ఫైట్స్ లేని కమర్షియల్ సినిమా.. ఫ్యామిలీ కథే కానీ..!

స్టార్ హీరోలతో భారీ బడ్జెట్ సినిమాలు చేస్తూ మరోపక్క కంటెంట్ ఉన్న సినిమాలు చేస్తున్న బ్యానర్ సితార ఎంటర్టైన్మెంట్స్. లేటెస్ట్ గా లక్కీ భాస్కర్ గా మరో డిఫరెంట్ అటెంప్ట్ తో అలరించడానికి వస్తున్నారు. నేషనల్ లెవెల్ లో తనకంటూ ఒక ప్రత్యేక గుర్తింపు తెచ్చుకున్న మలయాళ స్టార్ దుల్కర్ సల్మాన్ లీడ్ రోల్ లో వెంకీ అట్లూరి డైరెక్షన్ లో ఈ సినిమా తెరకెక్కింది. ఈ సినిమాలో మీనాక్షి చౌదరి హీరోయిన్ గా నటించింది. సితార ఎంటర్‌టైన్‌మెంట్స్‌, ఫార్చూన్‌ ఫోర్ సినిమాస్‌ బ్యానర్లో సూర్యదేవర నాగవంశీ, సాయి సౌజన్య ఈ సినిమా నిర్మించారు. ఈ ప్రాజెక్ట్ కు జి.వి. ప్రకాష్ కుమార్ సంగీతం అందించాడు. దీపావళి కానుకగా అక్టోబర్ 31న వరల్డ్ వైడ్ గా భారీ స్థాయిలో ఈ సినిమా విడుదల అవుతుంది. సినిమా మీద ఉన్న నమ్మకంతో ఒకరోజు ముందుగానే అంటే అక్టోబర్ 30 సాయంత్రం నుంచే ప్రీమియర్ షోలు మొదలు పెడుతున్నారు. ఈ నేపథ్యంలో లేటెస్ట్ గా నిర్మాత సూర్యదేవర నాగవంశీ మీడియాతో సినిమా కు సంబందించిన మరిన్ని విషయాలు ముచ్చటించారు.. ఆ విశేషాలు ఏంటో చూద్దాం.

సినిమాకి టాక్ బాగా వస్తుందన్న నమ్మకంతోనే ప్రీమియర్లు వేస్తున్నాం. టాక్ బాగా వస్తే, రేపు సినిమా చూసేవారి సంఖ్య మరింత పెరుగుతుంది. దాంతో మొదటిరోజు వసూళ్లు భారీగా వచ్చే అవకాశముందని అన్నారు నాగావంశీ.

జయాపజయాలతో సంబంధం లేకుండా కొందరితో మంచి అనుబంధం ఏర్పడుతుంది. ఆ అనుబంధంతో సినీ ప్రయాణం కొనసాగుతుంది. దర్శకుడిగా వెంకీ అట్లూరిని మేము నమ్మాము. అందుకే ఆయనతో వరుస సినిమాలు చేస్తున్నాము.

మనిషి డబ్బు సంపాదించాలనుకున్నప్పుడు ఎంత దూరమైనా వెళ్తాడు అనే కథాంశంతో ఈ చిత్రం రూపొందింది. బ్యాంకింగ్ నేపథ్యంలో థ్రిల్లర్ జానర్ లో ఉండే ఫ్యామిలీ సినిమా ఇది. తర్వాత ఏం జరుగుతుందోననే ఆసక్తిని రేకెత్తిస్తూ నడుస్తుంది. ఒక కొత్త ప్రపంచంలోకి వెళ్లినట్టు ఉంటుంది. సినిమా ప్రారంభమైన పది పదిహేను నిమిషాలకు ప్రేక్షకులు భాస్కర్ పాత్రతో కలిసి ప్రయాణిస్తారు. భాస్కర్ అనే వ్యక్తి యొక్క జీవితం చుట్టూనే ప్రధానంగా ఉంటుందని అన్నారు.

సినిమా చూస్తున్న ప్రతి ప్రేక్షకుడు భాస్కర్ గెలవాలని కోరుకుంటాడు. చూసే సాధారణ ప్రేక్షకులు భాస్కర్ పాత్రలో తమని తాము చూసుకుంటారు. కథానాయకుడు ఈ సినిమాలో ఎవరినీ మోసం చేయడం ఉండదు. తన తెలివి తేటలతోనే ఎదుగుతాడు.

ఇది సందేశాత్మక చిత్రం కాదు. తెలుగులో వస్తున్న ఒక విభిన్న చిత్రం. కమర్షియల్ అంశాలు పుష్కలంగా ఉంటాయి. కమర్షియల్ సినిమా అంటే ఫైట్స్ ఒకటే కాదు. ఫైట్స్ లేకుండానే ప్రేక్షకులను మెప్పించే అంశాలు ఈ సినిమాలో ఎన్నో ఉన్నాయి. ఎక్కడా బోర్ కొట్టకుండా సినిమా నడుస్తుంది. సినిమా చూసి, ఒక మంచి అనుభూతితో ప్రేక్షకులు థియేటర్ నుంచి బయటకు వస్తారని చెప్పారు.

ఎడిటర్ నవీన్ నూలి ఏ సినిమా చూసి అంత తేలికగా సంతృప్తి చెందడు. అలాంటి నవీన్ సినిమా బాగుంది చూడమని చెప్పాడు. నాకు, త్రివిక్రమ్ గారితో సహా మా అందరికీ సినిమా బాగా నచ్చింది. అందరం సినిమా పట్ల ఎంతో నమ్మకంగా ఉన్నామని అన్నారు.

అందరికీ దీపావళి శుభాకాంక్షలు. లక్కీ భాస్కర్ సినిమా చూసి కుటుంబంతో కలిసి దీపావళి సెలబ్రేట్ చేసుకోండి. అలాగే ఈ దీపావళికి విడుదలవుతున్న ఇతర సినిమాలు కూడా విజయం సాధించాలని కోరుకుంటున్నానని అన్నారు నాగ వంశీ.