మంచు విష్ణు కీలక నిర్ణయం.. వారి ఫ్యామిలీస్ కు 50% స్కాలర్ షిప్

టాలీవుడ్ హీరో, 'మా' ప్రెసిడెంట్, మోహన్ బాబు విశ్వవిద్యాలయం ప్రో ఛాన్సలర్ మంచు విష్ణు కీలక నిర్ణయం తీసుకున్నారు. 76వ గణతంత్ర దినోత్సవం సందర్భంగా సాయుధ బలగాల త్యాగాలను గౌరవించే లక్ష్యంతో ముఖ్యమైన కార్యక్రమాన్ని చేపట్టినట్లు ఆయన ప్రకటించారు. త్రివిధ దళాల్లో పని చేస్తున్న తెలుగు వారిని గౌరవించనున్నామని తెలిపారు.

అందులో భాగంగా వారి పిల్లలకు 50% స్కాలర్‌ షిప్‌ ను అందించనున్నామని వెల్లడించారు. అయితే ఆంధ్రప్రదేశ్, తెలంగాణకు మాత్రమే పరిమితం కాకుండా దేశంలోని అన్ని తెలుగు కుటుంబాలకు వర్తించనుందని ప్రకటించారు. మోహన్ బాబు విశ్వవిద్యాలయంలో అందించే అన్ని కోర్సులకు స్కాలర్‌ షిప్‌ ను అందించనున్నామని తెలిపారు.

ఆ సందర్భంగా మంచు విష్ణు మాట్లాడారు. దేశాన్ని రక్షించడానికి సైనికులు ఎన్నో త్యాగాలు చేస్తారని గుర్తు చేశారు.

వారి చేసిన సేవలకు గౌరవ సూచికంగా, కృతజ్ఞతలు తెలియజేసే క్రమంలో స్కాలర్ షిప్ కార్యక్రమాన్ని చేపట్టానని తెలిపారు మంచు విష్ణు. దేశానికి నిస్వార్థంగా సేవ చేసే వారి సంక్షేమానికి తోడ్పడాలని నిర్ణయించుకున్నానని చెప్పారు.

అదే సమయంలో ఇతర విశ్వవిద్యాలయాలు, సంస్థలకు తాము తీసుకున్న నిర్ణయం స్ఫూర్తినిస్తుందని ఆశిస్తునట్లు మంచు విష్ణు తెలిపారు. అయితే సమాజానికి తిరిగి అందించాలనే లక్ష్యంతో మహత్కర కార్యానికి ఆయన శ్రీకారం చుట్టారని చెప్పాలి. త్రివిధ దళాల్లో పని చేస్తున్న కుటుంబాల కోసం కీలక ముందడుగు వేసినట్లే.

ఇక.. విష్ణు ఇప్పటికే అనేక మంచి పనులు చేశారు. దాదాపు రెండేళ్ల క్రితం తిరుపతిలో 120 మంది అనాథ పిల్లలను దత్తత తీసుకున్నారు. దత్తత తీసుకోవడమే కాకుండా.. వారందరికీ మెరుగైన విద్య, వైద్యం అందేలా మెరుగైన ఏర్పాటు చేశారు. ఇప్పుడు రిపబ్లిక్ డే సందర్భంగా సైనికుల పిల్లలకు యాభై శాతం స్కాలర్ షిప్‌ ఇచ్చే కార్యక్రమాన్ని ప్రారంభించి తన గొప్ప మనసును మరోసారి చాటుకున్నారు.

మరోవైపు, విష్ణు.. తన డ్రీమ్ ప్రాజెక్ట్ కన్నప్పతో బిజీగా ఉన్నారు. ముఖేష్ కుమార్ దర్శకత్వం వహిస్తున్న ఆ సినిమా షూటింగ్ శరవేగంగా జరుగుతోంది. అదే సమయంలో ప్రమోషన్స్ ను కూడా నిర్వహిస్తున్నారు. ప్రతి సోమవారం ఒక అప్డేట్ ఇస్తున్నారు. సినిమాలో భాగమైన ఒక్కొక్క యాక్టర్ ఫస్ట్ లుక్ ను రిలీజ్ చేస్తున్నారు. మరి కన్నప్ప మూవీతో విష్ణు ఎలాంటి హిట్ అందుకుంటారో వేచి చూడాలి.