ప్రియాంకకు బొకే.. పూలే లేవు.. వైరల్ గా మారిన వీడియో

రోటీన్ కు భిన్నంగా చోటు చేసుకునే పరిణామాల వేళ.. సదరు ప్రముఖులు స్పందించే తీరు చూస్తే.. విషయాల్ని వారెలా డీల్ చేస్తారన్న విషయం అర్థమవుతుంది. ఎన్నికల వేళ అధినేతలకు.. కొందరు ప్రముఖులకు ఎదురయ్యే పరిణామాలు మహా సిత్రంగా ఉంటాయి. ఇలాంటి సందర్భాల్లో కొందరు తమ అహసనాన్ని ప్రదర్శిస్తే.. మరికొందరు లైట్ తీసుకుంటారు. ఇంకొందరు మాత్రం తాము ఎంత హడావుడిగా ఉన్నా.. ప్రతి విషయాన్ని క్షుణ్ణంగా చూస్తామన్న విషయంతోపాటు.. అనూహ్యంగా చోటు చేసుకునే పరిణామాల్ని లైట్ తీసుకోవటం ద్వారా తమ చుట్టూ ఉన్న వాతావరణాన్ని మారుస్తుంటారు.

తాజాగా అలాంటి ఉదంతమే ఒకటి ప్రియాంకకు ఎదురైంది. ఈ సందర్భంగా ఆమె స్పందించిన తీరుకు సంబంధించిన వీడియో వైరల్ గా మారింది. ప్రస్తుతం ఐదు రాష్ట్రాల్లో అసెంబ్లీ ఎన్నికలు జరుగుతున్న సంగతి తెలిసిందే. అందులో భాగంగా మధ్యప్రదేశ్ లో జరిగిన ఒక కార్యక్రమానికి కాంగ్రెస్ అగ్రనేతల్లో ఒకరైన ప్రియాంక వాద్రా ప్రచార కార్యక్రమాల్ని చేపడుతున్నారు.

ఇండోర్ లో జరిగిన పార్టీ కార్యక్రమానికి ప్రియాంక హాజరయ్యారు. వేదిక మీదకు వచ్చిన ఆమెకు పూల బొకే ఇచ్చారో సీనియర్ కాంగ్రెస్ నేత. అయితే.. ఆ బొకేలో పువ్వులు లేకుండా ఖాళీగా ఉంది. ప్రియాంకను కలిసి.. ఆమె చేతిలో బొకే పెట్టాలన్న హడావుడిలో.. అందులో పువ్వులే లేకుండా.. ఖాళీగా ఉందన్న విషయాన్ని గుర్తించలేదు. అయితే.. ప్రియాంక మాత్రం బొకేలో పూలే లేవన్న విషయాన్ని.. సదరు నేతకు చూపించి నవ్వేశారు. తాను చేసిన తప్పును గుర్తించిన సదరు నేత సైతం నాలుక కర్చుకున్నారు. మొత్తంగా తనకు ఎదురైన ఇబ్బందికర సన్నివేశంలో ప్రియాంక వ్యవహరించిన తీరు అందరిని ఆకట్టుకుంటోంది. దీనికి సంబంధించిన వీడియో క్లిప్ వైరల్ గా మారింది. ఇబ్బందికర సన్నివేశాన్ని సరదా ఘటనగా మార్చేసిన ప్రియాంక తీరు అందరిని ఆకట్టుకుంటోంది.