వైరల్ వీడియో... 250 మేకలను వధించి 20 వేల మందికి బిచ్చగాడి విందు!

"బిచ్చగాడు" సినిమాలో అన్ని ఉన్న ధనవంతుడు తన తల్లిని రక్షించుకోవడం కోసం దీక్ష చేస్తాడు. ఇందులో భాగంగా... బిక్షమెత్తుకుని బ్రతుకుతాడు! దీనికి పూర్తి భిన్నంగా అన్నట్లుగా ఓ నిజమైన బిచ్చగాడు తన నానమ్మ జ్ఞాపకార్థం రూ.1.25కోట్ల పాకిస్థాన్ రూపాయలతో భారీ విందు ఏర్పాటు చేశాడు. దీనికి సంబందించిన వీడియో వైరల్ గా మారింది.

అవును... పాకిస్థాన్ లో ఓ షాకింగ్ ఘటన తెరపైకి వచ్చింది. ఇందులో భాగంగా... ఆర్థిక ఇబ్బందుల్లో కొట్టి మిట్టాడుతున్న తన దేశానికే కాకుండా ప్రపంచం మొత్తానికి షాకిచ్చినంత పని ఒకటి చేశాడు ఓ బిచ్చగాడు. ఇందులో భాగంగా.. తమ కరెన్సీలో కోటి పాతిక లక్షలు ఖర్చు పెట్టి 20 వేల మందికి పసందైన వంటలతో విందు ఏర్పాటు చేసాడు.

వివరాళ్లోకి వెళ్తే... పాకిస్థాన్ లోని పంజాబ్ ప్రావిన్స్ లో ఓ బిచ్చగాడి నానమ్మ ఇటీవల మరణించింది. దీంతో... ఆమె జ్ఞాపకార్థం ఆమె మరణించిన 40వ రోజు ఆ కుటుంబం ఓ భారీ విందును ఏర్పాటు చేసింది. ఇందులో భాగంగా.. గుజ్రాన్ వాలాలో రాహ్ వలీ రైల్వే స్టేషన్ సమీపంలో భారీ ఎత్తున ఏర్పాట్లు చేసింది.

ఈ విందు కార్యక్రమానికి స్థానికులను ఆహ్వానించింది ఆ కుటుంబం. ఇదే సమయంలో పంజాబ్ ప్రావిన్స్ లోని పలు ప్రాంతాల నుంచి వేలాది మంది అతిథులను ఆహ్వానించింది. ఆ అతిథులు విందు కారక్రమానికి హాజరవ్వడానికి సుమారు 2 వేల వాహనాలను కూడా ఏర్పాటు చేసింది. ఈ క్రమంలో రకరకాల పసందైన వంటకాలతో సుమారు 20 వేల మందికి విందు చేసింది.

ఇందులో పాక్ సంప్రదాయ వంటకాలైన సిరి పాయ, మురబ్బాతో పాటు నాన్ వెజ్ తో గ్రాండ్ మెనూను లంచ్ లో వడ్డించగా.. డిన్నర్ లో మటన్, నాన్ మటార్ గంజ్ తో పాటు పలు వంటకాలను వడ్డించారు. ఈ కార్యక్రమం కోసం సుమారు 250 మేకలను వధించినట్లు చెబుతున్నారు. దీనికి సంబంధించిన వీడియోలు, ఫోటోలు ఇప్పుడు నెట్టింట వైరల్ గా మారాయి.

ఇక దీనికి సంబంధించిన వీడియోల కింద... "బిచ్చగాడికి ఇంత సొమ్ము ఎక్కడ నుంచి వచ్చిందో?" అని ఒకరు కామెంట్ చేస్తే... "పాకిస్థాన్ అప్పుల్లో ఉంది.. ఆ దేశంలోని బిచ్చగాళ్లు కాదు!" అని మరొకరు కామెంట్ చేశారు. మరొకరు... "నేను బిచ్చగాడినే కావొచ్చు.. కానీ పేదవాడ్ని మాత్రం కాదు!" అనే క్యాప్షన్ కరెక్ట్ గా సూటవుతుందని కామెంట్ చేశారు!