'రాజాసాబ్'.. ఆ హీరో సాంగ్ ని రీమిక్స్ చేస్తున్నారా?

రెబల్ స్టార్ ప్రభాస్ హీరోగా డైరెక్టర్ మారుతి తెరకెక్కిస్తున్న సినిమా ''ది రాజాసాబ్''. హారర్, కామెడీ, రొమాంటిక్ అంశాలతో కూడిన సూపర్ నేచురల్ థ్రిల్లర్ ఇది. ప్రస్తుతం షూటింగ్ దశలో ఉన్న ఈ చిత్రాన్ని వచ్చే సమ్మర్ స్పెషల్ గా రిలీజ్ చేయనున్నారు. ఇప్పటికే ఫస్ట్ లుక్, ఫ్యాన్ ఇండియన్ గ్లింప్స్, మోషన్ పోస్టర్ విశేషంగా ఆడియన్స్ ను ఆకట్టుకున్నాయి. ఈ చిత్రానికి ఎస్.థమన్ సంగీతం సమకూరుస్తున్నారు. తాజాగా మ్యూజిక్ డైరెక్టర్ ఈ మూవీకి సంబంధించి కీలకమైన మ్యూజికల్ అప్డేట్స్ అందించారు.

'రాజాసాబ్' మంచి మాస్‌ కమర్షియల్‌ ఆల్బమ్‌ అని, మొత్తంగా ఆరు పాట‌లు ఉంటాయని థమన్ తెలిపారు. అంధులో ఒక రీమిక్స్ సాంగ్ ఉంటుందని ప్రకటించారు. పాన్‌ ఇండియా మార్కెట్‌ను దృష్టిలో పెట్టుకుని.. అందర్నీ అలరించే పాటను రీమిక్స్‌ చేయాలనుకుంటున్నామని చెప్పారు. అంతేకాదు వచ్చే సంక్రాంతి పండక్కి ఫస్ట్ సింగిల్ ను విడుదల చేసే ఆలోచనలో ఉన్నట్లు తెలిపారు. థమన్ అందించిన అప్డేట్స్ తో డార్లింగ్ ఫ్యాన్స్ ఖుషీ అవుతున్నారు. ఏ పాటను రీమిక్స్ చేస్తారని పెద్ద ఎత్తున చర్చలు జరుపుతున్నారు.

2004లో ప్రభాస్ నటించిన 'అడవి రాముడు' సినిమా కోసం, అదే పేరుతో నందమూరి తారక రామారావు తీసిన చిత్రం నుంచి 'ఆరేసుకోబోయి పారేసుకున్నాను' అనే పాటను రీమిక్స్ చేసారు. ఈ సాంగ్ సంగీత ప్రియులను అలరించింది కానీ, సినిమా మాత్రం నిరాశ పరిచింది. ఆ తర్వాత మళ్ళీ రీమిక్స్ జోలికి వెళ్లని ప్రభాస్.. రెండు దశాబ్దాల తర్వాత 'ది రాజాసాబ్' మూవీలో రీమిక్స్ సాంగ్ పెట్టడానికి అంగీకరించారని తెలుస్తోంది. థమన్ ఈ విషయం మీద క్లారిటీ ఇవ్వడంతో, డార్లింగ్ పెదనాన్న కృష్ణంరాజు సినిమాలోని ఓ పాట‌ని రీమిక్స్ చేస్తార‌నే ప్ర‌చారం మొదలైంది.

కృష్ణంరాజు పాటని ప్ర‌భాస్ సినిమాలో రీమిక్స్ చేసే ఆలోచన బాగానే ఉంది కానీ, మారుతి మాత్రం ఓ హిందీ క్లాసిక్ ని రీమిక్స్ చేస్తున్నారని టాక్‌ వినిపిస్తోంది. ‘ఇన్సాఫ్ అప్నే లాహూ సే’ (1994) అనే బాలీవుడ్ మూవీలోని 'హ‌వా.. హ‌వా’ అనే పాటని 'రాజా సాబ్' కోసం రీమేక్ చేస్తున్నారని అంటున్నారు. ఆల్రెడీ రైట్స్ కూడా తీసుకున్నారని వార్తలు వస్తున్నాయి. ఇక్కడ మరో ఆసక్తికరమైన విషయం ఏంటంటే, 'ఇన్సాఫ్ అప్నే లాహూ సే'లో హీరోగా నటించిన సంజయ్ దత్.. ఇప్పుడు రాజాసాబ్ సినిమాలో కీలక పాత్ర పోషిస్తున్నారు. బహుశా సినిమాలో సంజూ భాయ్ - ప్రభాస్ పాత్రల కాంబినేషన్ లోనే ఈ సాంగ్ వస్తుందేమో.

హిందీ ట్యూన్ ని రీమిక్స్ చేయడం అనేది పాన్ ఇండియా మార్కెట్ కు కలిసొచ్చే అవకాశం ఉంది. అందులోనూ ఇది మంచి మాస్ బీట్ ఉన్న పాట. ఆరోజుల్లో బాలీవుడ్ ను ఓ ఊపు ఊపింది. ఇప్పుడు 'ది రాజాసాబ్'లో ఆ బీట్ ని మ‌ళ్లీ వినిపించి, అదే మ్యాజిక్ ని క్రియేట్ చెయ్యాలని మేకర్స్ భావిస్తున్నారు. రీమిక్స్ సాంగ్స్ లో చేయడంలో థమన్ కు ప్రత్యేకమైన స్టైల్ ఉంది. ఇప్పటికే తనదైన శైలిలో కొన్ని పాత పాటలను రీమేక్ చేసారు. ఇప్పుడు ఈ పాటను కూడా స్పెషల్ గా ఇస్తాడనే అనుకోవచ్చు.

థమన్ తన కెరీర్ లో ప్రభాస్ కోసం వర్క్ చేస్తున్న తొలి సినిమా 'ది రాజాసాబ్'. అందుకే బెస్ట్ ఆల్బమ్ ఇవ్వడానికి కృషి చేస్తున్నారని తెలుస్తోంది. ఆల్రెడీ రిలీజైన ప్రమోషనల్ కంటెంట్ లో బీజీఎమ్ ఇంప్రెస్ చేసింది. మారుతికి మంచి మ్యూజిక్ టేస్ట్ ఉంది. గతంలో థమన్ నుంచి చార్ట్ బస్టర్స్ ఆల్బమ్స్ రాబట్టుకున్నాడు. ఇప్పుడు ప్రభాస్ కోసం నెక్స్ట్ లెవల్ లో ఉండేలా సాంగ్స్ రెడీ చేస్తున్నట్లుగా టాక్. చాలా కాలంగా సరైన డ్యాన్సులకు దూరమైన డార్లింగ్.. ఈసారి రాజాసాబ్ లో తన మాస్ స్టెప్పులతో అలరిస్తారని అందరూ భావిస్తున్నారు.

'ది రాజాసాబ్' చిత్రంలో ప్రభాస్ రెండు భిన్నమైన పాత్రల్లో కనిపించనున్నారు. మాళవిక మోహనన్, నిధి అగర్వాల్, రిద్ది కుమార్ హీరోయిన్లుగా నటిస్తున్నారు. పీపుల్ మీడియా ఫ్యాక్టరీ బ్యానర్‌పై టిజి విశ్వ ప్రసాద్ భారీ బడ్జెట్ తో నిర్మిస్తున్న ఈ రొమాంటిక్ హారర్ కామెడీ మూవీని 2025 ఏప్రిల్ 10న గ్రాండ్ గా రిలీజ్ చేయనున్నారు.