అన్నయ్య దండంకి తమ్ముడి పిండం బ్యాలన్స్‌..!
పవన్ గెలిచి ఉప ముఖ్యమంత్రి బాధ్యతలు చేపట్టడంతో ఎస్కేఎన్ సంతోషం వ్యక్తం చేశారు. అదే సమయంలో తనదైన ప్రాసలో అన్నయ్య తో దండం పెట్టించుకున్న వ్యక్తికి తమ్ముడు పిండం పెట్టాడు అన్నాడు.
ఆ మధ్య ఏదైనా సినిమా వేడుకలో బండ్ల గణేష్ పాల్గొన్నా, ఆయన మాట్లాడినా కూడా వారం రోజుల పాటు ఆ ముచ్చట్లు సోషల్ మీడియాలో ట్రెండ్ టాపిక్ గా ఉండేవి. బండ్ల గణేష్ ప్రతి స్పీచ్ కూడా సోషల్ మీడియాలో వైరల్‌ అయ్యేది. అయితే ఈ మధ్య కాలంలో బండ్లన్న కాస్త సైలెంట్ అయ్యాడు.
మెగా కాంపౌండ్‌ బండ్లను పక్కకు పెట్టారనే ప్రచారం జరిగింది. బండ్ల గణేష్ స్థానంను భర్తీ చేసే విధంగా మెగా కాంపౌండ్‌ కు చెందిన బన్నీకి అత్యంత ఆప్తుడిగా పేరున్న ఎస్కేఎన్ స్టేజ్ పై దడదడలాడిస్తున్నాడు. బండ్ల కంటే ఒక ఆకు ఎక్కువ చదివినట్లుగా ఎస్కేఎన్ స్పీచ్ లు ఉంటాయి.
మెగా ఫ్యామిలీ గురించి ఆయన మాట్లాడుతూ ఉంటే ఫ్యాన్స్ అలా వింటూనే ఉండాలి అనుకుంటారు. అల్లు అర్జున్‌ గురించి ఇతర మెగా ఫ్యాన్స్ గురించి ఎవరైనా ఏమైనా చిన్న మాట మాట్లాడినా కూడా పడి పోయి మరీ తనదైన శైలిలో సమాధానం ఇచ్చే ఎస్కేఎన్ తాజాగా మరోసారి స్టేజ్ పై ఆసక్తికర వ్యాఖ్యలు చేశాడు.
ఏపీ అసెంబ్లీ ఎన్నికల్లో టీడీపీ జనసేన బీజేపీ కూటమి భారీ విజయాన్ని సొంతం చేసుకుని ప్రభుత్వం ఏర్పాటు చేసిన నేపథ్యంలో పీపుల్స్ మీడియా ఫ్యాక్టరీ ఆధ్వర్యంలో విజయోత్సవ సభను ఏర్పాటు చేయడం జరిగింది. ఆ సభలో ఎస్కేఎన్ పాల్గొన్నాడు.
పవన్ కళ్యాణ్ తరపున పిఠాపురంలో ఎస్కేఎన్ పది రోజుల పాటు ప్రచారం చేయడం జరిగింది. పవన్ గెలిచి ఉప ముఖ్యమంత్రి బాధ్యతలు చేపట్టడంతో ఎస్కేఎన్ సంతోషం వ్యక్తం చేశారు. అదే సమయంలో తనదైన ప్రాసలో అన్నయ్య తో దండం పెట్టించుకున్న వ్యక్తికి తమ్ముడు పిండం పెట్టాడు అన్నాడు. ఆ మాటలకు ప్రేక్షకుల నుంచి భారీ స్పందన వచ్చింది.
గతంలో జగన్ మోహన్ రెడ్డి వద్దకు టాలీవుడ్‌ సమస్యలను తీసుకు వెళ్లేందుకు చిరంజీవి స్వయంగా వెళ్లారు. ఆ సమయంలో చిరు చేతులు ఎత్తి నమస్కారం పెడితే జగన్ నవ్వుతూ గర్వంగా వ్యవహరించాడు. ఆ దృష్యాలు మెగా ఫ్యాన్స్ ను తీవ్రంగా కలచివేశాయి. అందుకే పవన్ ఘన విజయం తో అన్నయ్య గౌరవం నిలిచిందని మెగా ఫ్యాన్స్ అంటున్నారు. అదే విషయాన్ని ఎస్కేఎన్ చెప్పుకొచ్చాడు.