సినిమాగా అపర కుబేరుడి జీవితం!
వివిధ రంగాల్లో లబ్దప్రతిష్టులైన వారి జీవితగాథలను ఆధారంగా చేసుకుని ఇప్పటివరకు ప్రపంచవ్యాప్తంగా వివిధ భాషల్లో ఎన్నో సినిమాలు వచ్చిన సంగతి తెలిసిందే.
వివిధ రంగాల్లో లబ్దప్రతిష్టులైన వారి జీవితగాథలను ఆధారంగా చేసుకుని ఇప్పటివరకు ప్రపంచవ్యాప్తంగా వివిధ భాషల్లో ఎన్నో సినిమాలు వచ్చిన సంగతి తెలిసిందే. అయితే ఇలా బయోపిక్‌ లుగా వచ్చినవాటిలో స్వాత్రంత్య సమరయోధులు, రాజకీయ, క్రీడా రంగాలకు చెందినవారివే ఎక్కువగా ఉన్నాయి. వ్యాపార రంగాలకు చెందినవారి బయోపిక్‌ సినిమాలు తక్కువే.
మనదేశంలో క్రీడాకారులు సచిన్, ధోని, మేరీకోమ్, సైనా నెహ్వాల్, కపిల్‌ దేవ్‌ తదితరులపై బయోపిక్‌ సినిమాలు వచ్చాయి. ఇక రాజకీయ రంగంలో మహాత్మాగాంధీ, నేతాజీ సుభాష్‌ చంద్రబోస్, బీఆర్‌ అంబేడ్కర్, భగత్‌ సింగ్‌ తదితరులపై బయోపిక్‌ లు వచ్చాయి
అయితే ఇప్పుడు వినూత్న వ్యాపారాలతో ముందుకు సాగిపోతూ ప్రపంచంలోనే అత్యధిక ధనవంతుడిగా ఉన్న ఎలాన్‌ మస్క్‌ జీవితంపై బయోపిక్‌ రానుంది. కార్ల తయారీ సంస్థ.. టెస్లా, ఇంటర్నెట్‌ సంస్థ.. స్టార్‌ లింక్, సోషల్‌ మీడియా దిగ్గజం.. ‘ఎక్స్‌’ తదితర సంస్థల అధినేతగా ఎలాన్‌ మస్క్‌ ఎంతో పాపులర్‌ అయ్యారు. ఆయన ఒక ట్వీట్‌ చేసినా, ఏం మాట్లాడినా సంచలనమే.
ఎలాన్‌ మస్క్‌ ను దేశాలకతీతంగా సోషల్‌ మీడియాలో ఫాలో అయ్యేవారు అధికమే. ఆయనను అభిమానించేవారు, ఆయనలాగా కావాలనుకునేవారు ఎంతోమంది ఉన్నారు. పెద్ద సంఖ్యలో నెటిజన్లు ఎలాన్‌ మస్క్‌ ఎప్పుడు ఏ నిర్ణయం ప్రకటిస్తారా అని ఎదురుచూస్తుంటారు. ఈ నేపథ్యంలోనే ఎలాన్‌ మస్క్‌ జీవితాన్ని బయోపిక్‌ గా మలచాలని నిర్మాతలు భావిస్తున్నారు.
రెండు నెలల క్రితం ఎలాన్‌ మస్క్‌ జీవిత కథ పుస్తకం రూపంలో ‘ఎలాన్‌ మస్క్‌’ పేరుతో మార్కెట్లోకి విడుదలైన సంగతి తెలిసిందే. వాల్టర్‌ ఐజాక్సన్‌ అనే అమెరికన్‌ రచయిత ఎలాన్‌ మస్క్‌ జీవిత గాధను పుస్తక రూపంలోకి తెచ్చారు. దక్షిణాఫ్రికాలో ఒక సాధారణ కుటుంబంలో జన్మించిన మస్క్‌ ప్రపంచంలోనే అత్యధిక ధనవంతుడిగా ఎలా అవతరించారు? జీవితంలో గొప్ప విజయాలు ఎలా సాధించారు? ఇన్ని కంపెనీలను ఎలా స్థాపించారు వంటి అంశాల గురించి ఈ పుస్తకంలో వివరించారు.
ఇప్పుడు వాల్టర్‌ ఐజాక్సన్‌ పుస్తకం ఆధారంగానే మస్క్‌ బయోపిక్‌ తెరకెక్కించనున్నారు. ఈ మేరకు ఏ24 అనే చిత్ర నిర్మాణ సంస్థ మస్క్‌ బయోపిక్‌ తీసేందుకు ముందుకొచ్చింది. ఇందుకోసం ఇప్పటికే పుస్తక రచయిత నుంచి నిర్మాణ సంస్థ హక్కులను సొంతం చేసుకోవడం గమనార్హం.
ప్రముఖ హాలీవుడ్‌ డైరెక్టర్‌ డారెన్‌ ఆర్‌న్ఫోస్కీ.. ఎలాన్‌ మస్క్‌ బయోపిక్‌ చిత్రానికి దర్శకత్వం చేయనున్నారు. గతంలో ఆయన బ్లాక్‌ స్వాన్, పై, ది వేల్‌ వంటి సూపర్‌ హిట్‌ చిత్రాలను డైరెక్ట్‌ చేశారు. ఈ బయోపిక్‌ లో ఎలాన్‌ మస్క్‌ వ్యాపార జీవితంతోపాటు, వ్యక్తిగత జీవిత విశేషాలను కూడా చూపిస్తారని తెలుస్తోంది. అయితే, మస్క్‌ పాత్రలో ఎవరు నటిస్తారనేదానిపై ఇంకా స్పష్టత లేదు.