రెడ్ వుడ్ మాఫియా ‘క్వీన్’ కు అరెస్ట్ వారెంట్

ఎర్రచందనం అక్రమ రవాణాకు సంబంధించి పలు ఆరోపణలు ఎదుర్కొంటూ.. చిత్తూరు కోర్టులో కేసులున్న సినీ నటి.. మోడల్ సంగీతా చటర్జీ మరోసారి చిత్తూరు పోలీసులకు తనదైన శైలితో షాకిచ్చింది. ఆమెను అదుపులోకి తీసుకునేందుకు చిత్తూరు పోలీసులు ఎంత ప్రయత్నించినా కొరకరాని కొయ్యలా మారి.. చట్టం సాయంతో షాకుల మీద షాకులివ్వటం తెలిసిందే.

ఆమెను అదుపులోకి తీసుకునేందుకు పశ్చిమ బెంగాల్ రాజధాని కోల్ కతాకు వెళ్లిన చిత్తూరు పోలీసులకు.. అక్కడి కోర్టు కారణంగా ఆమెను అరెస్ట్ చేయలేని పరిస్థితి. ఈ మధ్యనే ఆమెకు సంబంధించిన ఒక వీడియో వైరల్ అయ్యింది. తనను పోలీసులు ఇబ్బంది పెడుతున్నారని.. తనకూ ఎర్ర చందనం అక్రమ రవాణాకు ఏ మాత్రం సంబంధం లేదని.. అయినా తనను.. తన వారిని తీవ్ర ఇబ్బందికి గురి చేస్తున్నారంటూ బోరున విలపిస్తూ కొన్ని మీడియా సంస్థలతో మాట్లాడిన ఆమె.. చిత్తూరు కోర్టు కేసు విచారణకు హాజరు కాకుండా డుమ్మా కొట్టింది.

ఇప్పటికే పలుమార్లు చిత్తూరు కోర్టుకు గైర్హాజరు అయిన ఆమె తీరుతో తాజాగా కోర్టు ఆగ్రహాం వ్యక్తం చేసింది. తాజాగా ఆమెను అదుపులోకి తీసుకోవాలంటూ అరెస్ట్ వారెంట్ ఇష్యూ చేసింది. ఈ వారెంట్ ను తీసుకున్న చిత్తూరు పోలీసులు ఈసారి ఆమెను ఎట్టి పరిస్థితుల్లో అరెస్ట్ చేయాలన్న పట్టుదలతో కోల్ కతా బయలుదేరేందుకు ప్లాన్ చేస్తున్నారు. ఈ సారైనా రెడ్ శాండిల్ వుడ్ మాఫియా క్వీన్ గా చెప్పే సంగీతాను అదుపులోకి తీసుకుంటారా? లేక.. ఈసారి కూడా తనదైన శైలిలో చిత్తూరు పోలీసులకు ఆమె షాకిస్తారా..?