ఐదు ప్ర‌శ్న‌ల‌తో 'కంగువ' రెండ‌వ భాగం!

సూర్య క‌థానాయ‌కుడిగా శివ ద‌ర్శ‌క‌త్వంలో తెర‌కెక్కిన `కంగువ` మ‌రో మూడు రోజుల్లో ప్రేక్ష‌కుల ముందుకొస్తుంది. సూర్య కెరీర్ లో తొలి పాన్ ఇండియా సినిమా భారీ అంచ‌నాల మ‌ధ్య రిలీజ్ అవుతుంది. ఇప్ప‌టికే రిలీజ్ అయిన‌ ప్ర‌చార చిత్రాలు..యూనిట్ ప్ర‌చారంతో అంచ‌నాలు పీక్స్ కి చేరాయి. సూర్య న‌ట విశ్వ‌రూపం ప్రేక్ష‌కులు చూడ బోతున్నారు. అయితే ఈ సినిమా రెండ‌వ భాగం కూడా ఉంద‌ని తొలి నుంచి ప్ర‌చారం జ‌రుగుతోంది.

మేక‌ర్స్ నుంచి కూడా బ‌లంగా వినిపిస్తుంది. అయితే తాజాగా ఈ విష‌యాన్ని ద‌ర్శ‌కుడు శివ క‌న్ప‌మ్ చేసారు. ఆ సంగ‌తేంటో ఆయ‌న మాట‌ల్లోనే... ` కంగువ‌కి రెండవ భాగం కూడా ఉంటుంది. అంద‌రూ ఆశ్చ‌ర్య‌పోయేలా ఓ అతిధి పాత్ర రెండో భాగం క‌థకి ప్రారంభాన్నిస్తుంది. ఆ అతిధి పాత్ర ఎవ‌రు చేసారు? అన్న‌ది తెర‌పైనే చూడాలి. ఈ క‌థ చివ‌ర్లో ఐదు ప్ర‌శ్న‌లు ఉద‌యిస్తాయి. వాటికి జ‌వాబుగా రెండ‌వ భాగం ఉంటుంది.

ఇలాంటి క‌థ ప్ర‌పంచాన్ని ఊహించి పేప‌రుపై రాసుకోవ‌డం సుల‌వే. కానీ అదే త‌ర‌హాలో తెర‌పైకి తీసుకురావ‌డం అన్న‌ది చిన్న పనికాదు. నా బృందం ఎంతో గొప్ప స‌హ‌కారం అందించింది కాబ‌ట్టే సాధ్య‌మైంది. ఈసినిమా కోసం నేను మ‌ళ్లీ కొత్త‌గా చ‌ద‌వ‌డం మొద‌లు పెట్టాను. సాంకేతిక ప‌ర‌మైన ఎన్నో విష‌యాలు తెలుసుకుని ఆ త‌ర్వాత రంగంలోకి దిగాం. ఇది చాలా పెద్ద క‌థ‌. చాలా ఆస‌క్తిక‌రంగానూ ఉంటుంది.

జ్ఞాన్ వేల్ రాజాకి చాలా క‌థ‌లు చెప్పాను. కానీ ఆయ‌న ఈ క‌థ‌ను ఎంచుకున్నారు. ఎక్క‌డా రాజీ ప‌డ‌లేదు. అడిగిం ద‌ల్లా ఇచ్చారు. కంగువ ప్రేక్ష‌కుల అంచ‌నాల‌కు అంద‌ని విధంగా ఉంటుంది. రెండ‌వ భాగం మ‌రింత ఎగ్జైట్ మెంట్ ను తీసుకొస్తుంది` అని అన్నారు. మ‌రి రెండ‌వ భాగం ఎప్పుడు చేస్తారు? అన్న‌ది `కంగువ` రిలీజ్ త‌ర్వాత వ‌చ్చే ఫ‌లితాల మీద ఆధార‌ప‌డి ఉంటుంది.