తమన్‌ మంచి మనసు.. అతడికి ఇండియన్‌ ఐడల్‌లో ఛాన్స్‌!

సంగీత దర్శకుడు తమన్‌ ఎప్పటికప్పుడు తన మంచి మనసును చాటుకుంటూ వస్తున్నాడు. కెరీర్‌ ఆరంభంలో ఒడిదొడుకులు ఎదుర్కొన్న తమన్‌ తక్కువ సమయంలోనే సంగీత దర్శకుడిగా టాప్ పొజీషన్‌కి చేరుకున్నారు. నటుడిగా, కీ బోర్డ్‌ ప్లేయర్‌గా కెరీర్‌ ఆరంభంలో తాను ఎదుర్కొన్న సవాళ్లను ఎప్పటికీ మరచిపోడు. అందుకే ఇండస్ట్రీలో అవకాశాల కోసం కష్టపడుతున్న వారి గురించి తెలుసుకుని వారికి సాయం చేస్తూ ఉంటాడని ఆయన సన్నిహితులు చెబుతూ ఉంటారు. తాజాగా మరోసారి తమన్‌ తన మంచి మనసును చాటుకున్నాడు. ఒక దివ్యాంగుడికి అతి పెద్ద అవకాశాన్ని ఇవ్వడం ద్వారా సహృదయం చాటుకున్నాడని ఫ్యాన్స్ కామెంట్స్ చేస్తున్నారు.

పూర్తి వివరాల్లోకి వెళ్తే.. దివ్యాంగుడు అయిన రాజు మంచి గాయకుడు. ఆ విషయం సోషల్‌ మీడియా ద్వారా ఆయన ఇచ్చిన ఇంటర్వ్యూలతో నిరూపితం అయింది. అందుకే ఆయనకు అవకాశం ఇవ్వాలంటూ ఆర్‌టీసీ ఎండీ సజ్జనార్‌ సైతం ఒకానొక సమయంలో కీరవాణికి విజ్ఞప్తి చేయడం జరిగింది. రాజు సోషల్‌ మీడియాలో మంచి గుర్తింపు దక్కించుకున్నాడు. తాజాగా తమన్ వద్దకు ఒక నెటిజన్‌ రాజు విషయాన్ని తీసుకు వెళ్లాడు. రాజు యొక్క ప్రతిభను తమన్‌కు చూపించే ప్రయత్నం చేయడం జరిగింది. తమన్‌ నుంచి రాజుకు ఒక స్పష్టమైన హామీ దక్కింది.

ఆహా ఓటీటీలో స్ట్రీమింగ్‌ కాబోతున్న తెలుగు ఇండియన్‌ ఐడల్‌ సీజన్‌ 4లో స్టేజ్‌ పై పాట పాడే అవకాశం కల్పిస్తానని అన్నాడు. అంతే కాకుండా రాజుతో పాటు తాను సైతం ఆ షో లో పాట పాడుతాను అంటూ తమన్‌ హామీ ఇవ్వడం జరిగింది. తెలుగు ఇండియన్ ఐడల్‌ బిగ్గెస్ట్ సిగ్గింగ్‌ షో. అలాంటి స్టేజ్ పై రాజుకు పాట పాడే అవకాశం ఇవ్వడం ద్వారా తమన్‌ ఎంతో గొప్పవాడు అయ్యాడు అంటూ నెటిజన్స్ కామెంట్స్ చేస్తున్నారు. ప్రస్తుతం సోషల్‌ మీడియాలో రాజుకు తమన్‌ చేస్తానన్న సాయం గురించి పెద్ద ఎత్తున చర్చ జరగడం వల్ల తమన్‌ గురించి చాలా పాజిటివ్‌గా కామెంట్స్ వస్తున్నాయి.

తమన్‌ ప్రస్తుతం పలు పెద్ద సినిమాలకు సంగీతాన్ని అందిస్తున్నాడు. పుష్ప 2 లోని కొన్ని సన్నివేశాలకు బ్యాక్‌ గ్రౌండ్‌ స్కోర్‌ అందించే పనిలో ఉన్న తమన్‌ త్వరలోనే ఓజీ సినిమాతో ప్రేక్షకుల ముందుకు రాబోతున్నాడు. అఖండ 2 సైతం తమన్‌ వర్క్ చేస్తున్నాడు. ఇక రామ్‌ చరణ్, శంకర్ కాంబోలో దిల్‌ రాజు నిర్మించిన గేమ్‌ ఛేంజర్‌ కి సైతం తమన్‌ సంగీతాన్ని అందించడం జరిగింది. భారీ ఎత్తున అంచనాలున్న ఈ సినిమాలు బ్యాక్ టు బ్యాక్‌ ప్రేక్షకుల ముందుకు రాబోతున్నాయి. తమన్‌ ఇతర సంగీత దర్శకులకు పోటీ ఇస్తూ టాప్‌ లో నిలుస్తూ వరుస సినిమాలతో ప్రేక్షకుల ముందుకు రాబోతున్నాడు.