ఆ విషయాన్ని ఇప్పుడు గుర్తు చేస్తున్న చంద్రబాబు!

'దేవుడి దయతో ప్రాణాలతో ఉన్నాను..' అంటూ పదే పదే అంటున్నారట చంద్రబాబు నాయుడు. తన పార్టీ నేతలతో చంద్రబాబు నాయుడు నిర్వహిస్తున్న సమీక్షల్లో ఈ వ్యాఖ్య వీలైనన్ని సార్లు చేస్తున్నారట చంద్రబాబు నాయుడు. చంద్రబాబు నాయుడు డైరెక్టుగా మీడియాతో ఆ మాట అనడం లేదు. సొంత పార్టీ నేతల సమీక్షల్లో చంద్రబాబు నాయుడు ఆ వ్యాఖ్య చేస్తున్నారు. 

ఎలాగూ అక్కడ ఏమేం మాట్లాడుతున్నది పూర్తిగా మీడియాకు వివరిస్తారు నేతలు. మీడియాకు లీకులుగా ఆ విషయాలన్నీ చేరవేస్తారు. అదంతా రొటీన్ గా జరిగే పనే. దీంతో చంద్రబాబు నాయుడు చేస్తున్న వ్యాఖ్యలు యథాతథంగా మీడియాకు అందుతూ ఉన్నాయి.

అందులో భాగంగా 'దేవుడి దయతో ప్రాణాలతో ఉన్నాను..'అంటూ చంద్రబాబు నాయుడు వ్యాఖ్యానించడం చర్చనీయాంశంగా మారుతూ ఉంది. ఇంతకీ చంద్రబాబు నాయుడు ఇప్పుడు ఆ అంశాన్ని ఎందుకు ప్రస్తావిస్తున్నారనే దానిపై చర్చ జరుగుతూ ఉంది.

తనపై అలిపిరిలో దాడి జరగడాన్ని చంద్రబాబు నాయుడు ఇలా ప్రస్తావిస్తున్నారనుకోవాలి. అయితే అది జరిగింది ఈ మధ్య ఏమీ కాదు కదా. దాదాపు పదహారేళ్ల కిందట ఆ దాడి జరిగింది. ఆ తర్వాత వెంటనే వచ్చిన ఎన్నికల సమయంలో చంద్రబాబు నాయుడు అందుకు సంబంధించిన ఫొటోలను  కూడా వాడుకున్నారు. అయినా ఇప్పుడు చంద్రబాబు నాయుడు ఆ అంశాన్ని పదే పదే ప్రస్తావిస్తున్నారట. బహుశా ప్రతిపక్షంలోకి వెళ్లిన నేపథ్యంలో ప్రజల నుంచి సానుభూతిని కోరుకుంటూ చంద్రబాబు నాయుడు ఈ తరహా వ్యాఖ్యలు చేస్తున్నట్టుగా ఉన్నారని పరిశీలకులు అభిప్రాయపడుతూ ఉన్నారు.