కేటీఆర్ ని కలిసిన మంచు హీరో!

హీరో మంచు మనోజ్ ఇవాళ ఐటీ శాఖ మంత్రి కేటీఆర్ ని కలిశారు. దివ్యాంగులైన వృద్ధులు, యువత కోసం తాను చేపట్టినప్రాజెక్ట్ గురించి ఆయనకు వివరించారు. తాము చేపట్టబోయే ప్రాజెక్టులకు మంత్రి కేటీఆర్ అనుమతులు ఇచ్చారు.. అని పేర్కొన్న మనోజ్ 'మీ మద్దతుకు కృతజ్ఞతలు కేటీఆర్ గారు. కల త్వరలోనే సాకారం అవుతుంది' అని ట్వీట్ చేశారు.
మంచు మనోజ్ తొలినుంచి సినిమాలు చేయడంతోపాటు ప్రజా సేవ కార్యక్రమాలు చేయడంలో కూడా ముందు ఉంటున్నాడు. ప్రజా సమస్యలపై తక్షణం స్పందిస్తుంటారు. తిరుపతిలో పలు సేవా కార్యక్రమాలు చేపడుతుంటారు.

మనోజ్ కొంతకాలంగా స్పోర్ట్స్ అండ్ ఎడ్యుటైన్ మెంట్స్ ప్రాజెక్టు కోసం పని చేస్తున్నాడు. అతడి డ్రీమ్ ప్రాజెక్ట్ త్వరలో ప్రారంభం కానుండడంతో అతడు ఎంతో సంతోషంగా ఉన్నాడు. మనోజ్ రెండేళ్లుగా సినిమాలకు దూరంగా ఉన్నాడు. ముందు సినిమాలు ఇక చేయను.. అంటూ ప్రకటనలు చేసిన మనోజ్ ఆతర్వాత సన్నిహితుల సూచనల మేరకు సినిమాల్లో కొనసాగుతానని ప్రకటించారు.

ప్రస్తుతం రెండు సినిమాలను లైన్ లో పెట్టాడు మనోజ్. అందులో పాన్ ఇండియా స్థాయిలో నిర్మిస్తున్న 'అహం బ్రహ్మాస్మి' సినిమా ఒకటి. ఈ సినిమాను ఒక వైవిధ్యమైన కాన్సెఫ్ట్ తో నూతన దర్శకుడు శ్రీకాంత్ రెడ్డి తెరకెక్కించనున్నారు. ఈ సినిమా కోసం మనోజ్ స్వయంగా నిర్మాతగా మారాడు ఎంఎం ఆర్ట్స్ అనే బ్యానర్ స్థాపించి ఈ సినిమాను నిర్మిస్తున్నారు. ఈ సినిమాలో పీటర్ హెయిన్స్ కంపోజ్ చేసిన ఫైట్స్ హైలెట్ గా నిలవనున్నాయి అని సమాచారం. కరోనా కారణంగా ఈ సినిమా చిత్రీకరణ ఆగిపోయింది. ప్రస్తుతం మళ్లీ ఆ సినిమా షూటింగ్ లో పాల్గొనేందుకు మనోజ్ సిద్ధమవుతున్నాడు. ఇటీవలే తన లుక్ ను కూడా మనోజ్ పూర్తిగా మార్చాడు. బరువు తగ్గి స్లిమ్ గా మారాడు. కొన్నేళ్లుగా హిట్టు కోసం ఎదురు చూస్తున్న మనోజ్.. ఈసారైనా హిట్ కొడతాడేమో చూడాలి.