టాలీవుడ్‌ దారి పట్టిన బాలీవుడ్‌ బ్యూటీస్‌
హిందీలో వారు తీసుకునే పారితోషికం కంటే ఎక్కువ పారితోషికం తీసుకుని తెలుగులో నటించిన బాలీవుడ్‌ హీరోయిన్స్ చాలా మంది ఉన్నారు.
ఒకప్పుడు తెలుగు సినిమాల్లో బాలీవుడ్‌ హీరోయిన్‌ నటించింది అంటే చాలా పెద్ద విషయం. చాలా మంది పెద్ద దర్శకులు, స్టార్‌ హీరోల సినిమాల కోసం బాలీవుడ్‌ హీరోయిన్స్‌ను సంప్రదించిన సమయంలో నో అనే సమాధానం వచ్చేది. కొద్ది మంది హీరోయిన్స్ మాత్రం భారీ పారితోషికంకు ఒప్పుకునే వారు. హిందీలో వారు తీసుకునే పారితోషికం కంటే ఎక్కువ పారితోషికం తీసుకుని తెలుగులో నటించిన బాలీవుడ్‌ హీరోయిన్స్ చాలా మంది ఉన్నారు. కానీ ఇప్పుడు పరిస్థితి మారింది. తెలుగు సినిమా మార్కెట్‌ భారీగా పెరిగింది. తెలుగు సినిమాలు హిందీ సినిమాలను మించి వసూళ్లు సాధించడం మాత్రమే కాకుండా ప్రతిష్టాత్మక అవార్డులను సొంతం చేసుకుంటున్నాయి.
బాహుబలి తర్వాత తెలుగు సినిమా ఇండస్ట్రీ స్థాయి బాలీవుడ్‌ని మించిందనే చెప్పాలి. కరోనా తర్వాత బాలీవుడ్‌ ఒక్క హిట్ కోసం నానా తంటాలు పడుతూ ఉంటే టాలీవుడ్‌లో మాత్రం వరుసగా వందల కోట్ల వసూళ్లు, వేల కోట్ల వసూళ్లు నమోదు అవుతున్నాయి. ఇటీవల వచ్చిన పుష్ప 2 సినిమా బాక్సాఫీస్‌ వద్ద దాదాపుగా రూ.2000 కోట్ల వసూళ్లు సొంతం చేసుకున్న విషయం తెల్సిందే. దాంతో మరోసారి తెలుగు సినిమా స్థాయి ఏంటో, సత్తా ఏంటో బాలీవుడ్‌ ముద్దుగుమ్మలకు అర్థం అయ్యి ఉంటుంది. అందుకే తెలుగు సినిమాల్లో నటించేందుకు ఆసక్తి కనబరుస్తున్నారు. ముఖ్యంగా పెద్ద దర్శకులు అడిగితే కాదు అనకుండా నటించేందు రెడీ అవుతున్నారు.
ప్రభాస్‌కి జోడీగా సాహో సినిమాలో శ్రద్దా కపూర్‌ హీరోయిన్‌గా నటించి టాలీవుడ్‌లో అడుగు పెట్టింది. బాలీవుడ్‌లో మోస్ట్‌ బిజీ హీరోయిన్‌ అయిన కియారా అద్వానీ తెలుగులో పలు సినిమాల్లో నటించింది. లైగర్‌ సినిమాలో విజయ్ దేవరకొండకు జోడీగా అనన్య పాండే నటించింది. మొన్నటి వరకు బాలీవుడ్‌లోనే సినిమాలు చేస్తానన్న జాన్వీ కపూర్‌ ఇప్పుడు వరుసగా టాలీవుడ్‌లో సినిమాలు చేస్తుంది. దేవర సినిమాతో ఇప్పటికే తెలుగు ప్రేక్షకుల ముందుకు వచ్చిన జాన్వీ కపూర్‌ మరో వైపు రామ్‌ చరణ్‌కి జోడీగా బుచ్చిబాబు దర్శకత్వంలో సినిమా నటిస్తున్న విషయం తెల్సిందే. జాన్వీ కపూర్‌ తెలుగులో మరికొన్ని సినిమాల్లోనూ నటించే అవకాశాలు ఉన్నాయి.
రాజమౌళి దర్శకత్వంలో మహేష్ బాబు హీరోగా ఇటీవల ప్రారంభం అయిన సినిమాలో గ్లోబల్‌ స్టార్‌ ప్రియాంక చోప్రా నటిస్తున్న విషయం తెల్సిందే. ఇటీవలే ఆమె మహేష్ బాబుతో కలిసి షూటింగ్‌లో జాయిన్‌ అయ్యింది. అంతకు ముందు ఆర్ఆర్‌ఆర్‌ సినిమాతో ఆలియా భట్‌ తెలుగు తెలుగు ప్రేక్షకుల ముందుకు వచ్చింది. బాలీవుడ్‌తో పాటు ఇతర భాషల హీరోయిన్స్ సైతం తెలుగు సినిమా ఆఫర్‌ వస్తే కాదు అనకుండా నటించేందుకు ఓకే చెబుతున్నారు. టాలీవుడ్‌ స్థాయి పెరగడం వల్ల ఇతర భాషల హీరోయిన్స్ ఇటు వైపు పరుగులు పెడుతున్నారు. హిందీలో నటించేందుకే ఆసక్తి చూపించని ప్రియాంక చోప్రా తెలుగు సినిమాలో మహేష్ బాబుకు జోడీగా నటించేందుకు ఓకే చెప్పిందంటే టాలీవుడ్‌ స్థాయి ఏ రేంజ్‌లో పెరిగిందో అర్థం చేసుకోవచ్చు.