కంగనా దిష్టిబొమ్మ.. పోలీసులు పరుగో పరుగు!

బాలీవుడ్ ఫైర్ బ్రాండ్, హీరోయిన్ కంగనా రనౌత్.. ఇటీవల రాజకీయాల్లోకి అడుగు పెట్టిన విషయం తెలిసిందే. కొన్ని నెలల క్రితం జరిగిన సార్వత్రిక ఎన్నికల్లో పోటీ చేసి హిమాచల్ ప్రదేశ్ లోని మండి ఎంపీగా విజయం సాధించారు. అరంగేట్రంలోనే ఎంపీగా గెలిచి సంచలనం సృష్టించారు. ఎన్నికలకు కొద్ది రోజుల ముందే పాలిటిక్స్ లోకి వచ్చిన ఆమె.. నియోజకవర్గం అంతా బాగా తిరిగి ప్రచారం చేశారు. తన ప్రత్యర్థిపై భారీ మెజార్టీతో గెలిచి లోక్ సభలో అడుగు పెట్టారు.

అయితే మూడు వ్యవసాయ చట్టాల రద్దు కోసం గతంలో రైతులు చేపట్టిన ఆందోళనపై కంగనా ఇటీవల చేసిన వ్యాఖ్యలు ఎంతటి దుమారాన్ని రేపాయో తెలిసిందే. రైతు సంఘాలు తీవ్రంగా మండిపడడంతో బీజేపీ కూడా స్పందించింది. ఇలాంటి ప్రకటనలు ఇకపై ఎప్పుడూ చేయవద్దని ఆదేశించింది. పార్టీ అభిప్రాయం కిందకు రావని స్పష్టం చేసింది. తాజాగా ఉత్తరప్రదేశ్ లోని హాపూర్ లో పలు రైతు సంఘాలు.. కంగనా రనౌత్ దిష్టి బొమ్మతో నిరసన చేసేందుకు ప్రయత్నించాయి.

భారతీయ కిసాన్ యూనియన్ జాయింట్ కిసాన్ మోర్చా సభ్యులు.. కంగనా దిష్టిబొమ్మను దహనం చేసేందుకు బుధవారం ఉదయం రోడ్డుపైకి తీసుకొచ్చారు. దీంతో దిష్టిబొమ్మను పోలీసులు లాక్కునేందుకు యత్నించారు. ఆ సమయంలో నిరసనకారులు, పోలీసుల మధ్య చిన్నపాటి వాగ్వాదం జరిగింది. ఆ తర్వాత దిష్టిబొమ్మను తీసుకుని పోలీసులు పరుగులు తీశారు. అందుకు సంబంధించిన వీడియో క్లిప్.. ఇప్పుడు సోషల్ మీడియాలో తెగ చక్కర్లు కొడుతోంది.

అయితే పోలీసులు తీసుకెళ్లిన కంగనా దిష్టిబొమ్మను తిరిగి ఇవ్వాలని రైతులు డిమాండ్ చేశారు. రోడ్డుపై బైఠాయించి నిరసన తెలిపారు. ఆ తర్వాత మరో దిష్టి బొమ్మతో నిరసన కొనసాగించినట్లు తెలుస్తోంది. అప్పుడు ఢిల్లీ-లక్నో రోడ్డుపై భారీ ట్రాఫిక్ జామ్ ఏర్పడింది. కేంద్రంలో నాయకత్వం బలంగా లేకపోయినట్లయితే రైతుల నిరసనలతో భారత్ లో బంగ్లాదేశ్‌ తరహా పరిస్థితులు తలెత్తేవని కంగనా వ్యాఖ్యానించారు. రైతు ఉద్యమ సమయంలో శవాలు వేలాడేవని ఆమె ఆరోపించారు.

ఇక కంగనా సినిమాల విషయానికొస్తే.. ఆమె నటించిన ఎమర్జెన్సీ మూవీ త్వరలో విడుదల కానుంది. ఎప్పుడో రిలీజ్ కావాల్సిన ఆ సినిమా పలు కారణాల వల్ల వాయిదా పడింది. ఇప్పుడు సెప్టెంబర్ 6వ తేదీన రిలీజ్ కానుంది. సినిమాలో మాజీ ప్రధాన మంత్రి దివంగత ఇందిరాగాంధీ పాత్రను కంగనా పోషించారు. కాగా, ఎమర్జెన్సీ మూవీ రిలీజ్ కు ముందే వివాదాల్లో చిక్కుకుంది. మరి విడుదల అయ్యాక ఎలాంటి రెస్పాన్స్ అందుకుంటుందో వేచి చూడాలి.