భయానకమైన వీడియో... వైరల్ కావాలని ప్రయత్నించి తిరిగిరాని లోకాలకు..!

ఇటీవల కాలంలో సోషల్ మీడియాలో ఫేమస్ అయ్యేందుకు కొంతమంది చేస్తున్న పనులు చూస్తుంటే... కొన్ని నవ్వు తెప్పిస్తే, కొన్ని అసహ్యంగా అనిపిస్తుంటాయి. ఇంకొన్ని అభ్యంతరకరంగా ఉంటే, మరికొన్ని భయంకరంగా ఉంటాయి. ఈ నేపథ్యంలో తాజాగా ఓ దారుణమైన ఘటన తెరపైకి వచ్చింది. భయానక దృశ్యాలు హల్ చల్ చేస్తున్నాయి.

అవును.. సోషల్ మీడియాలో ఫేమస్ అవ్వాలని రీల్స్ పేరుతో కొంతమంది చేసే రచ్చ అంతా ఇంతా కాదనేది తెలిసిన విషయమే! ఈ క్రమంలో కొంతమంది ప్రాణాల మీదకు తెచ్చుకుని జస్ట్ లో మిస్సయిపోతే.. ఇంకొంతమంది మాత్రం మృత్యుఒడికి చేరుకుంటారు. ఈ క్రమంలో అలాంటి విషాదకర ఘటనే తాజాగా మహారాష్ట్రలోని నాగ్ పూర్ లో చోటు చేసుకుంది.

వివరాళ్లోకి వెళ్తే... నాగ్ పూర్ లోని కాలామ్న ప్రాంతానికి చెందిన ఆకాశ్ చకోలే (23).. ఇండిపెండెన్స్ డే రోజున ఫ్రెండ్స్ తో కలిసి స్థానిక టూరిస్ట్ స్పాట్ అయిన మకర్ డోక్డా డ్యామ్ వద్దకు వెళ్లాడు. గతకొన్ని రోజులుగా విపరీతంగా కురిసిన వర్షాల కారణంగా ఈ డ్యామ్ నిండి ఉంది. దీంతో... టూరిస్టులు చాలా మంది అక్కడకు చేరుతున్నారు.

ఈ నేపథ్యంలోనే ఆకాశ్.. మరో ఇద్దరు ఫ్రెండ్స్ తో కలిపి ఓ డేంజరస్ స్టంట్ చేయాలని భావించాడు. ఇందులో భాగంగా ఈ ముగ్గురూ విపరీతంగా పరుతున్న డ్యామ్ గోడను ఎక్కేందుకు ప్రయత్నించారు. ఈ నేపథ్యంలో వీరిలో ఆకాశ్ ఒక్కడే డ్యామ్ పైకి చేరగలిగాడు. ఈ సమయంలో మిగిలిన ఇద్దరు స్నేహితులను పైకి తీసుకొచ్చేందుకు చేయందించాడు.

దీంతో.. బ్యాలెన్స్ కోల్పోయి ప్రమాదవశాతూ అతడు డ్యామ్ లో పడిపోయాడు. దీంతో.. అప్రమత్తమైన రెస్క్యూ టీమ్స్ గాలింపు చేపట్టినా ఫలితం దక్కలేదు. కొన్ని గంటల తర్వాత ఆకాశ్ మృతదేహాన్ని గుర్తించారు. దీనికి సంబంధించిన భయానక దృశ్యాలు ప్రస్తుతం నెట్టింట వైరల్ గా మారాయి. రీల్స్ పిచ్చిలో యువత ఇలాంటి పనులు చేయొద్దని నెటిజన్లు సూచిస్తున్నారు.