ఇద్దరి హీరోలపై 400 కోట్లు హిట్టిస్తారో లేదో

కోలీవుడ్ లో బిగ్ ప్రొడక్షన్స్ హౌస్ లో ఒకటిగా స్టూడియో గ్రీన్ ఉంది. భారీ బడ్జెట్ లతో స్టార్ హీరోల సినిమాలని ఈ ప్రొడక్షన్ హౌస్ నిర్మిస్తూ ఉంటుంది. స్టూడియో గ్రీన్ 2006లో సినిమా నిర్మాణంలోకి అడుగుపెట్టింది. తరువాత వెనక్కి తిరిగి చూడకుండా వరుసగా మూవీస్ చేస్తూ వస్తోంది. ఎక్కువగా సూర్యతో ఈ నిర్మాణ సంస్థ మూవీస్ ని చేయడం విశేషం. కేఈ జ్ఞాన్ వేల్ రాజా ప్రొడ్యూసర్ గా స్టూడియో గ్రీన్ భారీ బడ్జెట్ సినిమాలతో ప్రేక్షకుల ముందుకొస్తోంది.

ఈ ఏడాది స్టూడియో గ్రీన్ నుంచి రెండు పాన్ ఇండియా సినిమాలు ప్రేక్షకుల ముందుకి రాబోతున్నాయి. అలాగే ఒక తెలుగు సినిమా, ఒక బైలింగ్వల్ మూవీ కూడా లిస్ట్ లో ఉన్నాయి. తెలుగులో అల్లు శిరీష్ హీరోగా బడ్డీ అనే సినిమాని చేశారు. ఈ సినిమా త్వరలో రిలీజ్ కాబోతోంది. ఇదిలా ఉంటే చియాన్ విక్రమ్ హీరోగా పా రంజిత్ దర్శకత్వంలో తెరకెక్కిన తంగలాన్ సినిమాని స్టూడియో గ్రీన్ ఏకంగా 100 కోట్ల బడ్జెట్ తో నిర్మించింది.

డిఫరెంట్ కాన్సెప్ట్ తో పీరియాడికల్ యాక్షన్ డ్రామాగా ఈ సినిమాని పా రంజిత్ సిల్వర్ స్క్రీన్ పై ఆవిష్కరించారు. ఆగష్టు 15న ఈ మూవీ ప్రేక్షకుల ముందుకొస్తోంది. ఈ సినిమాపై అంచనాలు హెవీగానే ఉన్నాయి. దీని తర్వాత అక్టోబర్ 10న పాన్ వరల్డ్ రేంజ్ లో సూర్య కంగువ మూవీ రాబోతోంది. ఈ మూవీ బడ్జెట్ 300 కోట్లకు పైనే. శివ దర్శకత్వంలో ఈ సినిమా రెడీ అయ్యింది. ఈ రెండు సినిమాలపై దేశ వ్యాప్తంగా హైప్ నెలకొని ఉంది.

స్టూడియో గ్రీన్ ఈ రెండు సినిమాలపై ఏకంగా 400 కోట్ల వరకు పెట్టినట్లు తెలుస్తోంది. ఈ రెండింటిలో కచ్చితంగా ఒక్క సినిమా అయిన హిట్ కావాలి. స్టూడియో గ్రీన్ లో భారీ సక్సెస్ పడి చాలా కాలం అయ్యింది. ఈ రెండు సినిమాలు కూడా కమర్షియల్ సక్సెస్ అయ్యే అవకాశం ఉందనే మాట కోలీవుడ్ సర్కిల్ లో వినిపిస్తోంది. ఇవి హిట్ అయితే స్టూడియో గ్రీన్ పాన్ ఇండియా ప్రొడక్షన్ హౌస్ గా ఎస్టాబ్లిష్ అవుతుంది.

ఈ రెండు పెద్ద సినిమాలు కాకుండా కార్తీ హీరోగా వావాతియార్ అనే సినిమాని కూడా స్టూడియో గ్రీన్ నిర్మిస్తోంది. ఇది భారీ బడ్జెట్ తో తెరకెక్కుతోన్న ప్రాజెక్ట్ కావడం విశేషం. ఈ ఏడాదిలోనే ఈ ప్రొడక్షన్ హౌస్ నుంచి 4 సినిమాలు థియేటర్స్ లోకి రానున్నాయని అర్ధమవుతోంది. అంటే దాదాపు 500 కోట్ల పెట్టుబడులు. మరి రాబోయే సినిమాల్లో ఎన్ని సక్సెస్ అవుతాయనేది వేచి చూడాలి.