దిష్టి తగిలేంత గొప్పోడు అయిపోయాడు

అల్లు అర్జున్, త్రివిక్రమ్ శ్రీనివాస్ కాంబినేషన్ అంటేనే అభిమానుల్లో ప్రత్యేకమైన క్రేజ్ ఉంటుంది. ఈ కాంబినేషన్ నుంచి వచ్చిన జులాయి, సన్నాఫ్ సత్యమూర్తి, అల వైకుంఠపురంలో సినిమాలు బన్నీకి భారీ స్థాయిలో విజయాలు అందించాయి. త్రివిక్రమ్ మాటల మాంత్రికత్వం, బన్నీ నటనతో ఈ కాంబినేషన్ ఇప్పుడు మళ్లీ ముచ్చటగా మరో సినిమాకి సిద్ధమవుతోంది. ఆ విషయంపై బన్నీ మరోసారి అన్ స్టాపబుల్ షోలో క్లారిటీ ఇచ్చేశాడు.

అలాగే షోలో డైరెక్టర్ త్రివిక్రమ్ ఒక స్పెషల్ వీడియో మెసేజ్ ద్వారా బన్నీపై తన అనుబంధాన్ని పంచుకున్నారు. ‘‘జులాయి సిట్టింగ్స్‌లోనే బన్నీతో నా జర్నీ ఎంత కాలం కొనసాగుతుందో అర్థమైంది. ఆయన వ్యక్తిగతంగా, కెరీర్‌గా కూడా విస్తృత స్థాయిలో ఎదుగుతున్నారు.

పుష్ప చూసిన తర్వాత దిష్టి తగిలేంత గొప్పోడు అయిపోయాడు అనిపించింది. భారతీయ సినిమాలకు ఒక డైరెక్టరీ ఉంటే అందులో ముందువరుసలో బన్నీ పేరు ఉండడం ఖాయం,’’ అంటూ త్రివిక్రమ్ చెప్పిన మాటలు ప్రేక్షకులను మరింత ఆకట్టుకున్నాయి.

త్రివిక్రమ్ మాట్లాడుతూ, ‘‘ప్రస్తుతం బన్నీ యాక్ట్ చేయడం కాదు, తపస్సు చేస్తున్నట్టు కనిపిస్తోంది. గత నాలుగేళ్లుగా ఆయన చేస్తున్న కృషి ఒక తపస్సుగా భావించొచ్చు. అలాంటి స్టార్ డమ్ అందుకోవడం చారిత్రాత్మక విజయం’’ అని అభినందించారు. ‘‘తెలుగు సినిమాను అంతర్జాతీయ వేదిక మీదకి తీసుకెళ్లే సత్తా బన్నీకి ఉంది,’’ అంటూ త్రివిక్రమ్ తన ఆలోచనలను పంచుకున్నారు.

త్రివిక్రమ్ మాటలపై స్పందించిన బన్నీ, ‘‘నాకు మూడు బిగ్గెస్ట్ హిట్లు ఇచ్చిన డైరెక్టర్ త్రివిక్రమ్.. గురించి నేను ప్రత్యేకంగా చెప్పలేను,’’ అంటూ సింపుల్ గా స్పందించారు. అంతలోనే బాలకృష్ణ, ‘‘నాకు బోయపాటి ఎలానో, నీకు త్రివిక్రమ్ అలాంటి వ్యక్తి,’’ అని చెప్పడం అక్కడి ఆడియన్స్‌ను ఉత్సాహంలో ముంచెత్తింది. అల్లు అర్జున్, త్రివిక్రమ్ కాంబినేషన్‌లో మరో సినిమా వస్తుండడంతో ఆ విషయంలో కూడా బన్నీ క్లారిఫికేషన్ ఇచ్చేశాడు.

త్రివిక్రమ్ ఇప్పటికే బన్నీ కోసం కొత్త స్క్రిప్ట్‌ను సిద్ధం చేస్తున్నట్లు సమాచారం. ఈ కాంబినేషన్ మళ్లీ కలిసి పనిచేస్తే, మరోసారి బిగ్గెస్ట్ హిట్ సాధిస్తుందని అభిమానులు నమ్ముతున్నారు. అల.. వైకుంఠపురములో సినిమా కంటే అంతకుమించి ఉండేలా ఈ కాంబినేషన్ చర్చలు జరుపుతున్నట్లు తెలుస్తోంది. ఫాంటసీ బ్యాక్ డ్రాప్ అని ఆ మధ్య ఒక టాక్ అయితే వచ్చింది. అఫీషియల్ గా ఎలాంటి సినిమా అనేదానిపై ఇంకా క్లారిటీ ఇవ్వలేదు. కానీ ఆ సినిమా బడ్జెట్ 400 కోట్లకు పైనే ఉంటుందని సమాచారం. ఇకపోతే, బన్నీ ప్రస్తుతం పుష్ప 2 పనులకు ఫీనిషింగ్ టచ్ ఇస్తున్నారు. ఈ సినిమా డిసెంబర్ 5న వరల్డ్ వైడ్ గా రిలీజ్ కాబోతోంది.