క‌మీడియ‌న్ అలీకి మెగా ఫ్యామిలీతో ఉన్న అనుబంధం గురించి ప్ర‌త్యేకంగా చెప్ప‌న‌వ‌స‌రం లేదు. మెగా ఫ్యామిలీలో ప‌వ‌ర్ స్టార్ పవన్ క‌ల్యాణ్ తో అలీకి వ్య‌క్తిగ‌తంగా స‌న్నిహిత సంబంధాలున్నాయి. పవన్ తో అతి చ‌నువుగా ఉండ‌గ‌లిగే వ్య‌క్తుల‌లో ఒక‌రైన అలీ పవన్ స్థాపించిన జ‌న‌సేన పార్టీ వ్య‌వ‌హారాల్లో ఎప్పుడూ పాల్గొన‌లేదు. తాను పార్టీ పెడుతున్నాననీ .. వచ్చి హెల్ప్ చేయండి అని పవన్ ఎవ‌రినీ అడగలేదని గ‌తంలో అలీ ఓ ఇంట‌ర్వ్యూ సంద‌ర్భంగా చెప్పిన సంగ‌తి తెలిసిందే. అవసరం అనిపించినప్పుడు మిత్రులు, స‌న్నిహితుల స‌హ‌కారం కోర‌తాన‌ని పవన్ అన్నారని అలీ చెప్పాడు. ప్ర‌స్తుతం ఆ స‌మ‌యం ఆస‌న్న‌మైంద‌న్న సంకేతాలు క‌నిపిస్తున్నాయి. నిన్న జూబ్లీ హిల్స్ లో జ‌రిగిన జ‌న‌సేన పార్టీ కార్యాల‌య ప్రారంభోత్స‌వ కార్య‌క్ర‌మంలో అలీ హ‌ల్ చ‌ల్ చేశారు. కార్య‌క్ర‌మం ఆద్యంతం అలీ...పవన్ వెంట ఉన్నారు. ఆయ‌న‌కు తెలుగు ఖురాన్ ప్ర‌తిని అలీ బ‌హూక‌రించారు. ముస్లిం మ‌త పెద్ద‌ల‌తో అలీ...జ‌న‌సేన కార్యాల‌యంలో ప్ర‌త్యేక పూజ‌లు నిర్వ‌హించారు. పవన్ రాజ‌కీయాల‌లో రాణించాల‌ని అలీ ప్ర‌త్యేక ప్రార్థ‌న‌లు చేయించారు.
అయితే, నిన్న జ‌రిగిన కార్య‌క్ర‌మంలో అలీ హ‌ల్ చ‌ల్ పై భిన్న వాద‌న‌లు వినిపిస్తున్నాయి. పవన్ కు అలీ అత్యంత స‌న్నిహితుడు కావ‌డం వల్లే ఆ కార్య‌క్ర‌మంలో పాల్గొన్నాడ‌ని ప‌లువురు అభిప్రాయ‌ప‌డుతున్నారు. కేవలం పవన్ స్నేహితుడిగా మాత్రమే ఆ కార్య‌క్ర‌మంలో పాల్గొని సంద‌డి చేశాడ‌ని అనుకుంటున్నారు. అయితే, గ‌తంలో జ‌న‌సేన కార్య‌క్ర‌మాల్లో ఎక్క‌డా క‌నిపించ‌ని అలీ స‌డెన్ గా ఈ ప్రారంభోత్స‌వ కార్య‌క్ర‌మానికి హాజ‌ర‌వ‌డంపై ప‌లువురు ఆశ్చ‌ర్యం వ్య‌క్తం చేస్తున్నారు. రాబోయే ఎన్నిక‌ల్లో పవన్ తో క‌లిసి నడిచేందుకు అలీ స‌న్నాహాలు ప్రారంభించాడ‌ని కొందరు అనుకుంటున్నారు. కొద్ది రోజుల త‌ర్వాత పవన్ ...జ‌న‌సేన కార్య‌క్ర‌మాల కోసం ఎక్కువ స‌మ‌యాన్ని కేటాయించ‌బోతున్న నేప‌థ్యంలో అలీ ఆయ‌న‌కు పూర్తి స‌హ‌కారం అందించ‌బోతున్నార‌ని కొందరు భావిస్తున్నారు. రాబోయే ఎన్నిక‌ల్లో జ‌న‌సేన పార్టీ నుంచి అలీ టికెట్ ఆశిస్తున్నార‌ని, అందుకే ఇక‌పై జ‌న‌సేన కార్య‌క్ర‌మాల్లో పవన్ తో పాటు చురుగ్గా పాల్గొన‌బోతున్నారని కొందరు అనుకుంటున్నారు. ఏదేమైనా ఆ కార్య‌క్ర‌మానికి అలీ హాజ‌ర‌వ‌డంపై ర‌క‌ర‌కాల ఊహాగానాలు వెలువ‌డుతున్నాయి.