగిస్తోంది. వివిధ సమస్యలతో బాధపడుతున్న హీరో.. శివుడిని ప్రార్థిస్తున్నట్లు మేకర్స్ చూపించారు. శేఖర్ చంద్ర అందించిన మ్యూజిక్.. పెర్ఫెక్ట్ గా షూట్ అయింది. కాసర్ల శ్యామ్ అందించిన లిరిక్స్ కు శాండిల్య పీసపాటి తన గానంతో ప్రాణం పోశారు.

బోనాల కోసం బలి ఇవ్వబోతున్న పొట్టేల్‌ను సినిమాలో హీరో పోగొట్టుకుంటాడు. ఆ తర్వాత తన పొట్టేల్ ను వెతికేందుకు ప్రయత్నిస్తాడు. ఆ సమయంలో తమ ఆచారాల్లో భాగంగా త్రిశూలంతో తన నాలుకకు గుచ్చుకుంటాడు. మొత్తానికి హీరో బాధను పాటలో మేకర్స్ ఎఫెక్టివ్ గా చూపించారు. ఈ సాంగ్ లిరిక్స్ తోపాటు గానం అద్భుతంగా ఉందని నెటిజన్లు చెబుతున్నారు.

ఎన్ ఐ ఎస్ ఏ ఎంటర్టైన్మెంట్స్ బ్యానర్ పై నిశాంక్ రెడ్డి కుడితి, ప్రగ్యా సన్నిధి క్రియేషన్స్ బ్యానర్ పై సురేష్ కుమార్ సడిగే నిర్మిస్తున్నారు. యువ చంద్ర కృష్ణ, అనన్య నాగళ్ల తోపాటు అజయ్, ప్రియాంక శర్మ, తనస్వి చౌదరీ, నీల్ సీన్, చత్రపతి శేఖర్, శ్రీకాంత్ అయ్యంగార్ ఇతర పాత్రలు పోషిస్తున్నారు. మోనిష్ భూపతి రాజు సినిమాటోగ్రఫర్ గా, కార్తీక శ్రీనివాస్ ఎడిటర్ గా వ్యవహరిస్తున్నారు. త్వరలోనే ఈ సినిమా రిలీజ్ కానుంది.