ఎన్టీఆర్, చంద్రబాబు.. ఓ వర్మ చరిత్ర

చరిత్ర చాలా గొప్పది బాబూ అంటున్నారు వివాదాస్పద దర్శకుడు రాంగోపాల్ వర్మ. తన లక్ష్మీస్ ఎన్టీఆర్ మూవీ విడుదల కాకుండా అడ్డుకున్న చంద్రబాబు టార్గెట్ గా రాంగోపాల్ వర్మ ఎన్ని కామెంట్లు, లొల్లి చేశాడో అందరికీ తెలిసిందే. ఇక వైఎస్ జగన్ అధికారంలోకి రాగానే ఓడిపోయిన బాబుపై బోలెడన్నీ పంచులేశాడు వర్మ.

ఇప్పుడు తాజాగా సంఘటనల ఆధారంగా మరింత కాకపుట్టే పంచులు విసిరాడు. నాడు ఎన్టీఆర్ చికిత్స కోసం అమెరికా వెళ్లిన సందర్భంలో టీడీపీని నాదెండ్ల భాస్కర్ రావు హైజాక్ చేసిన సంగతి తెలిసిందే. ఇప్పుడు చంద్రబాబు కూడా విదేశాల్లో ఉన్న సమయంలోనే టీడీపీ రాజ్యసభ ఎంపీలు సుజనాచౌదరి, సీఎం రమేష్, గరికపాటి, టీజీ వెంకటేశ్ లు బీజేపీలో చేరారు. ఈ సందర్భాన్ని గుర్తు చేసుకొని వర్మ చెలరేగిపోయాడు.

తాజాగా వర్మ ట్వీట్ చేస్తూ.. ‘టీడీపీ వ్యవస్థాపకుడు ఎన్టీఆర్ విదేశాల్లో ఉండగా నాదెండ్ల భాస్కర్ రావు వెన్నుపోటు పొడిచాడని.. ఇప్పుడు చంద్రబాబు విదేశాల్లో ఉండగా టీడీపీ ఎంపీలు బాబుకు వెన్నుపోటు పొడిచారని.. చరిత్ర ఎప్పుడూ మరవదు బాబూ ’ అంటూ ట్వీట్ చేశారు.

ఇక మరో ట్వీట్ లో అసెంబ్లీలో చంద్రబాబు మాట్లాడినప్పుడల్లా సీఎం జగన్ నవ్వును ఆపుకోలేకపోతున్నారని.. దీని అర్థం చంద్రబాబు అసెంబ్లీలో బ్రహ్మానందంలాగా మారిపోయారని సెటైర్లు వేశారు. ఇలా చంద్రబాబును సందర్భం వచ్చిన ప్రతీసారి ఆడుకుంటూ సెటైర్ల వర్షం కురిపిస్తున్నారు రాంగోపాల్ వర్మ.