షర్మిలకు షాక్.. విలీనానికి బ్రేక్.. ఇప్పుడేం జరగనుంది?

నూటికి నూరు శాతం కాకున్నా.. కనీసం యాభై శాతం.. అరవై శాతం అవకాశాలు ఉండటం ఒక ఎత్తు. నూటికి ఒక్క శాతం కూడా అవకాశం లేకున్నా.. అవకాశాలు ఉన్నాయని భావించటం దేనికి నిదర్శనం? తెలంగాణలో పార్టీ పెట్టిన షర్మిల తీరు పై మొదట్నించి వినిపిస్తున్న వాదన ఇదే. తాజాగా ఆమె జర్నీని చూస్తే.. ఆ వాదనలో నిజం ఎంతన్నది ఇట్టే అర్థమవుతుంది. దివంగత మహానేత వైఎస్ మీద అభిమానం తెలంగాణ ప్రజల్లో ఇప్పటికి ఉన్నప్పటికీ.. ప్రత్యేక పరిస్థితులు.. పెరిగిన ప్రాంతీయ భావోద్వేగాల మధ్యన షర్మిల తరహా రాజకీయ నేతలకు తెలంగాణలో అవకాశాలు దాదాపు లేని పరిస్థితి.

నిజానికి తెలంగాణ రాష్ట్ర ముఖ్యమంత్రి కేసీఆర్ మీదా.. ఆయన కుమారుడు కమ్ మంత్రి కేటీఆర్ మీద ఆమె చేసిన వ్యాఖ్యలు.. విమర్శలు.. ఆరోపణలు మరెవరూ చేయలేదనే చెప్పాలి. అంతేకాదు.. తెలంగాణ వ్యాప్తంగా పెద్ద ఎత్తున పాదయాత్ర చేసి.. అందుకుభారీగా ఖర్చు చేయటమే కాదు.. ప్రతి నియోజకవర్గంలో గులాబీ పార్టీ ఎమ్మెల్యేపై ఆమె దునుమాడిన వైనాన్ని ప్రశంసించాల్సిందే. ఎంత చేసినా.. మట్టిలో నుంచి నూనె తీయటం ఎంత అసాధ్యమో.. సరిగ్గా తెలంగాణలో రాజకీయ అవకాశాలు షర్మిల లాంటి వారికి ఉన్నాయన్న విషయాన్ని ఆమె మర్చిపోయినట్లుగా చెప్పాలి.

తనకున్న పరిచయంతో శివకుమార్ మధ్యవర్తిగా చేసుకొని కాంగ్రెస్ పార్టీలో తన పార్టీని విలీనం చేసేందుకు ఆమె ప్రయత్నాలు చేసినప్పటికి.. ఆమె పార్టీని తమ పార్టీలో విలీనం చేసుకోవటం ద్వారా లాభం కంటే నష్టమే ఎక్కువగా జరుగుతుందన్న విషయాన్ని గుర్తించిన హైకమాండ్.. ఆ ప్రక్రియకు బ్రేకులు వేసింది. అదే సమయంలో షర్మిల సైతం రాజకీయ పరిణితిని ప్రదర్శించకుండా తొందరపాటు వ్యాఖ్యలు చేయటం ఆమెకు లాభం కంటే నష్టమే ఎక్కువగా వాటిల్లేలా చేసింది.

రాహుల్.. ప్రియాంకలతో వరుస భేటీలు జరిపిన షర్మిల.. తాను కోరుకున్న రీతిలో వారి నుంచి సానుకూల స్పందన రాని నేపథ్యంలో.. ఓపిక నశించి కాంగ్రెస్ కు డెడ్ లైన్ విధిస్తూ మరో తప్పు చేశారు. అయినప్పటికీ ఆమె కోరుకున్న విధంగా స్పందన లేకపోవటంతో తన పార్టీని విలీనం చేసే ప్రక్రియకు పుల్ స్టాప్ పెట్టాల్సిన పరిస్థితి షర్మిలకు ఎదురైంది. దీంతో.. ఆమె తన పార్టీని విలీనం చేసే అంశం మీద కంటే కూడా.. వచ్చే ఎన్నికల్లో పోటీ చేసే విషయంపై ఫోకస్ పెట్టాల్సిన పరిస్థితి ఏర్పడింది. ఎన్ని ప్రయత్నాలు చేసినా.. విలీనం విషయంలో కాంగ్రెస్ అధినాయకత్వం ఎలాంటి తొందరపాటుకు గురి కాకుండా.. ఆచితూచి అన్నట్లుగా రియాక్టు కావటం ఆసక్తికరంగా మారింది.

మూడు రోజులు ఢిల్లీలో ఉండి ప్రయత్నాలు చేసినప్పటికీ.. తాను అనుకున్న పరిణామాలు చోటు చేసుకోవటంతో.. కాంగ్రెస్ లో తన పార్టీని విలీనం చేసే ప్రక్రియను ఆపేసి.. ఎన్నికల్లో పోటీ కోసంఅభ్యర్తుల్ని వెతుక్కోవాల్సిన దుస్థితిని షర్మిల ఎదుర్కొంటున్నట్లు చెబుతున్నారు. తాను సైతం ఎన్నికల బరిలోకి దిగాలన్న ఆలోచనలో కసరత్తు మొదలు పెట్టినట్లుగా తెలుస్తోంది. మొత్తంగా చూస్తే.. విలీనంపై షర్మిల వేసిన అడుగులు ఆమెకు లాభం కంటే నష్టాన్నే కలిగించాయన్న మాట వినిపిస్తోంది.