పుష్ప 2 లో ది డాన్సింగ్ క్వీన్ ప్రత్యేక పాట
అల్లు అర్జున్‌, సుకుమార్‌ కాంబోలో రూపొందుతున్న పుష్ప 2 సినిమాపై అంచనాలు ఆకాశాన్ని తాకేలా ఉన్నాయి.
అల్లు అర్జున్‌, సుకుమార్‌ కాంబోలో రూపొందుతున్న పుష్ప 2 సినిమాపై అంచనాలు ఆకాశాన్ని తాకేలా ఉన్నాయి. రూ.1500 కోట్ల ప్రీ రిలీజ్‌ బిజినెస్ చేసిన ఈ సినిమా బాక్సాఫీస్ వద్ద భారీ వసూళ్లు రాబట్టాల్సి ఉంది. బాహుబలి 2 ని మించి పలు ఏరియాల్లో వసూళ్లు రాబట్టడం ఖాయం అనే నమ్మకంతో బయ్యర్లు కొనుగోలు చేసేందుకు ముందుకు వచ్చారు. మలయాళ సినిమాల స్థాయిలో కేరళలో ఈ సినిమా భారీ వసూళ్లు సాధించడంతో పాటు, కేజీఎఫ్‌ కి ఏమాత్రం తగ్గకుండా కర్ణాటకలో సినిమా వసూళ్లు సాధిస్తుందని అక్కడి బయ్యర్లు నమ్మకంగా ఉన్నారు. పుష్ప 2 సినిమా స్థాయిని మరింతగా పెంచే విధంగా ఐటెం సాంగ్ ను మేకర్స్ ప్రకటించారు.
పుష్ప 2 సినిమా షూటింగ్‌ ప్రారంభం అయినప్పటి నుంచి ఐటం సాంగ్ ను ఎవరు చేయబోతున్నారు అనే ఆసక్తి అందరిలోనూ కనిపిస్తూ వచ్చింది. బాలీవుడ్‌ స్టార్ హీరోయిన్‌ ల్లో ఒకరిని ఈ పాటకు ఎంపిక చేస్తారనే ప్రచారం జరిగింది. కానీ చివరకు సినిమాలో శ్రీలీలను ఎంపిక చేయడం జరిగింది. చిత్ర యూనిట్‌ సభ్యులు అధికారికంగా ఐటం సాంగ్‌ని ప్రకటించారు. ది డాన్సింగ్ క్వీన్ శ్రీలీలను పుష్ప 2 లో ప్రత్యేక పాటలో చూపించబోతున్నట్లుగా మేకర్స్ అధికారికంగా ప్రకటించడంతో పాటు పోస్టర్‌ ను విడుదల చేయడం ద్వారా అంచనాలు మరింతగా పెంచడం జరిగింది.
సమంతతో పుష్ప పార్ట్‌ 1 లో ఐటం సాంగ్ చేయించిన దర్శకుడు సుకుమార్‌ ఈసారి శ్రీలీలతో ఐటం సాంగ్ చేయించబోతున్నాడు. ఊ అంటావా పాటకు మించి శ్రీలీల చేసిన కిస్సిక్‌ పాట ఉంటుంది అంటూ మేకర్స్ నమ్మకంగా చెబుతున్నారు. దేవి శ్రీ ప్రసాద్‌ చాలా సమయం తీసుకుని ఈ ఐటం సాంగ్ ను ట్యూన్ చేయడం జరిగింది. అంతే కాకుండా ప్రత్యేకమైన సెట్‌ను ఏర్పాటు చేసి ఈ ఐటం సాంగ్ షూట్‌ చేస్తున్నారు. ఇప్పటికే షూటింగ్‌ దాదాపుగా పూర్తి అయిందని, ప్యాచ్ వర్క్‌ తో సహా ఒకటి రెండు రోజుల్లో పూర్తి చేసి, పాటను ప్రేక్షకుల ముందుకు తీసుకు వచ్చేందుకు సుకుమార్‌ టీం ప్లాన్‌ చేస్తున్నారు.
పుష్ప 2 లో అల్లు అర్జున్‌కి జోడీగా రష్మిక మందన్న హీరోయిన్‌గా నటిస్తోంది. ఇటీవలే ఆమెకు సంబంధించిన డాన్స్ మూమెంట్ పోస్టర్‌ను ప్రేక్షకుల ముందుకు తీసుకు వచ్చారు. మొదటి పార్ట్‌లో ఎలా అయితే కనిపించిందో అదే విధంగా సెకండ్‌ పార్ట్‌లోనూ రష్మిక మందన్న శ్రీవల్లి పాత్రలో కనిపించబోతుందని ఆ పోస్టర్‌ని చూస్తే అర్థం అవుతుంది. సోషల్‌ మీడియాలో పుష్ప 2 కి ఉన్న క్రేజ్‌ ఏపాటిదో అందరికీ తెల్సిందే. అందుకే ఈ సినిమా విషయంలో దర్శకుడు సుకుమార్‌ అస్సలు లైట్ తీసుకోవడం లేదు. ప్రతి విషయంలోనూ ది బెస్ట్‌ ఉండే విధంగా ప్లాన్‌ చేస్తున్నారు. శ్రీలీల ఐటం సాంగ్ సినిమాకు ఏ స్థాయిలో క్రేజ్‌ ని తెచ్చి పెడుతుంది అనేది చూడాలి అంటే పాట విడుదల కావాల్సి ఉంది.