తమన్.. 4 రోజుల్లోనే స్ట్రాంగ్ కమ్ బ్యాక్!

టాలీవుడ్ స్టార్ మ్యూజిక్ డైరెక్టర్ తమన్ కు ఎలాంటి క్రేజ్ ఉందో అందరికీ తెలిసిందే. ఇప్పటికే అనేక ప్రాజెక్టులకు అదిరిపోయే మ్యూజిక్ అండ్ బ్యాక్ గ్రౌండ్ స్కోర్ అందించి సూపర్ ఫేమ్ సంపాదించుకున్నారు. కొన్నిసార్లు విమర్శలు ఎదుర్కొన్నప్పటికీ.. ఇండస్ట్రీలో దూసుకెళ్తున్నారు. వరుస చిత్రాలతో బిజీ బిజీగా ఉంటున్నారు. ఒక సినిమా తర్వాత మరో సినిమా వర్క్స్ ను పూర్తి చేసుకుంటూ క్షణం తీరిక లేకుండా గడుపుతున్నారు.

ప్రస్తుతం స్టార్ హీరో రామ్ చరణ్ గేమ్ ఛేంజర్ సినిమాకు వర్క్ చేస్తున్నారు. పాన్ ఇండియా ప్రభాస్, మారుతి కాంబోలో వస్తున్న రాజా సాబ్ కు ఆయనే మ్యూజిక్ డైరెక్టర్ గా వ్యవహరిస్తున్నారు. సీనియర్ హీరో బాలయ్య అఖండ-2కు బాణీలు కడుతున్నారు. పవర్ స్టార్ పవన్ కళ్యాణ్ ఓజీ, సిద్ధు జొన్నలగడ్డ తెలుసు కదా సినిమాలు ఆయన ఖాతాలోనే ఉన్నాయి. బాలీవుడ్ లో బేబీ జాన్ సినిమాకు మ్యూజిక్ అందిస్తున్నారు.

బాలీవుడ్ స్టార్ హీరో వరుణ్ ధావన్, సౌత్ హీరోయిన్ కీర్తి సురేష్ జంటగా నటిస్తున్న బేబీ జాన్.. యాక్షన్ ఎంటర్టైనర్ గా రూపొందుతోంది. 2016లో వచ్చిన హీరో విజయ్‌ ‌‌మూవీ తేరికి రీమేక్ గా తెరకెక్కుతోంది. క్రిస్మస్ కానుకగా రిలీజ్ కానున్న బేబీ జాన్ టీజర్ ను మేకర్స్ రీసెంట్ గా విడుదల చేశారు. అయితే టీజర్ వచ్చాక.. తమన్ పై ఓ రేంజ్ లో ప్రశంసలు కురుస్తున్నాయి. ఆయన ఇచ్చిన బ్యాక్ గ్రౌండ్ స్కోర్ సూపర్ గా ఉందని అంతా చెబుతున్నారు.

తేరికి జీవీ ప్రకాష్ అందించిన అవుట్ పుట్ కన్నా బేబీ జాన్ కు తమన్ ఇచ్చిన బ్యాక్ గ్రౌండ్ స్కోర్ అదిరిపోయిందని అంటున్నారు. అయితే రీసెంట్ గా సింగం ఎగైన్ మూవీ కూడా రిలీజ్ అయిన విషయం తెలిసిందే. అజయ్‌ దేవ్‌ గణ్‌, కరీనా కపూర్‌, రణవీర్ సింగ్, అక్షయ్‌ కుమార్‌ తదితరులు నటించిన ఆ సినిమా బాక్సాఫీస్ వద్ద అనుకున్న స్థాయిలో మెప్పించలేకపోయింది. డైరెక్టర్ రోహిత్‌ శెట్టి రొటీన్‌ పచ్చడి అని చాలా మంది పోస్టులు పెట్టారు.

అయితే ఆ సినిమాకు తమన్.. రవి బస్రూర్ తో కలిసి అందించిన బ్యాక్ గ్రౌండ్ స్కోర్ కు తీవ్ర విమర్శలు వచ్చాయి. టార్చర్ గా అనిపించిందని పలువురు నెటిజన్లు సోషల్ మీడియాలో వాపోయారు. ఇప్పుడు సింగం అగైన్ రిలీజ్ అయిన నాలుగు రోజులకే తమన్.. బేబీ జాన్ టీజర్ కు గాను ప్రశంసలు అందుకుంటున్నారు. దీంతో ఇది ఆయనకు బిగ్ రిలీఫ్ అనే చెప్పాలి. నాలుగు రోజుల్లోనే సింగం ఎగైన్ విషయంలో వచ్చిన విమర్శలను మర్చిపోయేలా చేశారన్నమాట! మరి తమన్.. తన అప్ కమింగ్ ప్రాజెక్టులతో ఎలాంటి హిట్స్ అందుకుంటారో వేచి చూడాలి.